JavaScript must be enabled in order for you to see "WP Copy Data Protect" effect. However, it seems JavaScript is either disabled or not supported by your browser. To see full result of "WP Copy Data Protector", enable JavaScript by changing your browser options, then try again.

Lian halerik inan faluk Raquela husi laletek Ai-Aras Bobonaro

Lian halerik inan faluk Raquela husi laletek Ai-Aras Bobonaro

Iha idade walu nulu resin rua, nune’e laiha dúvida fuuk nakfilak ona ba mutin no la’o mós neneik los, Nia mak Raquela Bui Sama inan faluk ida, hela iha alide Ai-Aras, suku Soi Lesu Postu Administrativu Bobonaro, Munisípiu Bobonaro.

Hamahan-an, iha uma símples ne’e ho medida lima vezes hitu, kakuluk ho kalen restu, ne’ebé feruijun dadaun.

Foti matan hateke ba uma leten, fatuk sira forma liña loron kalan, hodi hanehan netik kalen tahan ne’ebé la hedi ho besi kusan.

Didin ho au bosan ne’ebé suku ho tali tahan ne’e, hodi satan netik forsa natureza nian, hanesan anin udan no loron nia manas.

Anin hu husi sorin karuk borus to’o sorin lós,  hateke husi sorin lós borus to’o sorin karuk. Tan au fera ne’ebé suku hodi reziste hasoru anin, hahú nakore no lahuk dadaun. Nune’e la biban ba ema iha uma ne’e, atu helik ou haksumik-an husi anin no udan.

La iha odamatan no janela, nune’e ita bele haree no sura, buat hotu ne’ebé iha uma laran, ne’ebé tara forma iha au nia ruin bosan, no namkari iha rai rahun laran ne’e.

Iha klaran ne’e iha deit hadak-oan ida ho medida 180×90 ho multi funsaun. Tanba alénde hodi rai sasan no mós nu’udar fatin ba ama Raquela hodi sadere ulun wainhira kolen no deskansa iha tempu kalan.

Iha hadak okos ne’e manu luhan maibé dala ruma sai mós toba fatin ba Leonel Batu Bere nu’udar ama Raquela nia oan mane.

Iha sorin ne’e au ne’ebé fera no nahe iha rai, nu’udar toba fatin ba Raquela nia oan feto Vírginia José Lelo.

Lee hotu :   ANC husu TT, Telemor-Telkomcel dezliga númeru ne’ebé la rejista

Laiha kuartu ne’ebé bele separa entre kuzina, han fatin ou sala vizita.

Iróniku liu tan membru família husi uma ne’e, nia situasaun moris ne’ebé buat hotu limitadu, maibé infrenta mós moras psikolojia ka moras mentál.

Alénde faluk, inan Raquela ne’ebé idade avansada ona no infrenta problema mentál mós, maibé obrigadu tenke asume nafatin responsabilidade nu’udar xefe família ba oan rua Virgínia ho Leonel ne’ebé ho moras hanesan. Laiha família ne’ebé besik sira hodi rona netik sira nian tanis no halerik.

To’o ohin loron família ne’e mós seidauk hetan tulun ruma, husi instituisaun sira ne’ebé servisu ba apoiu humanitária, liu-liu Governu.

Maski Governu liu husi Ministériu Solidaridade Sosiál, kria ona diresaun ida ne’ebé responsabiliza hodi implementa no halo promosaun ba programa, fó asistensia sosiál reinsersaun komunitária, fó apoiu humanitária ba sira ne’ebé konsidera dezafavoresida, vulnerável sira no ema sira ne’ebé mak iha limitasaun material no mós ba ema sira nebe iha problema mentál.

Maibé programa Governu ne’e, seidauk konsege kobre ba ema hotu iha territóriu Timor Leste,inklui inan faluk Raquela Bui Sama ho nia oan sira.

Loron koalia ba kalan, kalan haktuir ba fulan, fulan halerik ba tinan,  nune’e inan Raquela Bui Sama, nia situasaun moris konsege deskobre iha tinan 2016, wainhira Governu implementa programa rejistu saúde na família, iha aldeia Ai Aras, suku Soi Lesu Postu Administrativu Bobonaro, Munisípiu Bobonaro.

