Reprezentante Organizasaun Nasaun Unida (ONU) sei fó asisténsia ba Eleisaun Prezidénsial (ElPrez) no Eleisaun Parlamentár (ElPrez) ne’ebé Timor-Leste sei relaiza iha tempu badak.

Vise Prezidente Parlamentu Nasionál, Luis Roberto, hatete, reprezentante hosi ONU ne’e husu atu akompaña prosesu tomak durante eleisaun, nune’e bele garante liberdade iha festa demokrasia rua ne’ebé sei mai, maske nasaun hasoru hela COVID-19.

“PN mós nu’udar uma demokrátiku, hakarak duni prezensa hosi ONU nian atu halo assisténsia ba eleisaun ne’ebé mak atu maim, komesa hosi Eleisaun Prezidensiál iha tinan oin mai to’o Eleisaun Parlamentár, fi’ar katak ho sira nia asisténsia ne’e, bele hadi’a di’ak liutan hodi evita fraude eleitorál ne’e, iha nasaun demokrátiku hanesan Timor-Leste,” relata vise PN, Luis Roberto ba jornalista hafoin hasoru malu ho reprezentante hosi ONU iha sala konferénsia PN, Kuarta (20/10).

Eleisaun Prezidensiál ne’e sei hala’o iha inísiu tinan 2022 no Eleisaun Parlamentár sei hala’o iha tinan 2023.Say

Prezidente Komisaun C, ne’ebé trata asuntu finansa públika, Parlamentu Nasionál (PN), Maria Angélica Rangel, relata, Komisaun C aprova ona kalendáriu atu halo audiénsia ho Governu no instituisaun Estadu sira kona-bá proposta Orsamentu Jerál Estadu (OJE) ba tinan 2022.

“Ohin (Horiseik) ami halo aprovasaun kalendáriu iha komisaun, komesa iha dia 4 de Novembro, sei bolu membru Governu sira mai, antes de audiénsia, komisaun mós sei organiza panorama semináriu orsamentál, halo iha Tibar, iha dia 27, 28 no 29, hamutuk ho parseiru sira, atu mai esklarese panorama orsamentu em jerál ba iha deputadu sira, liu-liu komisaun C atu haree ba iha OJE 2022 nian, presiza loron 3 ami halo semináriu, nune’e komesa dia 4 sei bolu instituisaun relevante sira mai iha PN, atu hodi diskute kona-bá sira-nia ezekusaun, no kona-bá sira-nia preparasaun orsamentu ba tinan 2022,” dehan deputada ne’e, resintu PN, Kuarta (20/10).

Kaledáriu orsamentál ne’ebé Komisaun C  aprova ne’e, sei termina diskusaun ba OJE 2022 ne’e finál globál iha loron 17, no redasaun finál iha loron 20, fulan Dezembru tinan ne’e.

“Sei hato’o ba Prezidente PN, depois Prezidente PN mak sei haruka ba Prezidente Repúblika depois dia 20. Proposta ne’e mai ho karaktér normál, signifika ami sei diskute durante fulan ida nia laran” tenik.

Proposta Orsamentu ne’ebé Governu propoin hamutuk montante billiaun USD 1.675, kompostu hosi saláriu vensimentu, bens servisu, transferénsia públika, kapitál menór, no kapitál dezenvolvimentu.

OJE 2022 ne’e Konsellu Ministru (KM) aprova montante billiaun USD 1.675. Husi montante ne’e, Governu aloka millaun USD 223 ba saláriu no vensimentu, millaun USD 449,8 ba bens no servisu, millaun USD 565,9 ba transferénsia públika, millaun USD 24,4 ba kapitál menór no millaun USD 401,7 ba kapitál dezenvolvimentu.

Orsamentu por programa ne’e, sei uza hodi finansia programa 45, liu hosi programa prioridade neen kompostu setór produtivu sira, hanesan Agrikultura, Turizmu, Ambiente no Konetividade ho alokasaun porsentu 27, Abitasaun no Inkluzaun Sosiál porsentu 22, Boa Governasaun porsentu 12, Dezenvolvimentu Kapital Umanu porsentu 10, Dezenvolvimentu Rurál porsentu 3, Dezenvolvimentu Setór Privadu porsentu 0,5, no ba funsionamentu mákina Estadu, hetan alokasaun porsentu 18 no atividade seluk porsentu 8.Say/Ben

Konsellu Ministru (KM) iha reuniaun Kuarta (20/10) ne’e, propoin tan ba Prezidente Repúblika (PR) atu renova Estadu Emerjénsia (EE) ba loron tolu nulu tan.

