Xefe Estadu Maior Jenerál F-FDTL Tenente Jenerál Lere Anan Timur, husu membru Persaudaraan Setia Hati Terate (PSHT) sira atu labele ba hasa’e sintu subar-subar iha Repúblika Indonézia (RI).
Razaun Tenente Jenerál Lere Anan Timur bandu membru Persaudaraan Setia Hati Terate atu labele ba hasa’e sintu iha rai sorin, tanba arte marsiál hotu nasaun no povu Timor-Leste ni’an importante halo kordenasaun di’ak ho Governu Timor-Leste.
“Labele halo sasán subar-subar, imi sunu uma, oho ema subar tiha imi-nia liman dehan la’os imi, imi balun atraveza fronteira ilegál ba mai ba hasa’e fita iha ne’eba, tanba saida la hamanas fita iha Timor, tanba arte marsiais hotu Timor ni’an biar mai husi estranjeiru, maibé ne’e Governu RDTL nia okos la’ós iha Indonézia nia okos”,deklara Xefe Estadu Maior Jenerál F-FDTL Tenente Jenerál Lere Anan Timur, Sábadu (31/7/2021) iha Timor Lodge, Comoro.

Lere hateten maske PSHT mai husi nasaun Indonézia, maibé Timor-oan barak mak envolve ona iha arte marsiál refere, nune’e husu ba membru sira atu aproveita didiak no labele uza sala hodi kria konflitu iha Timor-Leste, maibé aproveita hanesan desportu atu kompete iha eventu internasionál sira hodi hamorin Timor-Leste no povu nia naran liu husi área desportiva.
Tuir dadus ne’ebé GMN asesa, sidadaun liu rihun 30 mak envolve iha arte marsiál Persaudaraan Setia Hati Terate.
PSHT realiza kongresu
organizasaun PSHT realiza kongresu hodi kompleta kritéria sanulu resin ualu molok husu Governu reativa.
Hafoin partisipa iha seremonia kogresu estraordináriu PSHT ni’an Sekretáriu Estadu Juventude no Desportu, Abrão Saldanha, deklara, organizasaun refere presiza kompleta kritéria hanesan rejistu identidade lideransa, estatutu, fatin treinu, estatutu organizasaun no seluk tan molok Governu reativa bazeia ba lei númeru 5/ 2017.
Governante ne’e deklara, bainhira reativa arte marsiál hirak ne’ebé prienxe ona rekezitu Governu bele garante hodi kontrola membru arte marsiál sira bazeia ba dekretu lei 15/2017.
Alende lei, Governu liu husi Sekretaria Estadu Juventude no Desporte mós halo hela diskusaun ho fundadór arte marsiál sira ni’an no posiblidade sei altera hikas dekretu lei balun hodi kontrola arte marsial sira.
“Depois de governu hasai rezolusaun reativa arte marsiais, partikamente PSHT sei falta rekezitu ida rekezitu ida mak akta asembleia kongresu ni’an mak aprova sira nia estatutu hodi nune’e bele entrega ba KRAM no KRAM prodúz parser ba SEJD agora dadauk ba PSHT nia situasaun falta de’it dokumentu ida nia rekezitu ida rekezitu 17 sira kumpri ona falta rekezitu ida aprovasaun ba sira nia organizasaun”,dehan Sekretáriu Estadu Juventude no Desportu, Abrão Saldanha Nokosiku iha Timor Lodge, Comoro, Sábadu (31/7/2021).
Prezidente PSHT, Baltazar Lemos, esplika, objetivu husi kongresu estraordináriu ne’e atu hametin fraternizasaun membru PSHT ni’an hodi kompleta kritéria, tanba Governu taka ona iha tinan hirak liu ba.
“Ohin loron ami atu hametin ami nia fraternizasaun organizasaun PSHT ni’an ohin dader kmanek ida ne’e halo ami nia kongresu extradinariu, tanba tempu passadu governu taka, tanba ho motive oi-oin, maibé depois de agora liu husi SEJD halo ami atu kompleta hikas fali ami nia rekezitu nune’e para atu reativa hikas fali, tanba ne’e organizasaun PSHT iha TL”,dehan Baltazar Lemos.
Obseravsaun GMN iha kongersu estraordináriu organizasaun PSHT ne’e, kongresista sira balu la kumpri regra prevensaun COVID-19, maske dadaun ne’e Governu implementa hela serka sanitária, tanba vírus hirak ne’e nafatin sai ameasa ba saúde públika.Ina