Nune’e Diretór Sentru Saúde Munisípiu Bobonaro Agapito Bere Sai identifika, kondisaun família ne’e kategoria iha grupu dois no kuartu, konaba saúde mentál, nune’e hetan kedas asisténsia saúde.

“Ami identifika iha tinan 2016. Ami hetan no identifika família ida ne’e iha rísku no kategoria problema saúde mentál. Inan ne’e tama iha grupu dois no oan feto, oan mane tama iha grupu kuartu.  Esforsu ne’ebé ami halo mak, ami kontaktu ba responsável saúde mentál hodi mai haree no fó aimoruk. Maibé aimoruk ne’e la kontinua, tanba laiha família ida mak besik no ba foti aimoruk hodi hemu kontinuasaun. Difikuldade mak dalan. Tanba dalan ladi’ak entaun dala ruma ami mai, dala ruma ami labele mai entaun ami husik hela deit”, Agapito Bere Sai haklaken.

Lee hotu :   CVTL entrega kareta ba rejiaun 4

Alénde fó tratamentu Sentru Saúde Bobonaro hamutuk ho grupu organizasuan Rede Feto Munusípiu Bobonaro, transporta kedas Raquela ho nia oan rua mai Munisípiu Bobonaro hodi trata sira nia dokumentu hanesan sertidaun no kartaun eleitorál.

Ddokumentu hirak ne’e sira entrega ba Ministériu Solidaridade Sosiál, ho intensaun ministériu tutela, bele ajuda família ida ne’e, maibé to’o ohin loron seidauk iha rezultadu.

Maski nune’e ho sentidu humanu, membru organizasaun Rede Feto Postu Administrativu Bobonaro, Santina Natália Martins foti inisiativa hodi fó netik apoiu ba família Raquela tuir ninia kapasidade ekonomia.

Maibé ba kontinuasaun ezisténsia moris família ida ne’e nian, Santina Natália Martins, husu ba Governu atu toma responsabilidade, hodi tau matan ba sira.

“Ami husi organizasaun Feto, ha’u rasik mak mai haree ho matan. Ha’u haree nia moris realidade nia ferik liu ona. Nu’udar humanu, ita iha fuan nune’e ha’u sempre mai, fó netik buat ruma ne’ebé ha’u iha. Dala ruma ha’u mai lori ho fos, supermi kafé no masin midar, nune’e ferik (Raquela) konsidera ha’u (Sasntina) hanesan nia oan rasik ona, nune’e buat ruma ne’ebé nia sente falta ka presiza ha’u, nia sempre hameno tuir ema ba bazar, para ha’u bele mai. Maibé haree ninia kondisaun uma ne’e, kuitadu ha’u labele halo buat ida, no ami grupu feto mós labele halo buat ida”, Santina Natália haktuir ho matan ween.

Raquela moris iha tinan 1931, ne’ebé oras ne’e dadaun moris hamutuk ho nia oan rua, iha lidun husi Kapital sidade Bobonaro ne’e, karik la halo ema seluk preokupa lor-loron no halo interupsaun ba ema seluk nia atividade, tanba situasaun moris realidade ne’ebé sira infrenta ohin loron.

Lee hotu :   ESTATAL-SEMA lansa polítika no programa pilotu resiklajen lixu

Susar eh terus, hamlaha eh hamrook, loron ba loron, Raquela ne’ebé faluk desde nia katuas oan mate iha tinan 1972, hamutuk ho nia oan rua, sira sempre simu realidade ne’e ho hamnasa no haksolok.

Maibé inan kbiit laek, hamutuk mho nia oan rua ne’e, bele bolu netik ita nia atensaun,  liu-liu governu atu loke matan liu tan, hodi buka hatene Raquela sira seluk ne’ebé sei namkari iha territóriu tomak, ne’ebé durante ne’e seidauk sente tulun husi Estadu.GMN

Add to Comments Here!!!!

error: Content is protected.
Secured By miniOrange
You might also like:
PM Taur Matan Ruak: Veteranus seidauk fó kontribuisaun másimu ba dezenvolvimentu nasionál

Primeiru Ministru, Taur Matan Ruak, hatete...

PR Lú Olo : Estadu presiza veteranu sira atu sai ezemplu ba jerasaun foun

Estadu presiza luta-nain sira atu sai...

DIA 03/03/19 || GMNTV LIVE STREAM || JORNAL NASIONAL KALAN

Close