Diretór Jeral, Servisu Agua no Saneamentu (SAS), Gustavo da Cruz hatete, objetivu husi atividade monta tanki bee iha kapital Díli, atu fasilita komunidade fase liman bebeik hodi evita pandemia Corona Virus Disease 2019 (COVID-19) labele hadaet.
“Ami mós tenki instala tanki públiku iha fatin ne’ebé iha díli laran, para ita nia komunidade atu fase liman, ida ne’e ami hetan kooperasaun diak ho UNICEF, parseiria ho ami para ami bele, halo prevensaun lalais,ha’u espera katak antes sesta feira ne’e iha fatin públiku sira ne’e ami bele instala, agora dadaun tanki iha ona,bee iha para ami tau sasan sira ne’e, ha’u nia tenki sira halo hela, soke ninia hatu’ur tanki fatin ne’e maka ami tenki solda, para hatu’ur iha fatin públiku ne’ebé tuir dadus ne’ebé entre ministeiru saúde ho UNICEF indika mai ami”, hatete, Diretór Jeral SAS Gustavo da Cruz,ba GMN iha nia kna’ar fatin Caicoli Díli, Kuarta (25/03/2020).
Gustavo mós husu komunidade atu koopera hodi labele estraga fasilidade hirak ne’e, bainhira governu monta ona.
“Hau hanoin ba komunidade sira, liu-liu iha kapital Dili, hanoin katak COVID-19 ne’e perigo tebes ba saúde públiku, saida maka ministeiru saúde fó sai tenki kumpri, sei la iha nesesidade diak liu hakmatek iha uma, atu labele halo movimentu barak, karik iha loron iha nia laran ami monta tanki ho torneira, hodi fase liman ho sabaun iha fatin públiku sira husu atu kuidadu fasilidade sira ne’e ba iha ita nia saúde públiku”. Dehan, Gustavo da Cruz .
Entertantu, tanki refere, sei monta iha estações 24, hanesan iha merkadu, no fatin ne’ebé komunidade sira hamri’ik hodi sa’e transporte públiku.Jen