Primeiru Ministru (PM), Taur Matan Ruak, desdkorda ho hirus membru balun husi organizasaun Persaudaraan Setia Hati Terate (PSHT) rei ema nia ain iha nasaun viziñu Indonézia.
Asaun ne’e akontese bainhira membru balun husi organizasaun Persaudaran Setia Hati Terate ne’ebé rei ema nia ain iha Indonézia, bainhira ba hasa’e sintu. No imajen kona-ba Timor-oan rei ema nia ain ne’e sai víral ona iha rede sosiál.
Primeiru Ministru, Taur Matan Ruak, hanesan mós Ministru Interior deklara asuntu ne’e ho jestu hirus hafoin partisipa seremonia kongresu estraordináriu organizasaun PSHT ni’an iha salaun Timor Lodge, Comoro, Sábadu (31/7/2021).
Maske nune’e, Xefe Governu ne’e husu organizasaun refere atu nafatin esforsu hodi hadia sala hirak ne’ebé membru sira komete nune’e labele akontese tan iha futuru.
Eis Prezidente Repúblika ne’e mós apela ba organizasaun Persaudauraan Seti Hati Terate atu koordena ho Governu atuál no labele halo atividade subar-subar liu-liu hakat fronteira liu husi dalan ilegál, tanba de’it atu ba hasa’e sintu iha nasaun Indonézia.
“Hanesan Ministru Interior ha’u ulun fatuk moras loos imi hatenen ita-nia labarik hira mak iha sorin ne’eba besik 600 horibainhirak Ministériu Interior haruka video ida mai ba ha’u-nia gabinete fó sai haree ita nia oan sira rei ain ne’e labele ne’e, kongresu ida ne’e sei halo dezisaun barak organiza-an di’ak liu impoin disiplina di’ak liu iha organizasaun”,deklara PM Taur.

Nune’e mós Xefe Estadu Maior Jenerál F-FDTL Tenente Jenerál Lere Anan Timur, husu ba organizasaun hotu liu-liu ba PSHT ne’ebé realiza kongresu estraordináriu atu iha devér obrigasaun hodi kontribui ba estabilidade iha nasaun no povu Timor-Leste no hakribi violénsia hodi sai parseiru ba Governu.
“PSHT ho arte marsiais seluk seluk ita loron-loron ma krona oho malu sunu malu sadik malu, maibé pelo kontráriu imi mak fakar fali imi nia raan kualker organizasaun nia dever obrigasaun atu kontribui ba estabelidade ba dezenvolvimentu sai parseiru ba ita nia governu ita nia governu ida de’it ita nia estadu ida de’it bandeira nasionál ida de’it, ita ukun-an dala ida de’it”,hatete Lere Anan Timur, ne’ebé partisipa mos iha kongresu ne’e.
Prezidente PSHT, Baltazar Lemos, rekoñese no promete sei hadia erru hirak ne’ebé membru sira komete iha rai sorin.
“Klaru ho tempu ne’ebé mak ikus mai ami sei hadia buat ne’ebé ke ohin sua eselensia fó sai ohin ita hotu rona, ba future katak atu hanorin ema sai ema sai dedikasaun ne’ebé ke di’ak ba jerasaun foun ni’an no ba nasaun TL no ba futuru hanesan mós ho nasaun seluk”, dehan Prezidente PSHT, Baltazar Lemos.
Tuir dadus ne’ebé gmn asesa, sidadaun liu rihun 30 mak envolve iha arte marsiál Persaudaraan Setia Hati Terate.Ina

Xefe Estadu, Francisco Guterres Lú Olo, liu hosi xefe Casa Sívil, Francisco Maria de Vas Concelhos deklara, Estadu dekreta tan Estadu Emerjénsia (EE) ba dala sanulu resin neen (XVI), tanba SARS COV-2 no variante foun Delta kontinua ameasa saúde públika iha nasaun viziñu Indonézia, Austrália no da’et ona mai teritórriu Timor-Leste.

Estadu Timor-Leste deside hodi kontinua Estadu Emerjénsia nune’e hafasil Governu atu kontrola sidadaun sira, hodi redúz númeru infesaun SARS COV-2 no variante foun Delta iha rai laran. Aman ba nasaun ne’e, dekreta EE ba fulan ida tan, hafoin simu pedidu ne’e husi parlamentu nasional.

Estensaun no deklarasaun ba estadu emerjénsia mai ho fundamentu iha subsistensia ba situasaun kalamidade públika, no deklarasaun ne’e sei abranje ba territóriu nasionál tomak.

EE sei parsialmente suspende direitu ba sirkulasaun internasionál, liberdade ba sirkulasaun no fixasaun rezidensia, direitu reuniaun, manifestasaun, liberdade ba kultu, direitu ba edukasaun direitu propriedade, direitu ba rezidensia no inisiativa ekonómika privada.

Tuir dadus ne’ebé GMN asesu husi pájina Palásiu de Zincas hatudu kazu kumulativu hamutuk ema 10.695, kazu atuál baixa iha ema na’in 567, kazu rekuperadu 9.802 no mate 26. Ina 

Velosidade internet lentu ka neneik liu difikulta prosesu aprendizajen online, Asosiasaun Halibur Defisiénsia Matan Timor-Leste (AHDMTL), husu Ministériu Transporte no Komunikasaun (MTK) atu tau atensaun hodi rezolve lalais problema refere.

