GMN TV Capital PR sei koalia ho titulár orgaun soberania hakotu impase polítiku ■ Taur sei nafatin Primeriu Ministru

PR sei koalia ho titulár orgaun soberania hakotu impase polítiku ■ Taur sei nafatin Primeriu Ministru

0 views

Prezidente Repúblika (PR), Francisco Guterres Lú Olo, deklara, proposta lei Orsamentu  Jeral Estadu (OJE) tinan 2020 la pasa ona iha Parlamentu Nasionál, tanba ne’e iha tempu  badak nia sei konvida  titulár orgaun soberania sira atu koalia hamutuk hodi solusiona impase polítiku ne’ebé dura to’o ohin loron.

PR Lú Olo mos afirma, kona-ba espekulasaun iha públiku normal, maibe Taur Matan Ruak sei nafatin asume knaar nu’udar Primeiru Ministru.

“Hanesan Prezidente Repúblika sei koalia ho tituláres orgaun soberania, liu-liu Primeiru  Ministru atu haree situasuan ida ne’e, hodi bele hakat liu impase ida ne’e, agora ha’u la bele fo uluk desizaun iha ne’e, ha’u sei iha tempu,  tama iha ha’u nia ajenda, atu ultrapasa situasaun ida ne’e, hodi lori Timor-Leste ba oin”,dehan Lú Olo ba  Jornalista sira Sábadu (18/01/2020) iha  Centro Convenções de Díli (CDD).

Lú Olo akresenta, nia seidauk bele hatete lolos loron ba sorumutu entre orgaun titulár sira ne’e. Maibe nia garante atu hasoru malu ho  orgaun titulár sobernia sira iha tempu badak.

“Ha’u hatene  katak agora  ne’e Governu laiha orsamentu ida, funsiona ho duadésimu deit mak la’o ba oin, ho duodésimu ita halo saida? halo saida ba ita-nia ekonomia Timor-Leste nian, no halo saida ba  ita-nia povu nia moris? Portanto  Prezidente Repúblika sei asume ida ne’e, iha ninia ajenda rasik atu tituláres orgaun soberania sira, liu liu Primeiru Ministru koalia kona-ba  asuntu ne’e.”tenik Lú Olo.

PR Lú Olo subliña liu tan,  to’o agora nia seidauk  simu  karta  ruma kona-ba OJE 2020 ne’ebé la pasa ne’e husi Pirmeiru Ministru, Taur Matan Ruak. Formalmente Primeiru Ministru halo deklarasaun iha Parlamentu Nasionál, nia akompaña, maibe ofisialmente nia seidauk simu surat ruma husi Primeriu Ministru.

“Kompetensia Prezidente Repúblika sei uza, bainhira rona tituláres orgaun soberania sira, sei rona  ida ne’e,  ne’e la’ós dehan Prezidente Repúlika tur-tur hola no hakotu kedan desizaun. Oras ne’e dadaun, ha’u  hakarak atu hatete  tan, biar orsamentu ne’e la pasa, maibe governu iha nafatin, Primeiru Ministru  Taur Matan Ruak, kontinua nafatin Primeiru Ministru,”hakotu Lú Olo.

Biban ne’e, Arsebispu Metropolitanu, Dioseze Díli, Dom Virgílio do Carmo da Silva, husu povu tomak atu halo orasaun ba líder polítiku sira atu bele rezolve tiha impase polítiku ne’e.

“To’o agora sira ne’ebé Parlamentu, ita mak fó fiar ba sira, uluk nanain hakarak apresia to’o agora dadaun ne’e, maske difikuldade no dezafiu hotu, krize impase ne’ebé  la’o  dezde tinan hira nia laran, povu nafatin hatudu ninia maturidade ne’ebé mantein nafatin unidade iha ita-nia rai-laran”,fundamenta Dom Virgílio.

Líder masimu Dioseze Díli ne’e nafatin husu ba povu tomak atu fó fiar ba nai ulun sira, husu nafatin nai ulun sira ezerse fiar ne’ebé povu fó, uza duni atu  servi povu ida ne’e.

“Entaun husu nafatin atu ita hakmatek, no fiar ne’ebé  ita fó keta dada fila-fali, ha’u husu mos  ba povu no sarani sira  reza mos ba ita-nia nai ulun sira, wainhira iha fuan malirin, neon malirin bele hetan dalan fó solusaun ba buat hotu”,tenik Dom Virgílio.Oly

 


Banner

Foto

Notisia Ikus

PPN-Konselleiru KHUNTO deskute plataforma entendimentu OJE 2022

September 24, 2021
Konselleiru máximu Partidu KHUNTO, José dos Sa...

Posibilidade semana oin, Governu sei la estende tan SS iha Díli

September 24, 2021
Diretór Sala Situasaun Sentru Integradu Jestaun...

FRETILIN: Ema balu tenta destrói amizade Taur-Alkatiri iha MedSos

September 23, 2021
Xefe bankada FRETILIN, Francisco Miranda Branco,...

Governu propoin PR Lú Olo renova EE

September 23, 2021
Governu kontinua propoin, ba Prezidente Repúbli...

Governu hakotu SS iha munisípiu tolu, Díli mantein

September 23, 2021
Governu iha reuniaun Konsellu Ministru (KM), Kua...
1 2 3 643

About

Grupo Média Nacional was founded on the 19th December, 2003 with the aim of contributing to the development of media in the newly independent Timor-Leste. In that respective year, "Jornal Nacional Semanário" weekly newspaper was launched and in 2005 the Group ... more

Phone: 3311441
Email: [email protected]
Address: Dom boaventura no 8, Bebora Dili, Timor Leste.

GMN Map

Copyright © 2021 GMN TV | All right reserved.
apartmentmap-marker