Ahi han ró Timor Agung Sionál, rezulta ema ida mate no ida kanek todan.
Insidente ne’e akontese Kinta (30/01/20) mais ou menus tuku tuku 7 kalan oras Timor-Leste.
Tuir informasaun husi Polísia, ahi ró ne’e akontese, tanba serkuitu husi bateria, kauza ba gazolina hodi rezulta ahi han ró ne’e.
Iha akontesimentu ne’e, PNTL identifika ema nain rua mak iha Ró laran, nain ida konsege haksoit sai husi Ró mak ho naran Lim Tjhai Khing, ne’ebé mak hala’o hela tratamentu iha Hospital Nasionál Guido Valadares (HNGV) , enkuantu vítima seluk ne’ebé salva nia ho naran kompletu Domingos Pio Soares de Sousa, sidadaun husi Atauro, ahi han motuk iha ró-laran.
Wainhira akontese tiha insindiu ekipa Bombeiro to’o iha fatin akontesimentu Sional hodi hamate ahi ne’ebé mak lako no hamutuk ho membru Unidade Polísia Marítima dada sai ró ne’e husi tasi laran mai ninin, hodi hasai mate isin ida iha ró laran, hodi transporta ba mortuáriu HNGV.
“Ami simu informasaun iha tuku 8 kalan oras Timor-Leste, depois ami sai kedas husi Kuartel Bombeiros mai iha Sional, depois too iha fatin akontesimentu ami hasoru difikuldade atu tama ba tasi-laran, entaun ami husu ajuda husi ita nia maluk sira Unidade Polísia Marítima apoiu spead boat tula ami dada ho manger hodi ba rega mate ahi ne’e”,esplika Komandante Korpu Bombeiros munisípiu Díli Fernando da Costa, ba jornalista sira Kinta (30/01/20), iha Sionál Díli.
Kazu ne’e, agora dadauk submete ona ba prosesu Investigasaun iha Polísia Nasionál Servisu Investigasaun Kriminál Díli.avi