Diretór ezaekutivu AHDMTL, Gaspar Afonso hato’o preokupasaun ne’e, relasiona ho velosidade internet ne’ebé la’o neneik liu, hodi fó impaktu ba prosesu eskolar online, tanba estudante barak labele asesa ba eskola online ne’ebé implemente husi Governu, ne’ebé liga ho pandemia coronavírus.

Ho situasaun ne’e Gaspar husu Ministériu Transporte No Komunikasaun atu haree asuntu hirak ne’e no labele gasta de’it osan hodi aluga ró ne’ebé kondisaun la di’ak no ameasa ema nia vida, bainhira halo movimentu ba Atauro no Díli oe-Cusse.

“Ho rede ida lentu tebes osan iha ne’ebé mak atu hola pulsa rede mós lentu difikulta ami, rekomenda ba Ministériu Transporte no komunikasaun tenke aselera ona situasaun hirak ne’e la’os preokupa fali ba aluga ró la dun di’ak, preokupa ba ida ne’e mais la haree situasaun rai laran ró atu oho tan ema, PM mós sorte la’e mós ró fakar hotu, tanba ne’e mak hadia situasaun ne’e atu nune’e ami sulan de’it iha mós ami tenke aproveita se la’e hanesan ami semester 7 ona material ida mós ami eskola kotu kotu seidauk eskola kompletu”, dehan, Diretór Ezekutivu AHDMTL, Gaspar Afonso hafoin enkontru ho Prezidente Repúblika, Francisco Guterres Lú Olo, iha Palásiu Prezidensiál Bairo-Pite Sesta (30/07/2021).

Alende ne’e, Gaspar ho ekipa husu ba governu liu-liu Ministériu Ensinu Superior Siensia no Kultura (MESSK) atu labele halo diskriminasaun pagamentu propinas ba universitáriu sira iha rai laran no mós rai liur, tanba ministériu prioridade ba estudante iha estranjeiru.

Ema ho difisiénsia  matan iha Timor-Leste ema hamutuk na’in 30 mak asesu ona ba edukasaun, husi númeru ne’e na’in 13 iha ensinu rekorente, na’in ualu iha universidade no na’in 14 remata ona iha pre sekundária, maibé abandona hela, tanba governu seidauk estabelese eskola sekundária ba ema ho difisiénsia.

Tuir dadus ne’ebé GMN asesa ema ho difisiénsia matan iha Timor-Leste hamutuk ema rihun 14.824, ema sira ne’e maioria hela iha área rurál. Ina 

Ezekusaun Orsamentu Jerál Estadu (OJE) tinan 2021 Ministériu Edukasaun Juventude no Desportu (MEJD) nian atinje ona pursentu 40.

“Ezekusaun OJE 2021 MEJD nian prosesu ida kleur oituan, tanba atu rezolve problema infrastrutura presiza liu hosi prosesu aprovizionamentu no tenke liuhosi konkursu, nune’e lori naruk maibé Ministériu sei bele aselera lalais iha fulan rua mai”, dehan Ministru MEJD, Armindo Maia, ba JN-Diário Kinta (29/07/2021) iha Munsípiu Ainaru hafoin partisipa iha serimonia inagura moru eskola.

Armindo Maia, ezekusaun OJE 2021 nian MEJD ezekuta ba salariu vensimentu, bens servisu no kapital dezenvolvimentu no iha Ministériu iha parte ida infraestrutura  tama iha transferensia públika projetu komunitária sira hanesan Programa Nasionál Dezenvolvimentu Suku (PNDS) projeitu PNDS nian laos fó ba kompañia maibé fó ba grupu komunitário mak sei tau ba projeitu sira.

“Orsamentu ne’ebé iha balun uza ba hadia eskola sira ho kondisaun a’at no balun halo konstrusaun foun no tinan ne’e MEJD sei hadia eskola a’at hamutuk 190”.Fel

Ministériu Edukasaun Juventude no Desportu (MEJD) sei fó apoiu pulsa asesu internet gratuita  ba estudante sira asesu programa eskola ba uma, durante periudu Serka Sanitária (SS) no Konfinamentu Obrigatoriu (KO).

“Idea apoiu pulsa ba estudante sira ne’e, tanba ita iha situasaun pandemia covid-19 no konfinamentu obrigatoriu, hodi fasilita estudante asesu ba programa eskola ba uma ne’ebé oras dau-daun nia episode atinje ona 200 liu”,dehan Vise Ministru MEJD, António Guterres, ba Jornalista sira Kinta (29/07/2021) iha Vila-Verde Díli.

