Deputada bankada PLP, Regina Freitas, konsidera, Governu realiza limpeza jerál iha sidade, maibe la sériu, tanba barak liu halo limpeza iha tasi ibun, la’ós tama-sai bairro.
Reprezentante povu ne’e rekomenda ba Governu, atu mobiliza mós populasaun hodi halo limpeza tama sai bairro ho regularmente, la’os konsentra de’it iha Estrada protokolu ka tasi ibun sira.
“Limpeza ne’ebé organiza hosi Governu ne’e, hala’o de’it hosi Motael nian ba to’o Lecidere de’it, maibe ita hotu hatene, moras (dengue) ne’e maka’as liu iha sidade Díli (bairro sira) tanba ne’e mak se bele karik Governu organiza para depois akompaña mós ho komunidade sira hosi suku no postu ne’ebé pretense ba, tenke partisipa mós hosi populasaun no autoridade lokál sira, para limpeza ne’e pelu menus modelu limpeza nian duni, tanba sela’e loron tomak sira la servisu, maibe limpeza la’o tuir de’it dalan, depois dalaruma la’os de’it to’o tasi ibun dehan limpeza ona. Se hakarak halo duni limpeza, di’akliu tama sai bairro, suku no postu sira iha sidade laran.”afirma deputada PLP ne’e iha plenária (05/04/2022)
Alende ne’e, deputada Lídia Norberta mós husu Governu atu fó atensaun mós ba traballadór saneamentu sira, liu-liu ekipamentu protesaun.
“Ami kontinua lamenta bebeik, MAE ho munisípiu Díli ladun kontrola traballadór sira ne’ebé mak foti lixu, ita haree ita nia maluk funsionáriu sira servisu foti lixu ne’e balun iha lixu maibe barak mak laiha, balun tama ba lixu laran uza sínelus babain ne’e, botas de’it laiha, se bele karik haree kondisaun ida ne’e. Husu ba Governu, bainhira halo kontratu ho kompañia karik haree didi’ak seguransa ba traballadór, hodi nune’e labele afeita fali ba traballadór to’o ikus kria prezuizu ba ita nia nasaun.”kestiona deputada FRETILIN ne’e.
Primeiru Ministru, Taur Matan Ruak, iha tinan 2019 hasai sírkular ida, liuhosi aprovasaun rezolusaun númeru 8/2019/ kona-bá limpeza jerál iha Sesta-feira kada últimu fulan ida nian ne’ebé envolve funsionáriu estadu, Governu ho entidades hotu atu halo limpeza jerál iha sidade Díli.Say
