JavaScript must be enabled in order for you to see "WP Copy Data Protect" effect. However, it seems JavaScript is either disabled or not supported by your browser. To see full result of "WP Copy Data Protector", enable JavaScript by changing your browser options, then try again.

OJE ba PR millaun US$3.5, Barak liu ba viajen estranjeiru

OJE ba PR millaun US$3.5, Barak liu ba viajen estranjeiru

Parlamentu Nasional (PN) aprova ona orsamentu ba Prezidénsia Repúblika ho montante millaun tolu pontu lima liu, ho votus a favor 55, kontra 0 no abstensaun 9.

Antes atu aprova propsota orsamentu ba Prezidensia da Repúblika, deputadu proponente sira aprezenta proposta Prezidénsia Repúblika nian ne’ebé husu Parlamentu Nasional, atu aumenta osan ba viajen Prezidenti Repúblika nia ba estranjeiru.

Deputada proponente Carmelita Moniz, husi bankada CNRT hateten, orsamentu Prezidenti Repúblika ne’e, fahe ba kategória tolu mak hanesan saláriu e vensimentu, bens e servisu no kapital menor.

Tanba ne’e sira aprezenta proposta hodi husu ba Governu atu ko’a osan husi fundu infra-estrutura, hodi aumenta ba Prezidénsia da Repúblika, tanba tuir proponente sira nia haree katak, durante fulan hat nia laran ne’e, orsamentu infra-estrutura ne’e, difisil ba Governu atu ezekuta hotu.

 “Husi kategoria tolu ne’e, orsamentu alokadu mak, salariu no bensimentu, atu halo pagamentu ba oras extra-motorista sira. Orsamentu bo’ot liu ba benservisu, ne’ebé alokadu ba viajen lokal no viajen estranjeiru,” katak Carmelita iha plenária PN, Sesta (01/09).

Nia esplika, viajen estranjeiru ne’ebé mak Prezidenti Repúblika atu halo iha fulan hat ne’e nia laran mak, Prezidenti Repúblika husu osan US$ 927 mill, atu halo viazen ba Nova Iorque iha fulan Setembru nia laran, no Prezidenti Repúblika sei ba vizita Australia durante loron tolu iha fulan Outubru, Prezidenti Repúblika husu US$ 100 mill, Prezidenti Repúblika mós sei partisipa iha Bali Forum ne’ebé sei akontese iha loron 29 to’o 30 Outubru, Prezidenti Repúblika husu orsamentu  US$ 100 mill.

“Prezidenti Repúblika mós sei ba Vatikanu iha fulan Novembru, Prezidenti Repúblika husu US$ 200 mill, no Prezidenti Repúblika sei vizita Maroco iha fulan Desembru, Prezidenti Repúblika husu orsamentu US$ 150 mill. Nomós osan ne’ebé foin dadauk Prezidensia Repúblika sosa tiha vileti atu ba Portugal no Caboverde, maibé to’o ikus Parlamentu Nasional kansela, entaun ita tenki selu fali vileti sira ne’ebé Prezidensia Repúblika boking tiha ona US$ 150 mill, ” relata Carmelita.

Lee hotu :   Akademista husu PN tau aas interese povu

Prezidenti Komisaun A ne’e  afirma, osan restu Prezidensia Repúblika nian ne’e, sei sosa ekipamentus eskritória, agua no seluk tan ba servisu Prezidensia Repúblika nian.

Alende ne’e, proponente Adriano do Nascimento, husi bankada PD, mós esklarese, Prezidenti husu osan barak liu kona ba viajen estranjeiru, hodi reprezenta Estadu Timor Leste ba rai liur.

“Ita hotu hatene katak, papel Prezidenti Repúblika kuandu sai ba liur, lori nasaun nia naran. Tanba ida ne’e mak ha’u hanoin katak, importante tebes atu deputadu sira konsidera, tanba nasaun hirak ne’ebé Prezidenti Repúblika atu ba vizita ne’e, importante tebes. Australia hanesan ita hotu hatene, vizita ida ne’e importante, tanba ita iha prosesu negosiasaun fronteira marítima, no vizita Vatikanu mós importante, tanba Timor Leste ne’e, maioria Khatolika, no ba Indonesia mós, Forum ida ne’e importante tebes. Sei osan ne’e ita la aprova, signifika katak, Prezidenti Repúblika labele reprezenta Estadu hodi ajuda hametin liu tan diplomasia polítika iha rai liur,” relata Adriano.

