TL Hahu’u anu letivu 2018, Ema hotu tenki iha responsabilidade ba edukasaun

Ministru Edukasaun, Fernando Hanjam, hateten, Timor-Leste (TL) hahu’u prosesu aprendisazen anu letivu ba tinan 2018, tanba ne’e husu ema hotu tau as responsabilidade, atu nune’e edukasaun bele la’o ho susesu iha tinan ne’e.

“Ita nia tinan letivu foun 2018 ninian, ho missa ida ne’e, ita atu husu grasa aman maromak nian, para nia bele akompaña ita hahú husi inisiu to’o nia rohan, no ha’u- nia mensajen, ida-idak tenki responsabiliza funsaun no kna’ar, nune’e ita bele atinji ita-nia hakarak,”dehan Ministru Edukasaun Fernando Hanjam, ba jornalista  sira  hafoin asisti hotu misa solene tinan letivu 2018, Sabadu (13/02/2017) iha Parokia Imaculada da Conceição, Catedral, Dili.

Dirijenti masimu  Ministeriu Edukasaun ne’e husu ba profesor sira tenki hanorin estudante sira ho responsabilidade  no respeitu hirarkia, no mos ba estudante sira, iha kna’ar atu estuda no estuda hela deit, hodi to’o ikus bele hetan buat ne’ebé ema hotu hakarak, nune’e lori hakarak refere atu dezenvolve nasaun ida ne’e.

Iha misa ne’ebé ladun hetan patisipasaun masimu husi eskola publiku sira, Ministru ne’e, senti ladun kontenti.

“Klaru karta konvite husi Ministeiru Edukasaun la iha ba eskola, mai ha’u orienta ona ha’u-nia ekipa tomak, para fo avizu ba eskola hotu hotu mai partisipa, no agora razaun, tambasa mak estudante sira ne’e la partisipa, ida ne’e razaun prinsipal ida idak ninian, no ita la bele obriga sira, no ita espera katak  tinan oin mai tan bele furak liu tan,”dehan Fernando.

Entretantu Bispu Dioseze Dili Dom Virgílio do Carmo da Silva Sdb hatete, molok atu hahú tinan letivu 2018, nuudar  nasaun ne’ebé maioria Katoliku, hakarak hahú tinan ida ne’e fo hanoin ba estudante no profesor sira, buka hahú prosesu aprendijazen ho maromak nia tulun.

“Wainhira ita ho maromak  nia tulun, buat hotu sei la’o ho diak, katak maromak sei gia no orienta ita-nia alunu sira, labarik, foinsa’e no sarani sira hotu la’o tuir maromak, no liu-liu kristu mak sai hanesan  mestri  ba ema hotu ne’ebé mak bele deskobre buat ne’ebé los,”dehan Dom Virgílio.Oly