Rekomendasaun ne’e, KM bazeia ba aprezentasaun sira pontu situasaun epidemiolójika husi Sentru Integradu Jestaun Krize (SIJK), kona-ba situasaun COVID-19 no variante SARS COV-2 iha Timor-Leste.

“KM deside atu renova Estadu Emerjénsia ba fulan Novembru, ne’ebé iha fula oin mai sei iha EE, EE sei kontinua estende, maibé iha medida sira ne’e, medida ezekusaun mak depois Governu sei ajusta fali ho situasaun iha ita nia rai laran,” informa Ministru Prezidensia Konsellu Ministru (MPKM) Fidelis Manuel Leite Magalhães, iha hafoin remata reuniaun KM, iha Palásiu Governu.

No Governu nafatin apela ba komunidade ne’ebé seidauk simu vasina COVID-19, atu hakbesik ba sentru no postu saúde sira hodi hetan vasina husi pesoál saúde sira. Tanba vasina mak dalan diak ba kombate corona vírus.

Atualmente EE ba dala 18 nian sei vijente hela, tanba ne’e sei remata iha loron 29, fulan Outobru, tuku 11:59 kalan, no hafoin ne’e EE ba dala 19 tama vigor iha loron 30, fulan Outobru oras 00:00 kalan, bainhira Parlamentu Nasionál (PN) autoriza ona Xefe Estadu atu dekreta EE ne’e.

Atualizasaun husi SIJK kona-ba kazu COVID-19 to’o loron 20, fulan ne’e, rejistu kazu foun hamutuk 16, númeru ne’e husi Díli iha kazu foun 14, Munisípiu seluk hamutuk 2, kazu rekuperadu 3, kazu ativu 86, kazu komulativu konfirmadu 19.746 no kazu óbitu hamutuk 20.Ags

Ministru Prezidénsia Konsellu Ministru (MPKM), Fidelis Manuel Leite Magalhães, hatete, Governu sei aplika medida rigorozu ba sidadaun sira ne’ebé la vasina, sei la la’o livre iha selebrasaun Finadu, ne’ebé kada tinan sempre selebra iha loron 2, fulan Novembru.

“Konsellu Ministru toma nota ona, ita tenke iha medida ruma atu antesipa, mas por em quanto apelu mak ne’e, hakarak buat hotu normál tenke ba vasina, se hakarak atu iha Finadu movimentu sira laiha interrupsaun iha selebrasaun sosiál, kulturál sira normál, entaun favor ida ba vasina, tanba Governu sériu ho apelu ida ba vasina ne’e,” apela Fidelis Magalhães, hafoin remata reuniaun Konsellu Ministru (KM) iha Palásiu Governu, Kuarta (20/10).

Medida ne’ebé atu aplika iha loron mate-bian ne’e, atu evita transmisaun corona vírus ba ema seluk.

Dadus vasinasaun ne’ebé atualiza husi Ministériu Saúde (MS) to’o loron 20, fulan ne’e hatudu, populasaun ho idade 18 ba leten ne’ebé simu ona vasina kontra COVID-19 doze dahuluk hamutuk 520.674 reprezenta porsentu 69.0, no vasina doze daruak hamutuk 335.787 reprezenta porsentu 44.5.

Husi Munisípiu nian, Covalima mak númeru primeiru taxa vasinasaun atinje porsentu 85.0, Viqueque porsentu 83.5, Díli porsentu 80.3, no Munisípiu sira seluk no RAEOA nia taxa vasinasaun foin atinje husi porsentu 50.0 to’o 77.9.

Munisípiu ne’ebé persentanjen vasina atinje ona 80, tuir promesa Primeiru Ministru nian katak, Governu sei aplika uluk Nova Normalidade ka New Normal, nune’e populasaun sira bele la’o livre.

Antes ne’e mos Xefe Governu Taur Matan Ruak no mos Xefe Suku sira lansa ona “ameasa” katak, populasaun ne’ebé la simu vasina mak sei la simu osan terseira idade no mos la simu osan veteranu.Ags

Komandante Jerál (KomJer) Polísia Nasionál Timor-Leste (PNTL), Komisáriu Faustino da Costa, hatete, membru Faustina Saldanha Cardoso, demite antes ona husi instituisaun PNTL, hafoin Polísia Sientífika Investigasaun Kriminál (PSIK) hala’o detensaun ba nia.  