Vise Ministru MEJD, durante ne’e MEJD kontinua halo preparasaun tekniku no halo reuniaun ikus ida loron 28 fulan ne’e ho operasaun telkomunikasaun 3 hanesan Telemor Telkomsel no Timor Telekom no hein katak, iha tempu besik bele fó sai ona kona-ba bainhira mak atu halo transferensia pulsa ba kada estudante tanba Ministériu tenke halo aproximasaun diak ho parseiru operadór 3 konaba atribuisaun pulsa ba estudante sira.

“Prosesu atu apoiu pulsa ba estudante sira liuhosi orsamentu retifikativu ne’ebé aprova ona hamutuk milliaun 3.2 hodi fornese pulsa ba estudante hosi nível pre-primaria to’o sekundáriu. Programa eskola ba uma MEJD halo liu hosi learning passport ne’ebé parseria ho UNICEF hodi fó apoiu ba ida ne’e no durante ne’e Ministériu nafatin halo aprosimasaun programa eskola ba uma identifika iha dezafio” afirma António Guterres.

Governante ne’e subliña, iha dikuldade barak iha programa eskola ba uma tanba estudante barak laiha telephon Adroid, balun laiha televizaun, balun iha telephone maibé hela iha área remotas liña internet ladiak no balun falta liña eletrisidade iha área remotas no programa ne’e primeiru iha Timor maibé situasaun covid-19 mak hamosu, entantu ne’e sai mós motivasaun ida atu futuru presiza atu adapta iha era dizilitalijasaun.

 “Ne’e duni tuir dadus benefisiariu seidauk fiksu tanba sei hare númeru alunus entermus seidauk difine lolos ba estudante eskola nível ida ne’e maibé tanba programa eskola ba uma hahu kedas hosi estudante Pre-Eskolar ba to’o iha Tekniku Vokasional aplika hodi asesu ba programa refere, nune’e tuir dadus jeral hosi estudante ne’ebé rejistadu hosi eskola Pre-Eskolar to’o Ensinu Sekundario no Tekniku Vokasional hamutuk 392 mil 42 alunus”, reafirma Vise Ministru.

Nia realsa, dadaun ne’e tékniku sira sei buka hela opsaun diak atu fó vantagem ba alunus foun bainhira transferensia pulsa ne’e lao tanba ita sei la fó pulsa dolar 1 ba estudante atu uja ba loron ida nian, tanba ne’e Ministériu sei halo hela diskusaun ho operadór tolu no tempu badak sei fó sai rezultadu atu apoiu pulsa.Fel

Vise Ministru Saúde, Bonifácio Maucoli dos Reis, hatete,  Ekipa Konjunta Saúde Munisípiu Ermera sei halo swab test massal ba komunidade sira iha Merkadu,  eskola,  no mos fatin sira ne’ebé mak halibur ema barak,  nune’e bele deteta ema infetadu COVID-19, tau iha fatin izolamentu hodi bele hakotu korente transmisaun.

“Ami konkorda ona para atu halo screening massal, ba iha Merkadu sira eskola sira, nomos fatin sira ne’ebe maka ema barak agnumera ita halo screaning massal para atu bele hare sira ne’ebe maka positivu ita foti hotu para atu nune’e ita bele hakotu korente transmisaun,” Bonifácio Maucoli dos Reis hato’o informasaun ne’e relasiona númeru pozitivu covid-19,  ne’ebé oras ne’e dadaun sa’e maka’as iha Munisípiu Ermera, Kinta (29-07-2021).

Governante ne’e hateten,  Ministériu Saúde sei koordena ho Diretor Edukasaun no Koordenador eskola sira,  atu haree eskola balun hodi tau ema ne’ebé infetadu covid-19.

Maucoli informa, Ekipa Servisu Epidemolójia Vijilánsia Ministériu Saúde,  ho ekipa konjunta Munisípiu Ermera, deteta kazu pozitivu hamutuk 382,  no dadaun ne’e ema na’in 40 mak hala’o hela tratamentun iha sala izolamentu Gleno, kompostu husi feto 21 no mane 19.

“Ita haree tan kondisoens sira identifika no sei koordena ho Diretor eskola sira, Diretor Edukasaun Munisípiu Ermera para hare tok eskola sira karik ita bele kondisiona kompleta ho fasilidade ruma para atu nune’e depois de sei loron hira mai mak ita deteta tan para it abele kontein sira iha fatin sira ne’ebe maka ita identifika ona,” tenik nia.

Kazu detetatu foun ne’ebé,  relata iha loron 30 fulan ne’e,  iha Dili 27,  Ermera 13,  nune’e kazu ativu iha Dili  294, iha Ermera 360, no to’o oras ne’e Timor Leste,  rejista kazu konfirmadu 10.744 kazu rekoperadu 9.848 kazu ativu 870, no kazu mate 26.eni

Ministériu Edukasaun Juventude no Desportu (MEJD) sei adia prosesu ensinu aprendizajem ba semana rua iha Munsípiu Díli no Ermera, hafoin Konsellu Ministru (KM) deside impoin Serka Sanitária (SS) iha Ermera KM no Díli ba semana rua.

