Espesialista matan Australia fo tratamentu gratuita ba pasiente TL

Xefi Departementu Oftalmologia, Hospital Nacional Guido Valadares (HNGV), Belmerio Jerónimo, informa, Governu Australia liu husi organizasaun Internasional Royal Australian Colleg (RAC) haruka médiku espesialista matan nain rua mai hala’o tratamentu matan gratuita ba pasiente Timor-Leste.

Belarmino hateten, objetivu husi tratamentu gratuita ne’e nu’udar programa kontinuasaun ne’ebé durante ne’e governu Australia liu husi RAC hala’o hodi fo operasaun ba pasiente sofre matan ne’ebé mak Timor-oan sira labele halo.

“Sira mai atu fo atendimentu ba kazu sira ne’ebé mak durante fulan hira nia laran halo planu ba sira atu halo operasaun, liu-liu kazu katarak ne’ebé ho tipu foin nurak inklui kazu sira seluk hanesan moras matan iha parte kulit, ne’ebé ita konvida sira mai halo operasaun ba sira tanba ita seidauk bele halo mesak,”Belmerio Jerónimo, ba GMN iha nia servisu fatin Bidau, Dili, Segunda (27/8/2018).

Belmerio haktuir, pasiente nain 50 mak oras ne’e dadauk naran iha ona lista hodi hetan tratamentu matan maibe posibilidade sei aumenta.

“Planu naran ne’ebé mak rejistu ona iha ne’e hodi hetan tratamentu ne’e nain rua maibe posibilidade sei aumenta tanba pasiente barak mak la mai halo tratamentu iha ne’e maibe sira hetan informasaun sira mai deit entaun maske naran laiha lista maibe tanba sira mai ona entaun ita simu deit ona no sira iha direitu atu hetan tratamentu,”dehan nia.

Sisto de Souza, família pasiente sente kontenti tanba durante fulan 6 nia tiu hala’o tratamentu iha Sentru Matan seidauk hetan operasaun maske nia matan parte karuk labele haree rai ona.

“Ami mai halo tratamentu iha ne’e kuaze fulan 6 ona, maibe matan seidauk diak, no kontinua moras tanba ne’e ho vizita husi doutor espesialista sira ne’e ha’u-nia tiu bele halo operasaun, tanba ha’u-nia tiu nia matan sorin parte karuk ne’e hetan moras tanba ai nia ben mak tama pois mai hasai mos ladiak fo ona oklu mos ladiak nafatin entaun liu husi oportunidade ida ne’e, simu ona billeti no nia sei hetan operasaun,”Sisto Kontenti.

Tuir planu Doutor espesialista nain rua ne’e sei hala’o tratamentu gratuita durante loron rua, hahú husi loron 27-28, fulan Agusto, tinan ne’e.Ola