Faustina Saldanha Cardoso Konsellu Susperior PNTL, demite ona iha loron 23, fulan Jullu, tinan 2021, no fila ona ba vida sivíl.

“Ha’u hakarak hateten hanesan ne’e, loos duni ema ne’e uluk membru PNTL, maibé antes PSIK ezekuta mandadu ba nia, PNTL liu husi Konsellu Superior reuni tiha ona aprezenta proposta ba Governu demisaun, entaun Ministru Interiór hasai ona despaixu demisaun  ba nia antes PSIK ezekuta mandadu, ne’ebé nia hanesan sidadaun bain-bain, nia eis membru PNTL,” esplika Komandante Jerál PNTL Komisáriu Faustino da Costa, ba jornalista sira Tersa (19/10/2021), iha Kuartel Jerál PNTL  Caicoli, Díli.

Faustina Saldanha Cardoso, tuir ona julgamentu iha Tribunál Distritál Díli  iha  Segunda (18/10/2021). No Tribunál aplika pena prizaun defenitivu tinan haat ba Faustina Saldanha Cardoso, tanba faktu ne’ebé Ministériu Públiku (MP) aprezenta ba Tribunál provadu krime Burla Agravadu no Falsifikasaun Dokumentu. No dadauk ne’e, kumpri hela pena iha prizaun Gleno.avi

Eis Komandante Em Xefe FALINTIL, Kay Rala Xanana Gusmão, hatete, jogu amizade entre FALINTIL- Forsa Defeza Timor-Leste (F-FDTL) ho INTERFET nu’udar istória ida ba jerasaun foun sira atu labele haluha no mós atu hametin amizade.

Jogu amizade ne’e realiza iha Estádiu Munisipál Díli entre F-FDTL ho INTERFET ne’e atrai tebes adeptu sira. Jogu amizade hanesan ne’e tinan-tinan sempre hala’o atu relembra istória “moruk” ne’ebé akontese liu ona hafoin Indonéziu husik Timor-Leste, hafoin halo okupasaun durante tinan 24.

Iha jogu ne’e, ekipa rua ne’ebé reforsa husi jogadór prinsipál sira lansa kontra atake ba malu, maske la’ós mai ho esperiénsia jogadór, maibé ekipa rua orgullu tebes. Iha jogu ne’e F-FDTL manan INTERFET ho eskor 4 A 0.

“Inisiativa kapás teb-tebes husi INTERFET hamutuk ho F-FDTL atu fó lembra nafatin ba ita hotu katak, paz, amizade, kooperasaun mak tenke guia relasaun entre paízes. Iha INTERFET la’ós deit Austrália, iha Nova Zelándia, iha Portugal, iha Amérika, ne’eduni multilateralizmu ida ne’e kapás teb-tebes. Ha’u sente katak, ita sei husu nafatin ba INTERFET atu hala’o nafatin tinan-tinan hodi bele ajuda mos rai sira seluk ne’ebé sei iha konflitu, atividade hanesan ne’e hodi lembra istória, sira ne’ebé halo istória sei moris ne’e. ida ne’e di’ak teb-tebes atu hanorin ita-nia jerasaun para labele haluha,”dehan Xanana iha Estádiu Munisipál Díli, Segunda (18/10).Nes

Diretór Ezekutivu Asia Justice and Rights (AJAR), José Luis Oliveira, hatete, ró Berlin Ramelau to’o agora Governu seidauk konklui pagamentu ba empreza ne’ebé fábrika, mesmu prosesu konstrusaun termina ona. Tanba ne’e AJAR konsidera Governu laiha kapasidade hodi jere orsamentu ne’ebé iha.

“Mai ha’u ida ne’e lamentavel tebes, tanba Governu ida ne’e laiha kapasidade atu halo jestaun ba orsamentu ho diak,” dehan, José Luis Oliveira, ba JNDiário Tersa (19/10) iha Farol-Díli.

Nia subliña, bainhira Governu la esforsu hodi termina prosesu sira kona-ba ró ne’e maka, governante sira lakon sira nia sentidu responsabilidade ba povu no nasaun.

