Prezidente Konsellu Fundasaun Alola, Kirsty Sword Gusmão, apresia ba persentajen feto Timor-Leste iha Parlamentu Nasional(PN) atinji ona porsentu 33.
Nia hatutan, maski partisipasaun feto iha PN atinji ona 33%, maibé iha órgaun governu nian partisipasaun feto sei menus liu kompara ho mane.
Tanba ne’e Kisrty Gusmão hateten, sei servisu hamutuk ho instituisaun relevante sira atu involve feto hodi okupa pozisaun sira iha governu ho persentajen ne’ebé hanesan mane sira.
Kisrty Gusmão hato’o lia hirak ne’e iha selebrasaun aniversáriu fundasaun alola ba dala sanulu resin hitu iha Maskarinhas foin lalais.
“Ha’u apresia tebes paktu reprezentasaun feto iha Parlamentu Nasional atinji 33%, maski nune’e mehi mak 50% husi Parlamentu Nasional bele sai feto maibe ita mos labele haluha katak haree ba persentajem feto maluk sira iha parlamentu, TL numeru 1 iha ASIA, infelismentu numeru feto iha governu tuun, ne’e mos dezafiu boot ida mai ita atu garante katak feto sira bele okupa pozisaun aas iha governu, bazeia ba sira nia matenek no responabildiade ba nasaun,” hatoo Kirsty Gusmão, iha nia diskursu.
Iha fatin hanesan Ministra Edukasaun Juventudi no Desportu, Dulce de Jesus Soares, apresia ho servisu no esforsu Fundasaun Alola nian hodi kontribui ba dezenvolvimentu rekursus humanus liu-liu ba feto sira nia kualidade edukasaun.
Maski seidauk iha peskiza profundu ida konaba partisipasaun feto iha vida polítika liu-liu iha parlamentu sira iha mundu maibé prezidenti fundasaun alola konsidera ho partisipasaun feto timor leste iha parlamentu ne’ebé atinji porsentu 33 nu’udar númeru um iha ázia pasífiku.ías
