Sekretáriu Autoridade Munisípiu Díli (AMD), José Filipe Ximenez Smith, husu ba komunidade atu kuidadu fasilidade iha jardin sira ne’ebé Governu halo iha kapital Díli.
José Filipe Ximenez Smith hato’o lia hirak ne’e, relasiona ho fasilidade iha jardim sira ne’ebé governu monta iha kapital Díli ne’e, barak mak hetan estragus husi ema deskonisidu.
“Ha’u husu ba vizitór sira atu labele estraga fasilidades sira iha jardin laran, no soe lixu iha jardim laran, no ba fatin públiku sira tenke hatoman an soe foer iha liseira ne’ebé prepara tiha ona husi governu, tanba bainhira sidade Díli ne’e hakarak moos, ita hotu tenke halo kontribuisaun liu husi soe lixu iha nia fatin, nune’e sidade Díli mós no labele estraga fasilidades sira hanesan ahi, fiu nian ita haree ema deskonesidiu sira tesi hotu”, hateten José Filipe Ximenez Smith ba GMN iha nia kna’ar fatin Kaikoli Díli Tersa (25/02).
Sekretáriu Autoridade Munisípiu Díli ne’e mós, apela ba sidadaun sira ne’ebé hela iha Kapital Díli, banhira ho família pasa fin de semana iha Jardin sira iha kapital Díli, tenke hatoman aan soe lixu iha liseira.
“Iha biban ne’e mós hakarak hato’o ba sidadun sira hotu ne’ebé iha loron Domingu no loron feriadu ruma ho família halo refresin iha jardim sira atu hatoman aan soe lixu iha liseira fatin, nune’e ambiente iha jardim ne’e mós no furak”, katak Smith.
Antes ne’e, governu ho Autoridade Munisípiu Díli aviza ona iha fatin publiku sira atu sidadun hotu iha responsabilidade hodi kuidadu sidade Díli liu husi tau lixu iha liseira.aba
