Kaixa Rakambia apoiu SEAV lori KV halo juramentu

Kaixa Ramelu Kablake no Matebina (Rakambia) apoiu desizaun Sekretária Estadu Asuntu Veteranus (SEAV) ne’ebé lori ekipa Komisaun Verifikador (KV) ba juramentu iha Jardim dos Herois Metinaro, antes hala’o verifikasaun ba dadus kombatentes no veteranus ba faze segundu nian.

“ Ami apoiu másimu esteitmentu ne’ebe hato’o husi Sekretáriu Estadu Asuntu Veteranus no Prezidente Komisaun Homenagem, ne’ebé fó sai ba públiku katak, sei lori komisaun verifikador ba juramentu iha Jardim dos Herois Metinaro”, afirma responsável Kaixa Rakambia, José Nuno Lopes ‘Sabarai’, liuhosi konferensia imprensa, Sesta (11/10/2019) iha Bairo-Pite Díli.

Iha okaziaun ne’e responsável kaixa rakambia rekomenda ba Sekretáriu Estadu Asuntu Veteranus no Prezidente Komisaun Homenagem no mós veteranus no kombantentes libertasaun nasionál, ne’ebé simu ona kondekorasaun no kompensasaun husi Estadu Timor, hahu husi tinan 2005 to’o ohin, atu partisipa mos iha juramentu ne’ebé hanesan iha Jardim Metinaro .

“ Kaixa Rakambia mos hakarak hato’o lamentasaun ba SEAV, kona-ba lamentasaun regras ou kritéria verifikasaun dadus nian, liu-liu kona-ba ema sira ne’ebé atu pasa ba iha dedikasaun esklusiva hanesan, tenke iha hetan dadur, tenke estafeta, hetan desteradu, tenke hetan prizaun preventiva durante tinan 4 no tenke sai hanesan responsável kaixa postu kargu sira seluk, dehan José Nuno Lopes.

Nia dehan, kreteria hirak ne’ebé SEAV iha la kondis ho realidade partisipasaun rejistensia iha tempu pasadu, ho razaun katak se ema hotu sai estafeta mak funu iha Timor, sei la lori tempu naruk durante tinan 24 nia laran, alende se ema hotu tama kadeia mak se mak atu kontinua funu.

“ Ho razaun hirak ne’e, ami husi Rakambia solisita ba iha SEAV no Prezidente Komisaun Homenagem, atu hare didiak kritériu hirak ne’ebé ami mensiona hodi labele prejudika joventude rezistensia sira nia luta iha libertasaun partia,”haktuir nia. Fel