“Serka Sanitária ba Ermera KM foin foti desizaun no Ministériu Edukasaun hasai ona despaisu Ministérial hodi suspende prosesu ensinu aprendizajem durante semana rua”, dehan Ministru MEJD, Armindo Maia, ba JN-SEMANÁRIO, Kinta (29/07/2021) iha Munsípiu Ainaro hafoin partisipa iha serimonia inagura moru eskola.

Governante subliña, Ministériu sei hare konaba ezame segundu periodu karik presiza adia atu estudante sira bele prepara liu tan, tanba aula prezensial foin mak reativa iha semana ida nia laran no agora mosu SS.

“Covid-19 hanesan buat naok ten ida ne’ebé ita hotu preokupa tanba bainhira númeru pasiente infetadu sa’e mak Governu taka atividade hotu no bainhira númeru infetadu menus mak atividade sira bele lao normal, mas ida ne’e mak situasaun maibe ita tenke esforsu hodi prevene estudante sira labele kona moras refere maibé ita mós buka oinsa labarik sira aprende nafatin”.

Tanba ne’e eskola online kontinua la’o maske iha problema barak hanesan estudante balun laiha telephone android, laiha televizaun no liña internet ladiak. Ministéiu hakarak estudante hotu atu partisipa masimu iha eskola online maibé sei la konsege estudante sira pelu menus pursentu 30 estudante bele aproveita.Fel

Envolvimentu  juventude iha aktividade Partidu Polítiku (ParPol) importante, hodi hodi bele alkansa  objetivu  polítika nasionál.

Lia hirak ne’e hato’o husi líder juventude ne’ebé mak haknaar a’an iha partidu polítiku, liu husi programa  Grande  Entrevista iha studio II, GMN, Bebora, Díli, ho tópiku Prezidente Ideál  Timor-Leste  ba tinan 2022 to’o 2027.

Adjuntu Sekretáriu Jerál  Juventude  FRETILIN, Efrem  Trinquedos,  hateten, papel juventude iha partidu FRETILIN importante hodi bele hasoru eleisaun prezidensiál no parlamentár.

“Ha’u hanoin ita hateke oituan ba kotuk mai husi jerasaun joven sira mak funda FRETILIN  to’o lori prosesu mai to’o ohin loron.  FRETILIN harii nia joven  enkuadra-an iha estatutu FRETILIN  tuir artigu 91, ne’ebé koalia kona-bá juventude FRETILIN. Iha juventude FRETILIN nia koalia kona-bá menifesto polítiku  estatutu FRETILIN, nia mai ho nia estatutu rasik  nia definisaun ne’e sai hanesan  sosial no polítika  ne’ebé halibur militante joven FRETILIN  ho idade juventude respeita”,esplika Adjuntu Sekretáriu Jeral  juventude  FRETILIN,  Efrem  Trinquedos.

Alende ne’e  líder juventude  partidu Congresso Nacional Reconstrução Timor-Leste (CNRT),  Jorge Soares, hateten, kna’ar juventude   iha partidu CNRT  mak atu transmite  polítika partidu nian ba jerasaun  foun sira hodi lori dezenvolvimentu ba nasaun.

“Kna’ar juventude CNRT nian mak atu transmite  polítika  partidu nian  ba jerasaun kontinuadór joven sira  buka militante no simpatizante. Juventude atu hamutuk ho partidu CNRT  kontinua halo preparasaun ba lideransa  partidu liu husi organizasaun  juventude. Ami mos kontinua loke ramu  iha kamada organizasaun hotu  iha ita-nia rai.  Juventude mós halo rekrutamentu ba joven foun sira   hanesan votante. Papél sira  ne’e mak  ami halo  iha partidu laran atu fó forsa ba partidu CNRT iha eleisaun tuir mai”,dehan Jorge Soares.

Nune’e mós líder  juventude Partidu Libertasaun Popular (PLP), Cesário Dias  Gusmão,  hateten, kna’ar  juventude  iha PLP  nian mak halo mudansa tanba juventude mak  parseiru dezenvolvimentu.

“Ba kna’ar PLP nian mak halo mudansa. PLP partidu  ne’ebé mak foin  moris  juventude presiza halo mudansa, tanba juventude mak sai parseiru ba dezenvolvimentu  Estadu nian. Iha nasaun ida ne’e  dezenviolvimentu atu la’o  presiza  envolvimentu juventude, entaun papél ami nian tenke halo mudansa liu  partidu, entaun mudansa liu husi ami nia programa mak hanesan aktividade juventude agrikultura, juventude sustentavel”,dehan Cesário Dias  Gusmão.

