ArseBispu Díoseze Díli, Dom Virgílio do Carmo da Silva SDB, hatete, dalan importante tolu ne’ebé sarani Katólika hotu, tenke banati no kumpri mak orasaun, ezmola no jezún, hodi refleta ba realidade moris, no hakbesik-an ba Maromak.
“Sasán rikusoin hotu, buat ne’ebé ita bolu provizóriu, nune’e mós ohin ita kontente, tanba hetan susesu no aban susesu ne’e ema seluk ninian, evanjellu hanorin ita, dalan tolu ne’ebé esensial atu iha kuarezma ne’e ita ida-idak buka kumpri ho neon ho laran, ha’u halo atu ema haree, ha’u halo tanba ha’u presiza”, haklaken Dom Virgílio bainhira prezide misa Kuarta feira sinza iha Igreja Katedral Díli, (26/02/2020).
Dom Virgílio afirma, dalan tolu importante mak esmola, orasaun, no jezún, buat hirak ne’e serve lori ema hotu hatene lolos realidade moris nian, orasaun liga ema ho Maromak, karidade liga ho maluk no belun sira, jezún mak ho aan rasik.
“Ne’e duni buat hirak ne’e atu halo, hodi hadomi liu Maromak, hadomi maun alin, no hadomi ita-nia aan rasik, Maromak, ema seluk, no ha’u nia aan rasik, ne’eduni kuarezma ne’e konvida ita atu haree ba iha ida ne’ebé, hatene hateke ba iha leten a’as ho orasaun, nune’e liberta ita husi hanoin hakraik nian, ne’ebé dala barak ita hotu preokupa, iha ne’ebé dala barak mós ita laiha tempu ba Maromak, tanba hanoin kona-bá liberdade nian”, salienta Dom. Virgilio.
Dom Virgílio afirma, kuarezma mós konvida sarani katólika sira atu hateke ba Maromak, liu husi orasaun, hafoin hateke ba ema seluk hodi halo karidade, no ikus mak konvida ema sira atu hateke ba aan, moris dalaruma fasil hateke ba leten no ba ema seluk, maibé hateke ba aan rasik la brani atu hasoru aan rasik, konfronta aan, atu hadia no rekonese aan rasik.
“Nune’e ho jezún tulun ha’u no ita atu liberta aan, hakarak halibur sasan ba aan deit, wainhira ita preokupa demais sasan sira mundu nian, halo ita nia fuan toos ita-nia fuan malirin hasoru ema seluk, no mós hasoru interese ema seluk nian, ne’e maluk doben sira orasaun, karidade, jezún mak investimentu ida ne’ebé dura ba nafatin”, tenik líder másimu Dioseze Díli ne’e.
PR Lú Olo: Kuarezma tempu reflesaun
Prezidente Repúblika (PR), Francisco Guterres Lú Olo, hateten, loron kuarezma hanesan tempu ba ema hotu atu halo reflesaun, hodi hakbesik aan ba Maromak.
Hafoin partisipa misa loron Sinza, ne’ebé hanesan loron dahuluk iha tempu kuarezma, Xefe Estadu ne’e haktuir, loron kuarezma loron ne’ebé lori sarani katólika tomak atu hakbesik aan ba Maromak.
“Ita hotu ohin tuir misa Sinza ninian, hodi ita hotu bele hahú halo reflesaun fila-fali ba ita-nia aan hanesan sarani ne’ebé iha relasaun ho Nai Maromak iha tempu ida ne’e dadauk, para hanoin hikas fali ba ita aan rasik no ba ita-nia moris rasik”, hateten Xefe Estadu ne’e ba Jornalista sira, hafoin partisipa misa Kuarta-Feira Sinza iha IGreja Katedral Díli, (26/02/2020).
Enkuantu bainhira jornalista tenta husu kona-ba asuntu polítiku, liga ba karta demisaun Primeiru Ministru nian ne’ebé entrega ona ba Xefe Estadu, maibé ema númeru um iha Timor-leste ne’e rezeita atu fó komentériu.
Misa Kuarta feira Sinza ne’e, prezide husi ArceBispu Dioseze Díli, Dom Virgílio do Carmo da Silva SDB, ho hetan partisipasaun másimu husi sarani Katólika ne’ebé partensia ba parokia ne’e.oly
