PNDS-YBT kapasita ema ho defisiensia Timor-Oan iha Kupang

Programa Nasional Dezenvolvimentu Suku (PNDS) Timor-Leste, servisu hamutuk ho Yayasan Bintang Timur (YBT) Kupang-Indonesia fó formasaun ba ema ho defisiensia Timor-Leste iha kupang.

“Ita nia maluk sira ho limitasaun fíziku bele asesu ba iha fatin ne’ebé bele fó atendimentu, direitu ema ho defisiensia, nune’e formasaun ne’e hanesan oportunidade ida, tanba ita haree ba situasaun durante ne’e, Yayasan Bintang Timur (YBT) sira fahe experensia ne’ebé mak iha”, Xefi Unidade Operasional PNDS Timor-Leste, Marcio Jeane Marçal ba GMN iha salaun Oematinis, Kupang-Indonesia, Segunda (14-10-2019).

Marcio esplika, formasaun ne’e ninia intensaun atu haree kondisaun no oinsa mak bele hetan experensia no faktu hodi bele kompleta malu.

“Materia tolu ne’ebé mak iha, ita presija hakle’an liu tan ita nia koñesementu ba maluk sira ho defisiensia ne’ebé mak limitadu, hanesan atu hatene liu tan kona-bá atendimentu públiku, tanba dalabarak ko’alia presiza asesibilidade atendimentu públiku tenki iha, atu nune’e sira mós bele hetan atendimentu ho di’ak”, tenik Xefi Unidade Operasional PNDS Timor-Leste ne’e.

Formasaun ba ema ho defisiensia ne’e oradór mai husi YBT fahe experensia kona-bá dezenvolvimentu ema ho defisiensia husi YBT ba ema ho defisiensia husi Timor-Leste.

Ema ho defisiensia husi Timor-Leste na’in 6 mak tuir formasaun durante loron lima (5), husi loron 14 to’o 18, fulan ne’e. formasaun ba loron primeiru ko’alia kona-bá material atendimentu, asesibilidade no infraestrutura ba ema ho defisiensia atu asesu. ety