Alende ne’e líder juventude husi partidu Kmanek Haburas Unidade Timor Oan (KHUNTO), Frumencio  Araújo, hateten ezisténsia  organizasaun  juventude iha partidu importante, hodi bele konsolida forsa partidu nian  no mobiliza massa fó apoiu ba partidu.

“Ita bo’ot sira hatene katak partidu KHUNTO partidu ida ne’ebé mak foun, maioria nia eleitor  joven. Ezisténsia organizasaun juventude  ne’e importante  tebes iha partidu para konsolida forsa partidu nian  no mobiliza forsa ne’e fó apoiu ba  partidu, reforsa liu tan partidu iha baze. Alende mobiliza foin sa’e sira fó apoiu ba partidu, maibé espasu para ita kaderiza sira prepara sira, bainhira estrutura nasionál balun iha mudansa  ita hakbiit sira naton para pelo menus bele halo selesaun  bainhira iha tempu udan mai karik ita bele kuda”,dehan Frumencio Araújo.

Ezisténsia   joven sira iha partidu hanesan  ai-rin maske  iha eleitor ferik  no mos katuas sira.avi

 

Koordenadór La’o Hamutuk (LH), Celestino Gusmão, kestiona, Parlamentu Nasionál (PN) la envolve sosiedade sivíl ho entidade relevante sira seluk iha diskusaun faze espesialidade ba proposta lei Enkuadramentu Orsamentál no Jestaun Finanseira (EOJF).

Celestino afirma, nia parte apresia ho inisiativa Governu hodi aprezenta proposta lei ida ne’e, maibe lamenta tanba diskusaun lei refere iha ámbitu resesu ne’ebé la envolve deputadu barak no entidade relevante sira inklui La’o Hamutuk rasik  nu’udar institutu Timor-Leste ba análiza no monitoriza dezenvolvimentu  iha Timor-Leste.

Celestino subliña, lei EOJF ne’e, iha implikasaun ba orsamentu Estadu nian, tanba ne’e presiza inklina entidade importante hotu nia opiniaun.

“Diskusaun espesialidade, infelizmente ami la rona, tanba ne’e ami la partisipa, nune’e la rona diskusaun fundamental ho lei ida ne’e, lei ida ne’e  importante tebes, lei ida ne’ebé sei afeta ba finansa públika no afeta mós ba vida Estadu no povu nian. Entaun devia promove partisipasaun sosiedade sivíl, parte relevante sira  inklui media sira,  atu iha liu tan opsoens, atu polítika PN ho Governu bele redus opsaun risku ba sala sira ne’e, hodi fó ideia atu bele iha lei ida ne’ebé di’ak liu ba rai ida ne’e. Ami mós sujere tiha ona hanoin liuhosi karta ida ne’ebé publika ona iha ami nia website, ami hanoin atu iha liutan ezersísiu hodi promove liutan tranparánsia, liu-liu gastus detallu sira ne’ebé mak tau naran boa governasaun, no jestaun finansa públika”,afirma Koordenadór La’o Hamutuk, Celestino Gusmão ba GMN, hafoin partisipa iha Timor-Leste Development Partners Meeting iha Ministériu Finansa, Sesta (30/07/2021).

Alende ne’e, koordenadór la’o hamutuk ne’e mós observa katak, Orsamentu Jerál Estadu ba tinan 2021 nian, maioria ezekuta liu ba atividade sosial sira, kompara ho dezenvolvimentu seluk.

Proposta lei enkuadramentu Orsamental no Jestaun Finanseiru ne’e, Parlamentu Nasionál, liuhosi komisaun C ho D diskute hela iha faze espesialidade, ne’ebé hala’o iha salaun sentru formasaun Tibar durante semana rua ona.

Proposta lei ne’e rasik aprovadu iha faze jeneralidade ho votus a-favór 37 kontra 12 no abstensaun 11.

Maske iha ona pedidu balun hosi intelektuais sira ba gabinete Prezidente Parlamentu nasionál, hodi husu atu adía prosesu diskusaun ba proposta lei enkuadramentu ne’e,  maibe Prezidente Parlamentu Nasionál, Aniceto Guterres deklara ona, nia parte seila admite atu adía ka kansela, tanba prosesu diskusaun besik finaliza ona.Say

Eis Prezidente Repúblika, Kay Rala Xanana Gusmão, iha Sesta (30/07/2021), tun diretamente hodi mobiliza komunidade afetadu sira husi inséndiu ninian halo limpeza iha eis merkadu Comoro.

Líder karismátiku Kay Rala Xanana Gusmão,  tun iha terenu ne’e akompañadu hosi eskoltu sira iha fatin eis merkadu Comoro Aldeia 03, Fatuhada, Postu Administrativu Dom Aleixo, hodi mobiliza komunidade  hala’o limpeza  ba kalen  ne’ebé mak ahi han  hodi ba soe iha Tibar.

