Atu halo prevensaun ba Corona Virus Disease (COVID-19), Ministériu Saúde liu husi Diresaun Saúde Públika (DSP) hamutuk ho Organizasaun Mundial Saúde (OMS) halo advokasia no disemina informasaun konaba COVID-19 ba Arche Bispo Dom Vírgilio do Carmo da Silva SDB, Padre no Madre sira iha Dioseze Díli.
“Ami mai iha Dioseze Díli, atu halo advokasia no disemina informasaun konaba virus covid-19 ba Arche no Bispo inklui Padre no Madre Dioseze Díli”, dehan Diretóra DSP, Isabel Maria Gomes, ba Jornalista sira Kinta (12/03/2020) iha Bidau Lecidere Díli.
Diretóra ne’e informa, papel igreja importante tebes tanba bainhira iha atividade religiosa sempre konsentra sarani barak, ho nune’e ami mai fahe informasaun covid-19 ba Dioseze hodi hatutan hikas ba sarani sira, oinsa halo prevensaun ba virus refere.
“Ami nia diseminasaun ne’e, atu hato’o informasaun ba Padre no Madre sira konaba, oinsa nia transmisaun no oinsa nia prevensaun. Maneira diak atu halo prevensaun ba moras covid-19 mak liu hosi hijene pesoal hanesan fase liman, uza maskra no tein hahan tenka tasak diak”.
Reprezentante OMS, Luis dos Reis, hatete objetivu hosi advokasia ne’e atu fó informasaun lolos ba Nai-Lulik no Madre sira iha Dioseze Díli, konaba saida mak moras covid-19, moras ne’e mai hosi ne’ebé no nia hadaet oinsa.
“Importante liu mak atu fó informasaun lolos konaba, maneira preventiva atu igreja bele kontribui makas hodi asegura katak, moras covid-19 labele tama iha Timor tanba oras ne’e Timor seidauk iha kazu ba moras refere”afirma Luis dos Reis.
Nia afirma, Ministériu Saúde ho OMS so desimina informasaun tekniku deit, maibé atu hare ba parte igreja oinsa atu halo misa, tanba iha igreja bainhira halo misa sempre iha ritmu kaer liman, fó ostia hosi padre no madre sira inklui bainhira misa remata kaer liman no rei malu.
“Ami presiza enkontru fali ho parte igreja, hodi rona desizaun saida mak igreja foti no maneira saida mak igreja uza hodi halo prevensaun ba moras covid-19, tanba ami hare igreja mós preokupasaun konaba moras refere”.
Maneira diak halo prevensaun mak, karik hasoru malu ho kualker amigo evita atu karte liman no rei malu, maibé bele kaer liman no maneira taka liman nune’e bele evita moras ne’e kona ita.
Vigariu Episkopal Asuntu Pastorál, Padre Jovito Rego, hatete prevensaun ba moras covid-19 importante tanba moras refere daet ona ba Nasaun bo’ot sira, maibé Timor seidauk tanba ne’e ita presiza prevensaun.
“Ita agradese ba maromak tanba Timor seidauk iha kazu ba covid-19, maibé la signifika ita ses hosi moras ne’e entaun bainhira virus ne’e tama iha Timor, meus saida mak ita uza hodi hasoru moras ne’e.Desiminasaun ne’e hanesan enkontru prevensaun ida hodi dada atensaun ema nian hodi kuidadu inklui husu Amu-Lulik atu hatutan informasaun ne’e ba sarani “.
Padre Jovito haktuir, prevensaun hosi uma kreda ita hein Amu Bispo sira sei halo reuniaun konferensia episkopal, hodi foti desizaun saida ba Dioseze 3 Díli Maliana no Baukau.Oras ne’e igreja konsiente hela ho situasaun maibé seidauk hola medida maske iha ona hanoin no preprasaun hosi Bispo sira.Fel
