Virgilio Hornai: DIAK LIU BOLSEIRU TL IHA CABO VERDE LORI FILA

Prezidenti Komisaun F Parlamentu Nasional (PN), trata asuntu edukasaun, saúde, Virgilio Hornai, konkorda atu lori fila bolseiru Timor-oan iha Cabo Verde mai Timor-Leste.

“Ha’u hanoin opsaun  atu lori fila bolseiru  ne’e diak liu, apoiu desizaun Ministériu Edukasaun (ME) ne’ebé hakarak deporta estudante Cabo Verde fila-fali mai Timor-Leste, tanba la fasil transfere bolseiru husi nasaun ida ba nasaun seluk,”dehan prezidente komisaun F, ne’ebé toma konta ba asuntu saúde, kultura, veteranus, igualdade jèneru  no edukasaun, deputadu Virgilio Hornai, ba jornalista sira iha uma fukun parlamentu nasional, Tersa (08/08/2017). “Mai iha ne’e para kontinua fali iha universidade sira ne’ebé iha ita-nia rai laran hanesan UNTL, doque transfere fali ba nasaun seluk iha nasaun CPLP, hanesan Portugal, ne’e la fasil,”dehan tan Hornai. Tuir Virgilio, Estadu iha nia estratéjia no mekanizmu atu rezolve problema ne’e. Maibe presiza espasu tempu ne’ebé naruk hodi tetu. “Ha’u rasik husi inisiu rona problema ne’e haruka kedas karta ida ba Ministériu Edukasaun para rezolve, maibe rezolve la’os hanesan problema partikular, ne’e presiza halo akordu ho universidade ne’ebé bolseiru sira atu eskola ba, situasaun la permite ne’e la loos, dalaruma sira trauma de’it, tanba ema grupu deskoñesidu sira atake no baku sira nia kolega ne’e,   Cabo-Verde nia problema sosial  mós aas, tanba sira- nia nasaun  númeru dezempregu boot, ne’eduni kontribui ba dezordem maka’as, sira maka tenke hatene,”haktuir deputadu husi bankada PD ne’e.

Membru parlamentu nasional ne’e rekomenda ba Governu foun mai atu bele buka solusaun ne’ebé diak ba bolseiru Cabo Verde, hodi labele prejudika sira-nia estudu. Tuir, deklarasaun husi estudante bolseiru Timor-oan iha Cobo Verde ne’ebé GMN hetan asesu katak,  bolseiru hirak ne’e sei la hili opsaun rua ne’ebé hatete, ‘deporta fali mai Timor ka kontinua eskola’ ne’ebé Ministru Edukasaun António da Conceição fo ba sira, tanba konsidera  opsaun rua ne’e iha nia impaktu negativu bo’ot ba futuru bolseiru sira nian. Enkuantu, Ministru Edukasaun, António da Conceição, liu husi entrevista eskluzivu iha estudiu GMN TV hatete,  Ministériu Edukasaun laiha tan opsaun seluk atu fo ba bolseiru sira, enkuantu bolseiru sira lakohi hili opsaun kontinua eskola iha Cabo Verde, Ministériu Edukasaun tenke hapara kontratu no lori fila-fali sira mai Timor.Say