Alende ne’e, Komando PNTL Munisípiu Díli  hala’o seguransa ba iha fatin refere, sira mós akompaña halo limpeza iha eis merkadu Comoro. Inséndiu ne’e akontese Kinta (29/07/2021), mais ou menus tuku tolu madrugada oras Timor-Leste.

Vítima inséndiu uma kain 179 hetan ona apoiu

Nune’e mos, vítima uma kain 179 hetan ona apoiu emerjénsia husi ajénsia internasionál balun no  mos husi líder karismátiku Kay Rala Xanana Gusmão.

Hafoin akontesimentu ahi han uma iha eis merkadu Comoro,  Xefe Aldeia 03, Jeferino Braz, orienta ona ekipa  hodi  rekolla  dadus husi vítima sira,  hodi hato’o ba Governu. Ne’ebé tuir dadus provizóriu iha uma 179 mak hetan sunu no kuaze sasán uma-laran la aproveita.

Maibe iha Sesta (30/07/2021), vítima inséndiu balun hetan ona apoia emerjénsia, hanesan fos mina, biti no nesesidade seluk tan.

“Uma 179 mak hetan sunu, dadus ne’e ami rekolla urjente, dadus ne’e ba iha diresaun Estatal, ba iha Protesaun Sivíl, ba iha MSSI no kompañeiru balun liga langsung ba avo Xanana, apoiu sasán nesesidade bázika komesa mai ona kontinua mai nafatin, ema balun tulun ai-han ne’ebé tein tasak  no be’e, ne’e para ami bele distribui ba  vítima inséndiu sira. Ha’u mós husu ba Igreja atu tulun buat ruma ba komunidade afetadu ba inséndiu refere”,esplika Xefe Aldeia 03 Jeferino Braz, ba GMN iha eis merkadu Comoro.

Inséndiu  ne’e akontese iha  Sábadu (29/07/2021) mais ou menus tuku tolu madrugada oras Timor-Leste, husi ema moras mental ida ne’ebé fakar gazolina ba nia kulsaun toba fatin nian hafoin mak sunu, nune’e alastra sai hodi han hotu komunidade seluk sira-nia uma.

Husi akontesimentu refere, PNSIK no Polísia Eskuadra Dom Aleixo detein  suspeitu ho inisiál FA.A.F,  tanba deskonfia envolve iha kazu sunu  eis merkadu Comoro.

Tuir observasaun GMN iha terrenu, alende komunidade halo limpeza, vítima inséndiu sira mós balun hahú konstrói fila-fali sira-nia uma  hodi tidin ai-rin besi.avi

Asosiasaun Halibur Defisiénsia Matan Timor-Leste (AHDMTL) kestiona atendimentu Ministériu Saúde (MS), tanba konsidera hamosu diskriminasaun.

Diretór Ezekutivu AHDMTL, Gaspar Afonso hato’o deklarasaun ne’e, relasiona ho atendimentu ba Governu li-liu  Ministériu Saúde ni’an ba ema ho difisiénsia ne’ebé pozitivu coronavírus, maibé ministériu refere la’o tratamentu ba sira no abandona sira kompara ho sidadaun babain.

“Ba ami, tanba ami nia ema na’in 8 hetan pozitivu Ministériu Saúde la tau prioridade, tanba ne’e mak ami rasik hakarak mai hato’o ba Prezidente Repúblika no molok hirak ne’e ha’u enkontru ona mós Parlamentu no PM, no PR prontidaun loos atu fó hanoin ba PM no nia governante sira li-liu ministériu relevante atu fó atendimentu ba ema ho difisiénsia, PR husu durante ne’e ba atendimentu ami auto izolamentu iha ami nia uma de’it entaun di’ak, di’ak mós ami mak na’in deside ami di’ak hela, tanba ema la ba chek”, Diretór Ezekutivu AHDMTL, Gaspar Afonso, hato’o asuntu ne’e ba Jornalista sira hafoin enkontru ho Prezidente Repúblika, Francisco Guterres Lú Olo, iha Palásiu Prezidensiál Bairo-Pite Sesta (30/07/2021).

Tuir dadus ne’ebé GMN asesu ema ho difisiénsia matan iha Timor-Leste hamutuk 14.824, ema sira ne’e maioria hela iha área rural, tanba ne’e AHDMTL kontinua fanu governu atu halo atendimentu di’ak ba sira hanesan ho ema babain, hodi hateten la’e ba diskriminsaun.

Durante enkontru Prezidente Repúblika, Francisco Guterres Lú Olo, mós deskorda ho atendimentu Ministériu Saúde ni’an hasoru ema ho difisiénsia, no aman ba nasaun ne’e sei hato’o preokupasaun hirak ne’e ba Governu hodi hadia. Ina

Governu aplika ona Konfinamentu Obrigatóriu (KO), ba Postu Administrativu Railaku no Ermera Vila, iha munisípiu Ermera, tanba númeru pozitivu COVID-19 sa’e maka’as.

