Semana oin, PN diskute OJE 2020

Parlamentu Nasionál (PN) deside hodi adía tan ajenda abertura diskusaun Orsamentu Jerál Estadu (OJE) tinan 2020 nian,  ne’ebé ho montante billiaun USD 1.950 ba semana oin, tanba sei konsentra ba prosesu funebre matebian deputadu UDT, Gilman Exposto dos Santos.

Primeira Vise Prezidente Parlamentu Nasionál, Maria Angelina Sarmento informa, líder bankada deside adía abertura disksaun ne’e, tanba bazeia ba regras rejimentu, labele iha interupsaun ka para, bainhira debate la’o.

“Adía diskusaun ne’e, ho razaun katak, aban (ohin) sei fó tempu tomak  atu presta omenajen ikus ba deputadu Gilman Exposto dos Santos, ne’ebé nu’udar mós Prezidente UDT, inklui sei asiste prosesu funébre ba deputadu Gilman nian. Segundu, tuir rejimentu bainhira hahú ona debate, tenke konsekutiva katak, tenke la’o, labele iha interupsaun, maibé iha kazu ida agora, ita hasoru situasaun ida ne’ebé mak tristeza nia laran, tanba lakon deputadu ida ne’ebé efetividade iha funsaun hanesan deputadu”, hatete Maria Angelina ba jornalista sira, Tersa (26/11/2019).

Angelina akresenta, ho adía ajenda ne’e, hanesan jestu solidariedade ba família matebian ne’ebé triste hela.

“PN mós hakarak hatudu nia jestu solidariedade ba família enlutada, ne’ebé lakon ona deputadu Gilman, maibé la’os ba família de’it, PN mós lakon nia ema di’ak ida, aliadu prinsipal ida husi koligasaun AMP rasik, ne’ebé hakotu ona iis, maibé ema hotu la espera, tanba ho razaun rejimentu dehan tenke hala’o debate ho konsekutivu no labele iha interupsaun ne’e mak deputadu sira hanoin katak, di’ak liu hahú debate ne’e iha Segunda semana oin, tanba Kinta mós sei iha feriadu nasionál, selae la la’o tuir rejimentu ona, tanba ne’e mak hanoin katak, di’ak husik PN presta tiha nia omenajen mak bele kontinua fali debate, tanba etikamente ita mós presiza hatudu jestu solidariedade”, tenik Sarmento.

Tuir ajenda lolos, deputadu PN kinta lejislatura, atu halo abertura diskusaun iha faze jeneralidade ne’e,  iha loron 25 to’o 27 fulan ne’e, no faze espesialidade atu hahú husi loron 29 fulan ne’e to’o loron 11 fulan Dezembru tinan ne’e, maibé lakonsege, tanba PN lakon nia deputadu efetivu ida, nune’e mak sei hahú fali iha Sergunda loron 2 fulan Dezembru.say