Sosiedade Sivíl ne’e kestiona kona-ba paradeiru ró Haksolok ne’ebé nia prosesu ne’e la’o hahú kedas iha tinan 2014, maibé to’o agora Governu seidauk iha esforsu ruma atu termina prosesu konstrusaun ró ne’e nian. Tanba fábrika ró Haksolok ho nia kustu ne’ebé iha, Governu aloka osan hamutuk euro millaun 13.7.

“Ha’u la hatene sira iha sentidu responsabilidade ka lae? Ne’e osan povu nian, povu nia osan, ema sira ne’ebé selu taxa fulan-fulan ne’e sira nia osan, sira nia sentidu responsabilidade ne’e iha ne’ebé, ida ne’e mak prioridade mai ita atu preokupa ne’e mak ró Haksolok” tenik.

Iha Segunda ne’e, Prezidente APORTIL relata, parte Governu Alemaña nian halo pagamentu, nune’e hela deit montante osan rihun USD 142. No Governu TL hela Euro Milaun 3.5, ka Milaun USD 4.

Projetu konstrusaun ró pasajeiru nasionál daruak ne’e finansia husi Governu Timor-Leste hamutuk Euro 7.1, no Governu Repúblika Federál Alemaña Euro 7.8.

Ró Berlin-Ramelau konstrui iha Xina, husi empreza Armadora husi Olanda ho naran Damen Shipyards ho nia luan metru 16, kaladu metru 3,3, naruk metru 67,3, konvés ho aas metru 4,8 no sei atinje velosidade másima nós 10 to’o 12. Ró foun ne’e sei troka Nakroma no iha kapasidade ida atu tula ema 380 resin.Fel

Ministériu Obras Publikas (MOP), Diresaun Nasionál Estrada, Ponte Kontrolo no Cheias, hasai despaisu ida hodi fó ultimatu ba komunidade ne’ebé hela iha Rai-Kotu atu hahamuk fatin ne’ebá, tanba Governu atu hahú ona projeitu alarga estrada Diresaun Rotunda Prezidente Nicolau Lobatu to’o uma adat Tasi-Tolu.

Despaisu ho númeru referénsia 248/ DGOP/ DNEPCC/ VII/ 2021/ hasai iha loron 17 fulan Agostu tinan ne’e, ho prazu semana rua atu komunidade afetadu iha Rai-Kotu, hamamuk sira nia hela fatin, maibé fulan Outubru ne’e atu remata ona, MOP seidauk ezekuta despaisu ne’e.

Xefe Suku Madohi, Bernardino de Cristo Ferreira, hatete, família uma kain 140, sei kontinua okupa aldeia Tera-Santa, tanba Governu laiha asaun fizika iha terrenu, nune’e evita ema seluk ba okupa fali fatin ne’e.

“Família sira ne’e sei okupa fatin ne’e, tanba Governu seidauk mai loke estrada ne’e halo luan, maske familia uma-kain 140 simu ona kompensasaun, sira la’os atu lakohi sai, maibé sira prontu koopera ho Governu, maibé hahú husi simu kompensasaun mai to’o ohin loron Governu mos nonok ona entaun sira mós kontinua hela hodi fa’an, razaun prinsipál ba okupante sira mak ne’e, sira sai uluk tiha mak ema seluk mai okupa tan, Governu bele selu tan kompensasaun, tanba ne’e mak sira seidauk husik fatin ne’e, banhira MOP seidauk halo estrada ne’e,” esplika Xefe Suku Madohi, ba GMN, Tersa (19/10).

Autoridade lokál ne’e esplika, banhira Governu muda sira sai husi fatin ne’e tenki halo duni estrada, nune’e labele abandona fatin ne’e, hodi ema seluk okupa fila-fali.

Familia uma kain 140 ne’e simu kompensasaun husi Governu iha tinan 2019-2020, maibé sei kontinua nafatin akupa fatin refere, tanba sei hein Governu nia asaun fízika ba konstrusaun estrada.

Kompensasaun ba hela fatin, Governu fó tuir klasifikasaun, mak hanesan Uma ho klasifikasaun A hetan osan USD 110.00 kada metru kuadradu (USD 110/m2), Uma ho klasifikasaun B hetan osan 80 dolar kada metru kuadradu (USD 80/m2 no uma ho klasifikasaun C hetan osan USD 40 dolar kada metru kuadradu (USD40/m2).Tos

Deputada bankada CNRT, Virgínia Ana Belo, konsidera, Governu bosok povu Oe-cusse ho Ataúro kona-ba transporte marítima Berlin Ramelau, tanba antes Ministru Transporte no Komunikasoens (MTK), José Agustinho da Silva, promete, ró Berlin Ramelau sei to’o Timor-Leste (TL) iha fulan Outobru tinan ne’e, hodi substitui ró Nakroma.