“Haree ba evolusaun husi situasaun epidémika iha Ermera ne’ebé agrava liu ,ho númeru kazu diagnostíkadu husi virus SARS-CoV ne’ebé sa’e makas iha munisípiu ne’e no atu prevene risku ne’ebé mosu husi propagasaun COVID-19,Konsellu Ministru aprova ona projetu rezolusaun Governu nian ne’e impoin konfinamentu domisiliáriu jerál ba populasaun iha Postu Administrativu Ermera Vila no Railaku iha munisípiu Ermera,hahú husi tuku 00:00 loron 31/fulan Jullu to’o tuku 23:59 iha loron 11,fulan Agusto tinan 2021” Ministru Prezidensia Konsellu Ministru ,Fidelis Manuel Leite Magalhães, hatete lia hirak ne’e iha Palásiu Governu, Sesta (30/07/21).

Ministru Prezidénsia Konsellu Ministru neé hatete, konfinamentu obrigatóriu ne’e, hahú em vigór iha Sesta ne’e, no sei remata iha loron 11, fulan Agosto, tinan ne’e.

Fidelis Magalhães, esplika, razaun Governu deside hodi aplika Konfinamentu Obrigatóriu Domisiliáriu Jerál ba Postu Administrativu rua ne’e, tamba númeru pozitivu COVID-19 iha munisípiu Ermera, liu-liu iha Postu Administrativu rua refere, hamutuk 382.

Desizaun iha Konsellu Ministru Estraordináriu ne’e mós, suspende hotu prosesu aprendizajen, atividade relijioza, sosiál no  transporte públiku, tamba liu husi atividade hirak ne’e, bele hadaet lalais virus refere husi ema ida ba ema seluk.

Fedelis afirma, iha reuniaun Konsellu Ministru Estraordináriu ne’e, aprova ona deliberasaun ida atu orienta Ministru Saúde no Departamentu sira hotu ne’ebé responsavel ba kampaña vasinasaun atu nune’e bele mobiliza rekursu nesesáriu sira hotu, hodi hasa’e númeru vasina loro-loron iha area munisípiu Ermera. No liu husi dalan ida ne’e, bele hasa’e porsentu populasaun ne’ebé vasina ona iha munisípiu refere.

Dadaun ne’e munisípiu Díli aplika hela Serka Sanitária no sei remata iha loron 12, fulan Agosto, tinan ne’e.

Tuir dadus sala situasaun Sentru Integradu Jestaun Krize hatudu, dadaun ne’e pozitivu COVID-19 iha munisípiu Díli hamutuk 297.Tos

Primeiru Ministru, Taur Matan Ruak, konsidera, papél parseiru dezenvolvimentu importante ba Timor-Leste iha aspetu oi-oin, liu-liu kombate pandemia global COVID-19.

“Ha’u hakarak aproveita sorumutu ne’e hodi transmite katak, ita-nia gratidaun no agradesimentu ne’ebé klean ba papél importante ne’ebé parseiru sira dezenvolvimentu nian, ne’ebé hala’o ona iha loron 17, ikus pandemia COVID-19 nian ne’e ho apoiu sira foin lalais ne’e, ba vítima dezastre naturál sira ne’ebé akontese iha Timor-Leste”,Xefe Governu hato’o nia apresiasaun ne’e, iha sorumutu entre Timor-Leste ho parseiru dezenvolvimentu sira, iha salaun auditóriu Ministériu Finansa, Aitarak Laran, Sesta (30/07/21).

PM Taur, hatete, parseiru dezenvolvimentu nia papél importante, tamba kontribui tebes ba reforsa sistema saúde nian hodi apoiu hadia sistema vijilánsia, prevensaun, kontrolu jestaun no kombate hasoru COVID-19 iha Timor.

Tamba ho rezultadu estabelesementu servisu foun sira ba laboratóriu, kuarentena, izolamentu, distribuisaun no armajenamentu vasina no medikamentu nian, tulun tebes hodi halakon efeitu sira husi propagasaun virus nian.

Alende ne’e, papél ida ne’ebé estende ba área mitigasaun ekonómika no sosiál, hanesan konsolidasaun ba sistema seguransa sosiál hodi halo distribuisaun subsídiu no apoiu sira ne’ebé simples no lalais liu ba família sira ne’ebé presiza liu.Tos

About

Grupo Média Nacional was founded on the 19th December, 2003 with the aim of contributing to the development of media in the newly independent Timor-Leste. In that respective year, "Jornal Nacional Semanário" weekly newspaper was launched and in 2005 the Group ... more

Phone: 3311441
Email: [email protected]
Address: Dom boaventura no 8, Bebora Dili, Timor Leste.

GMN Map

Copyright © 2021 GMN TV | All right reserved.
apartmentmap-marker