Jose Luis Oliveira kritika assesor prinsipál sira “Troka membru governu laiha kapasidade”

Diretór Asia Justice and Rights, José Luis Oliveira kritika eis ministru sira nebe dadaun nee sai assesor prinsipal iha ministeriu sira, tanba uluk sira nia tempo sai ministru uza assesor internasional bar-barak, maibe agora sira sai assesor prinisipal hodi manan osan boot liu salariu Prezidente Republika nian.

”Hau dehan ba imi eis ministru sira uluk sai ministru de’it laiha kapasidade ne’e mak uza asesór bara-barak nusa mak sira sai fali asesór prinsipal iha ministériu ne’e sai at liután”, dehan José Luis Oliveira ba JNDiario, Tersa (19/11), iha nia servisu fatin Farol Díli.

José Luis Oliveira hatete nia rona informasaun katak ema nebe foin akaba eskola sekundariu mos sai assesor.

“ Hau sente komik oituan uluk sira ministru sira mós servisu depende ba asesor sira ,signifika katak,sira nia kapasidade tékniku mós limitadu agora sira la ministru tiha sira ba eis ministru sira ne’ebé  asesór prinsipal iha ministériu ne’ebé mak manan osan bo’ot liu fali Prezidente Repúblika ne’e uniku akontese iha Timor-Leste katak,ema númeru um simu osan ki’ik asesor prinsipal nia osan mak bo’ot liu fali Prezidente ne’e la lojika. Asesór ne’e ema ne’ebé mak iha kapasidade no matenek ho nia tekniku balun ne’ebé relevante ho ministériu sira ne’e ,labele asesor ne’e ita rekruta ema arbiru de’it. Hau rona katak,ema balun  foin akaba de’it eskola sekundariu mak sai asesor  ida ne’e sala no ita gasta de’it osan estadu ,tamba osan minarai ne’e loron ba loron komesa tun bebeik  no ita nia reseitas domestik seidauk aumenta ne’e politiku ida ne’ebé la los tuir lolos asesor iha ministériu ema nain 2 to’o 3 ne’e maxímu ona”, dehan José Luis Oliveira.

Konaba remodelasaun governu, nia parte husu ba Primeiru Ministru Taur Matan Ruak, atu troka ministru ho Sekretáriu Estadu sira ne’ebé laiha kapasidade, tamba ne’e hamout povu nia osan de’it.

“Iha ministériu ida mak asesor nain 5 ba leten ne’e signifika ministru ka ministra ne’e laiha kapasidade ema hili ka nomeia ministru ho ministra ne’e tenki iha kapasidade ,integridade,no lideransa  hodi ba lidera funsaun públika iha kada ministériu ne’e fó impaktu ba  orsamentu minarai mohu lalais”, dehan  nia

Konaba informasaun iha  Oitavu Governu iha assesor barak teb-tebes nee, nia parte husu ba Xefe Governu tenki toma atensaun.

Tuir José Luis Oliveira katak ideal liu maka kada ministériu  presiza assesor nain 3, maibé realidade ne’ebé akontese iha ministériu balun ,asesór foin remata eskola sekundáriu mós iha.

Politiku Oitavu Governu nian ne’ebé forma ho ninia estrutura bo’ot ne’e, José Luis Oliveira, konsidera ne’e hakarak fahe priviléjiu ba malu.Tos