“Tuir informasaun anterior katak ró Berlin Ramelau ne’e sei to’o iha TL iha fulan Setembru, maibé realidade diresaun sira iha APORTIL hatete katak, ró ne’e seidauk bele mai iha ne’e, tanba Governu seidauk selu, mais informasaun sira iha fulan kotuk ne’e hatete katak, ró ne’e iha tiha ona dalan, mai tiha ona iha dalan-klaran hein to’o mai. Ha’u lahatene tanba sa mak fó sai fali katak seidauk bele mai tanba seidauk selu. Agora oinsa ita atu rezolve ita-nia maluk sira Atauro ho Oe-cusse, se kondisaun mak nafatin hanesan ne’e susar teb-tebes, tenke buka maneira ida oinsa rezolve situasaun ida ne’e,” kestiona deputada CNRT ne’e, iha plenária Tersa (19/10).

Iha Segunda ne’e, Prezidente APORTIL, Flávio Cardoso Neves relata, parte Governu Alemaña nian halo pagamentu, nune’e hela deit montante osan rihun USD 142. No Governu TL hela Euro Milaun 3.5, ka Milaun USD 4.

Projetu konstrusaun ró pasajeiru nasionál daruak ne’e finansia husi Governu Timor-Leste hamutuk Euro 7.1, no Governu Repúblika Federál Alemaña Euro 7.8.

Ró Berlin-Ramelau konstrui iha Xina, husi empreza Armadora husi Olanda ho naran Damen Shipyards ho nia luan metru 16, kaladu metru 3,3, naruk metru 67,3, konvés ho aas metru 4,8 no sei atinje velosidade másima nós 10 to’o 12. Ró foun ne’e sei troka Nakroma no iha kapasidade ida atu tula ema 380 resin.Say

Membru Polísia Nasionál Timor-Leste (PNTL), Faustina Saldanha Cardoso, tama kadeia tinan ha’at iha prizaun Gleno, tanba komete krime Burla Agravadu no Falsifikasaun Dokumentu.

Membru Faustina Saldanha Cardoso iha Segunda (18/10/2021) submete  ona ba tuir julgamentu iha Tribunál Distritál Díli (TDD), hafoin kumpri ona deténsaun oras 72 iha sela detensaun Polísia Sientefika Investigasaun Kriminál (PCIC-sígla portugés) iha Caikoli.

Iha prosesu julgamentu, Tribunál aplika prizaun defenetiva tinan haat ba Faustina  Saldanha Cardoso, tanba provadu iha krime Burla Agravadu no Falsifikasaun Dokumentu.

Tuir  kronolojia, membru PNTL ne’e komete krime ne’e iha tinan 2019, no tuir ona Prosesu Primeiru Interogatóriu iha TDD, no husi rezultadu Primeiru Interrogatóriu ne’e, Tribunál aplika medida koasan prizaun prevéntiva iha prizaun Bekora durante fulan neen, hafoin remata prizaun preventiva, Faustina Saldanha livre husi medida koasaun ne’e, maibé prosesu ne’e seidauk iha desizaun finál.

Bainhira Tribunál notifikasaun arguidu hodi tuir tan julgamentu, maibé nia la kumpri karta notifikasaun, tanba ne’e iha Kinta (14/10), Tribunál hasai mandadu deténsaun ba iha Faustina Saldanha Cardoso ho númeru krime 0044/19 PCIC hodi hala’o detensaun ba Faustina Saldanha Cardoso iha Sesta (15/10).avi

About

Grupo Média Nacional was founded on the 19th December, 2003 with the aim of contributing to the development of media in the newly independent Timor-Leste. In that respective year, "Jornal Nacional Semanário" weekly newspaper was launched and in 2005 the Group ... more

Phone: 3311441
Email: [email protected]
Address: Dom boaventura no 8, Bebora Dili, Timor Leste.

GMN Map

Copyright © 2021 GMN TV | All right reserved.
apartmentmap-marker