Governu muda provizóriu Terminal Tasi-Tolu ba área tasi-ibun, tanba dadaun ne’e kompañia sei reabilita hela estrada husi Rotunda Comoro, to’o Tasi-Tolu.
Diretór Nasionál Ministériu Transporte no Komunikasaun (MTK), Gaspar de Araújo hatete, Diresaun Nasionál Transporte Terrestre servisu hamutuk ho Polísia Tránzitu sei organiza transporte públiku atu tula pasajeiru iha deit terminal provizóriu área tasi ibun nian, Tasi-Tolu nian.
“Konstrusaun estrada iha Tasi-Tolu, tan ne’e ita presiza haree terminal temporária ba transporte públiku sira, ita hetan ona fatin iha ne’e, para depois ita koordena ho empreza sei prepara dalan tama no dalan sai, nune’e transporte sira para temporariamente iha ne’e, nune’e labele prejudika prosesu konstrusaun estrada ne’ebé agora dadauk halo hela ne’e,” dehan Diretór Jerál MTK ne’e, iha Díli semana kotuk.
Komandante Polísia Tránzitu Munisípiu Díli, Inspetór Domingos Sarmento afirma, PNTL sei organiza transporte públiku sira atu para iha terminal provizóriu ne’ebé Governu prepara, nune’e bele tula pasajeiru.
“Ami identifika ona katak, ida ne’e bele ona sai hanesan terminal temporária para ita kanaliza transporte públiku, liu-liu Bis Kota, Bis, Mikrolet ita hatama hotu iha ne’ebá para hatun pasajeirus” katak Inspetór Domingos Sarmento.
Tuir planu, iha Sesta semana kotuk, terminal provizóriu ne’e funsiona ona. Terminal provizóriu ne’e sei akumula transporte públiku sira hanesan Bus diresaun Maliana, Ermera, Liquiça no mós Mikrolete sira durante fulan ida. Bainhira motorista sira la obdese desizaun ne’e sei hetan sansaun.GMN
