GMN TV Capital Konstrusaun esgotu la tuir padraun, Hamosu inundasaun iha kapital Díli

Konstrusaun esgotu la tuir padraun, Hamosu inundasaun iha kapital Díli

0 views

Iha loron Sabadu kalan Domingu (17/03) madrugada ne’e komunidade iha kapital Díli liu-liu iha Suku Kaikoli, Bidau, Comoro, enfrenta inundasaun bo’ot hodi estraga populasaun sira-nia sasan, tanba implika husi intensidade udan ne’ebé bo’ot durante oras tolu nia laran.

Inundsaun ne’e implika populasaun sira iha Aldeia 4 de Setembro  tenki hadeer hodi satan bee-foer ne’ebé maka tama sira nia uma, maibé bee ne’ebé maka resin iha esgotu ho volume ne’ebé maka maka’as, ho nune’e komunidade nia sasan lubuk ida maka bee estraga.

Reprezentante komunidade aldeia 4 de Setembro, suku Comoro, postu administrativu Dom Aleixo, munisípiu Díli, Angelo Quelo hateten, aldeia refere sempre akontese inundasaun wainhira tempu udan, tanba impaktu husi esgotu ninia medida ki’ik, nune’e la konsege halibur bee, tanba ne’e bee resin tenki tama fali ba komunidade nia hela fatin.

“Kada tinan ami nia bairru ne’e sempre akontese bee sa’e, tanba iha tinan kotuk kompañia ida mai halo esgotu, maibé ki’ik liu, ho nune’e wainhira tempu udan bee nia forsa ás liu, tanba bee ne’ebé suli husi Golgota hala’i tún mai konsentra iha esgotu ne’e, entaun bee resin tama ema nia uma no horikalan bee sa’e kuaze metru ida ho balun”, komunidade aldeia 4 de Setembro refere ba GMN iha ninia hela fatin, aldeia 4 de Setembro-Díli, Domingu (17-03-2019).

Nia esplika, udan bo’ot ne’ebé akontese iha loron Domingu madrugada ne’e, halo komunidade hotu senti pániku no sasan uma laran balun hanesan fós konsege salva, maibé sira seluk la konsege, tanba bee kuaze sa’e metru ida ho balun.

“Kona-bá problema ne’e autoridade lokal hatene ona, tanba ne’e la’os foin primeira vez, maibé sempre akontese wainhira tempu udan, ho durasaun tempu ne’ebé kle’ur, tanba horikalan kuaze oras ida ho balun de’it, maibé bee sa’e metru ida ho balun, ita la hatene sé udan boot iha oras 4 ou 5 nia laran, parese komunidade nia uma la aproveita hotu ona karik”, dehan Angelo.

Relasiona ho problema ne’e, komunidade sira husu ba Governu atu monta fali esgotu ne’ebé boot, ho nune’e la bele fó risku ba komunidade sira wainhira iha tempu udan.

Iha fatin hanesan vítima husi inundasaun, Aniceto Tome heteten, sasan uma laran ne’ebé konsege salva maka hanesan televizaun 2 no sira seluk la bele salva, tanba wainhira hadeer mai, bee tama tiha ona uma laran.

“Ha’u nia sasan ne’ebé hetan estragus maka hanesan fós, kulusaun, ropa, inklui animal sira hanesan manu no sira seluk tan, tanba bee sa’e ne’e iha kalan boot no wainhira ha’u hadeer mai bee sa’e hotu ona”, esplika Aniceto.

Entretantu udan boot ne’ebé akontese iha loron Domingu (17/03) madrugada ne’e kuaze hamosu inundasaun iha bairru-bairru, liu-liu iha bairru ne’ebé risku ba inundasaun no rai hala’i.

Uma kain 100 kona inundasaun

Udan bo’ot ne’ebé akontese iha  Sabadu kalan, (Domingu dader),  uma kain 100  iha Aldeia Mota Klaran, Suku Bidau Santana, Postu Administrativu Cristo-Rei  Munisipiu Díli, hetan inundasaun.

Komunidade sira ne’ebé afetadu husi inundasaun ne’e, senti preokupa ho mota Bidau ne’e, tanba bee sa’e komunidade nia uma hodi estraga komunidade nia sasan.

 “Ami senti preokupa tebes ho mota Bidau, tanba udan ne’ebé akontese iha Domingu madrugada  ne’e, bee sa’e  hodi tama ami nia uma, tanba volume bee maka’as, halai latuir nia dalan,  tanba mota ne’e mós komesa badak dadauk ona, hodi bee resin no tama komunidade nia uma”, hateten Galiano Sebastião Gailos ba GMN iha Bidau Santana Domingu Díli (17/03).

