PM Taur Matan Ruak: La fásil rezolve problema dezempregu

Primeiru Ministru (PM), Taur Matan Ruak, hateten, foin tinan sanulu resin hitu restaurasaun independénsia Timor-Leste nian, la fásil ba governu atu rezolve  hotu kedas problema dezempregu iha rai laran.

Xefe governu núdar mos eis gerileiru, Taur Matan Ruak, hateten kestaun ne’e hafoin hasoru malu ho prezidente repúblika, Francisco Guterres ‘Lú Olo’, iha Palasiu Prezidensiál Nicolau Lobato Bairo Pité Díli, Kinta (05/09/2019).

Primeiru Ministru, Matan Ruak, hatete atu rezolve asuntu kampu traballu ba joven sira ne’e la fasil ba nasaun ida foin hamriik  hanesan Timor-Leste ne’ebé foin restaura nia Independesia. Maske nune’e xefe  governu ne’e promete sei halo esforsu oi-oin atu kria kampu traballu ba foinsa’e sira iha rai laran.

“Ita halo esforsu para ita kria, só que la fasil ba nasaun ida tinan sanulu resin hitu, gampang karik ita rezolve tiha tempu kleur ona e la’os agora, ne’ebé ita halo esforsu nafatin,” hateten PM, Taur Matan Ruak.

Antes ne’e  liu husi diskursu xefe Estadu nian iha ámbitu selebrasaun tinan 20 konsulta popular 30 de agostu tinan ne’e iha Tasi Tolu, preokupa ho situasaun ekonomia rai laran ne’ebé la’o hakdasak, nune’e joven sira tenke ba servisu no buka moris iha rai liur  hanesan Englatera, Irlanda, Korea no Austrália.Ito