GMN TV Capital Preparasaun ba selebrasaun 20 Maiu, Governu lufu-lafu de’it

Preparasaun ba selebrasaun 20 Maiu, Governu lufu-lafu de’it

0 views

Parlamentu Nasionál (PN), konsidera preparasaun ba selebrasaun 20 Maiu restaurasaun independensia Timor-Leste ba dala 15, Governu lufu lafu de’it, hodi halo osan Estadu mós sai emerjensia hotu, tanba laiha planu adekuadu.

Deputadu Francisco Branco husi bankada FRETILIN hateten katak, dala barak PN foti kestaun kona ba preparativus ba selebrasaun loron bo’ot atu Governu halo preparasaun antes fulan nen, maibe kontinua ezisti.

 “Ami haree Governu atu halo re-estabelesimentu jardim sira iha ita nian capital, ba festa selebrasaun tinan 15 restaurasaun independensia nian. Ami hanoin ida ne’e ita lufu-lafu de’it, kuandu ita lufu-lafu buat hotu sei la di’ak, ita fakar de’it osan, laiha nesesidade ida,”dehan Francisco Branco ba Plenária PN, Segunda (24/04).

Nia hatutan, PN konsidera  preparasaun ida ne’e lufu-lafu de’it, tanba kuandu iha selebrasaun independensia TL ba dala 15 ne’e mak iha konvidadus espesial husi nasaun seluk mai, sira la’os atu ba haree TL nia jardin sira.

Francisco Branco dehan, jardim ne’e fatin ba populasaun sira iha capital Dili, tanba ne’e, la presiza atu lufu lafu jardim sira ne’e iha selebrasaun loron bo’ot TL nian hanesan ne’e.

“Tanba ne’e, husi pontu devista amia nian, ami fó hanoin katak, la presija atu ita lufu-lafu hadia fila fali jardim sira iha capital Dili ne’e, tanba de’it selebrasaun ita nian restaurasaun independensia ba tinan 15 ne’e,”dehan Francisco Branco.

Tuir Francisco Branco katak, jardim sira iha capital Dili ne’e, laiha planeamentu di’ak, tanba jardim sira ne’e kuandu iha loron bo’ot, Governu komesa lufu-lafu hodi fakar osan, loron bo’ot liu tiha loron rua tolu, jardim nia oin la koñese ona.

“Ida ne’e problema tanba ita halo projetu sira ne’e, la kalkula se mak autoridade atu halo jestaun ba projetu sira ne’e, kuandu projetu ne’e hotu. Ha’u hanoin públiku mós iha responsabilidade atu kuida didi’ak ita nia jardim sira ne’e,” dehan Branco.

Alende ne’e, deputadu Adriano do Nacimento  husi bankada PD mós dehan, Governu iha tendensia ida atu halo buat ida ne’ebé la’os karakter permanente.

“Selebrasaun ida mosu ita halo buat ida emerjensia, osan ne’e sai juta ba juta, depois iha loron hira de’it nia laran hotu ona, ba oin ita atu aproveita laiha ona,” katak Adriano.

Nune’e mós, deputadu Manuel de Castro husi bankada FRETILIN mós lamenta katak, dalabarak ona situasaun ida ne’e akontese iha selebrasaun loron bo’ot sira TL nian.

“Iha festa selebrasaun lubuk ida ona mak ita haree, sira halo rohan oan ida, sorin so’e hela. Ezemplu mak jardim ida Igreja Motael nia oin ne’e, ba tasi mós ita so’e hela, mai sorin mós ita soe hela,” dehan Manuel Castro.

Tanba ne’e, nia husu ba Governu atu rai ida ne’e ba oin, tenki halo planu ho di’ak mak foin hala’o, hodi labele fakar osan estraga de’it.cos


Banner

Foto

Notisia Ikus

PN kestiona PolTranz “falla”, Komandante PolTranz husu Deskulpa

October 15, 2021
Parlamentu Nasional (PN) liu husi Deputadu Komis...

Posibilidade CNRT sei la akompaña Governu hala'o kampaña vasinasaun

October 15, 2021
Deputadu sira iha Parlamentu Nasionál (PN) ohin...

Ohin, Governu aprezenta OJE 2022 ba PN

October 15, 2021
Governu aprezenta Orsamentu Jerál Estadu (OJE) ...

Governu kontinua “alerta” FP la vasina, sei la tama servisu

October 14, 2021
Ministru Prezidensia Konsellu Ministru, Fidelis ...

SEAKLN “defende” veteranu la impede dezenvolvimentu

October 14, 2021
Sekretáriu Estadu Asuntu Kombatentes Libertasau...
1 2 3 652

About

Grupo Média Nacional was founded on the 19th December, 2003 with the aim of contributing to the development of media in the newly independent Timor-Leste. In that respective year, "Jornal Nacional Semanário" weekly newspaper was launched and in 2005 the Group ... more

Phone: 3311441
Email: [email protected]
Address: Dom boaventura no 8, Bebora Dili, Timor Leste.

GMN Map

Copyright © 2021 GMN TV | All right reserved.
apartmentmap-marker