Nia hatutan, mesmu mota ne’e bo’ot, maibé lato’o atu akumula hotu bee mota ne’ebé volume maka’as.

Tanba ne’e, komunidade sira ne’ebé hetan inundasaun ne’e, ezije ba Ministériu kompotente atu tau konsiderasaun hodi resolve problema ne’e.

Iha fatin hanesan, Xefe Suku Bidau Santana, João Paulo de Andrade, preokupa ho inundasaun  ne’e, tanba mota refere nokonu ho rai henek, nune’e bee sa’e to’o komunidade nia hela fatin, no estraga komunidade nia sasan uma laran.

“Husu ba  Ministériu Obras Publikas atu halo intervensaun hodi normaliza situasaun ne’e”,  katak João.

Entretantu, Suku Bidau Santana iha Aldeia hat, kompostu  Bidau Mota Klaran, Manu mata, Toko Baru no Sagrada Família.

Eletrisidade soke irman Carmelita na’in 4

Iha Domingu (17/03) madrugada ne’e,  eletrisidade soke irman Kongregasaun Carmelita na’in 4, iha Kongregasaun  Carmelita Surikmas.

Responsavel Kongregasaun  Carmelita, madre Domingas dos Santos Gaudinho informa, eletrisidade soke madre Carmelita na’in hat ne’e, akontese iha  portaun tama ba Kongregasaun  Carmelita nian,   tanba iha problema ho fiu iha portaun, tanba rezidensia Kongregasaun  Carmelita hetan inundasaun.

“Impaktu husi udan bo’ot ne’ebé akontese iha Domingu ne’e, bainhira madre nain 4 sai atu taka ahi iha portaun, maibé madre nain hat eletridade soke tiha, nune’e sira monu bee laran, tanba eletresidade soke. Tinan –tinan inundasaun sempre akontese iha ne’e,  tanba laiha baleta, at liu tan bainhira Patraun Mauhoka  halo uma hodi taka tiha bee dalan”,  hateten madre Domingas Dos Santos Gaudinho ba GMN iha Surik Mas, Díli Domingu (17/03).

Nia Dehan Tinan tinan sempre akontese Inunudasaun tanba laiha valeta be dalan alende nee impaktu mos husi patraun Mauhoka ne’ebe halo  residensia no moro hodi taka bee dalan nune fo impaktu ba komunidade sira ne’ebe hela iha fatin ne’eba bee tama Madre no komunidade sira nia hela fatin hateten Madre Domingas

Alende ne’e, joven Nilton Vitorino da Costa, hateten, problema inundasaun la’os akontese de’it iha fatin ida, maibe akontese iha kapital Díli tomak.

“Bairo Aimutin kuaze obralan la aproveita, tanba bee lori hotu, iha eskola Darma Bakti, komunidade sira ne’ebé hela iha área ne’e afetadu hotu, tanba tanba laiha valeta”, katak Nilton.

Entretantu iha Domingu Loron 17 fulan ne’e, Ministériu Obras Públikas organiza Jestaun Equipamentus hodi normaliza rai halai iha área Lahane.ita/aba   


Banner

Foto

Notisia Ikus

FRETILIN: Ema balu tenta destrói amizade Taur-Alkatiri iha MedSos

September 23, 2021
Xefe bankada FRETILIN, Francisco Miranda Branco,...

Governu propoin PR Lú Olo renova EE

September 23, 2021
Governu kontinua propoin, ba Prezidente Repúbli...

Governu hakotu SS iha munisípiu tolu, Díli mantein

September 23, 2021
Governu iha reuniaun Konsellu Ministru (KM), Kua...

Governu preparadu antesipa La Niña

September 22, 2021
Sekretariu Estadu Protesaun Sivíl (SEPS), hala...

FP mate, naran nafatin iha lista liña frente, KFP tenke investiga

September 22, 2021
Parlamentu Nasionál (PN), liu hosi bankada CNRT...
1 2 3 643

About

Grupo Média Nacional was founded on the 19th December, 2003 with the aim of contributing to the development of media in the newly independent Timor-Leste. In that respective year, "Jornal Nacional Semanário" weekly newspaper was launched and in 2005 the Group ... more

Phone: 3311441
Email: [email protected]
Address: Dom boaventura no 8, Bebora Dili, Timor Leste.

GMN Map

Copyright © 2021 GMN TV | All right reserved.
apartmentmap-marker