Nia afirma, foin lalais ne’e, Prezidenti Repúblika labele halo vizita ba Portugal no Caboverde, tanba dinámika polítika ne’ebé la’o iha Parlamentu Nasional.

Adriano esklarese, vizita Prezidenti Repúblika nian iha rai laran mós importante tebes, atu Prezidenti Repúblika bele fó esperansa no motivasaun para povu nafatin hola parte ativu iha prosesu dezenvolvimentu rai laran.

Alende ne’e, deputada Virgina Ana Belo husi bankada CNRT, husu ba proponente sira atu esplika, li-liu kona ba orsamentu Prezidenti Repúblika nian ba rai liur.

“Ha’u husu esplikasaun detailladu oituan,  ba iha Nova Iorque ne’e, US$ 220 mill. Ida ne’e ema nain hira mak atu ba, no ba loron hira, nune’e mós ba iha Bali forum ne’ebé loron ida de’it han kedas US$ 100 mill,” katak Ana Belo.

Lee hotu :   Ahi han kios iha Taibesi, MSS alista ona naran vítima

Hatan kona ba ezijensia proponente sira nian ne’e, Ministru Estadu Prezidensia Konsellu Ministru, Agio Pereira hatete, Governu konkorda ho proposta proponente sira nian atu aumenta osan ba Prezidensia Repúblika, maibé la aseita atu hasai osan husi fundu infra-estrutura, tanba fundu ne’e atu benefisia projetu sira ne’ebé halo tiha ona maibé seidauk selu, no projetu sira ne’ebé agora dadauk la’o hela.

“Sei laiha solusaun seluk karik, ita bele uza, maibé ha’u rekomenda, inves ita hasai husi fundu infra-estrutura, fundu ida ne’ebé Parlamentu Nasional rasik mak kria atu kaer projetu sira ne’ebé impaktu direita ba povu nia moris. Projetu barak mak la’o hela de’it, hanesan agua no saneamentu, planu mestre ba estudu ba bee nian, estudu mós hala’o tiha ona atu halo melloramentu ba Hospital Nasional Guido Valadares, Hospital Baucau, konstrusaun edifisiu engeneria nian iha Hera, konstrusaun edifisiu politekniku iha Suai no Lospalos, no academia peskas iha Manatuto no projetu barak tan,” katak Agio Perreira.

Nia afirma, Governu konkorda tiha ona atu hasai milaun US$ 74 husi renbolsa ba kompañia KITAN, husi osan ne’e, milaun US$ 54 atribui ba Orsamentu Jeral Estadu, entaun bele hasai osan husi ne’e ba aumentu Prezidensia Repúblika nian.

Nune’e mós, Primeiru Ministru, Taur Matan Ruak dehan, orsamentu ba viajen Prezidenti Repúblika nian ne’e, Governu konkorda atu aumenta.

“Ha’u hanoin ita aprova uluk proposta orsamentu Prezidenti Repúblika nian, depois mak ita haree, osan ne’e ita atu foti husi ne’ebé,” katak PM Taur.

Alende ne’e, Prezidenti Parlamentu Nasional, Arão Noe mós esplika, osan aumentu ba Prezidensia Repúblika ne’e, alende hasai husi milaun US$ 74 ne’e, sei hasai mós husi proposta balun ne’ebé husu atu hamenus osan.

Lee hotu :   KOMUNIDADE KONTINUA OKUPA AREA LAGOA TASI TOLU

“Ida ne’e signifika katak, ita la bok husi fundu infra-estrutura,” afirma Arão Noe.

Maske iha diferente idea kona ba esplikasaun Governu nian kona ba orsamentu atu aumenta ba Prezidensia Repúblika nian, tanba proponente sira la konkorda atu foti osan husi renbolsa kompañia KITAN nian, maibé proposta Orsamentu ba Prezidensia Repúblika hetan ona aprovasaun husi Parlamentu Nasional ho votu afavor 55, kontra 0 abstensaun 9.cos

Add to Comments Here!!!!

error: Content is protected.
Secured By miniOrange
You might also like:
Forsa Rezerva PNTL Díli baku membru RENETIL

Membru Forsa Rezerva Munisípiu Díli baku...

Opozisaun lamenta Governu duplika orsamentu selu divída

Parlamentu Nasional, (PN) Segunda (03/09), aprova...

PM Taur: VIII Governu sei la fo tan osan ba Igreja  Diocese 3 hetan subvensaun US$6.000.000

Primeiru Ministru (PM), Taur Matan Ruak,...

Close