GMN TV Capital PM TAUR: GOVERNU SEI TAU REGRA UZA BEE MOOS ■PUDD REKOMENDA PESKIZA BEE MATAN

PM TAUR: GOVERNU SEI TAU REGRA UZA BEE MOOS ■PUDD REKOMENDA PESKIZA BEE MATAN

0 views

Atu halo jestaun bee moos diak ba populasaun, VIII Governu konstitusional sei tau regra ba utilizador bee moos iha territóriu Timor laran tomak, nu’udar kultura atu ema hotu uza bee moos ho disiplina, hatete Primeiru Ministru (PM), Taur Matan Ruak, iha plenária diskusaun no apresiasaun programa ba loron datoluk nian iha Parlamentu Nasionál (PN), Sesta (27/07/2018).

Xefi Governu ne’e rekoñese, jestaun bee moos iha Timor-Leste seidauk di’ak no sei iha difikuldade, tanba konsumidor barak seidauk iha konsiensia hodi utiliza bee moos ho kualidade.

“Konaba jestaun bee ne’e ita sei fraku, ita iha difikuldade, liu-liu tanba konsumidor sira laiha disiplina, maibe ita mós la impoin regra, tanba ne’e, karik ita hakarak jestaun ida di’ak, ita tenke impoin regra, regra ida mak sira tenke selu. Hanesan ha’u haree esperiensia ida iha Iliomar-Lospalos, iha suku sira-nia jestaun bee di’ak, se mak hakarak bee to’o uma, tenke selu osan $5 kada fulan, se mak iha públiku $1 de’it, ne’e bee nunka falta, karik jestaun ladi’ak, sira iha medida, tanba ne’e mak ita tenke hadía jestaun,”dehan TMR.

Eis Prezidente Repúblika ne’e mós hatete, Governu presiza implementa duni regra ne’e, no sei válidu ba sidadaun hotu, la’os ba autoridade de’it mak atu kumpri, atu nune’e ema hotu bele iha disiplina iha utilizasaun bee moos.

“Ita tenke impoin disiplina, la’os de’it autoridade sira mak atu kumpri lei, impoin atu ema seluk mós kumpri lei, tanba normalmente, sidadaun sira ezije bo’ot sira atu kumpri lei, maibe sira rasik lakohi kumpri, ita husik de’it labele, ministériu kompetente ami ko’alia ida ne’e dala rua ka tolu ona, konaba sistema jestaun, liu-liu antes ida ne’e, hadiak mós instituisaun ne’ebé jere bee,”PM Taur afirma.

Iha prosesu diskusaun no apresiasaun programa VIII Governu ba datoluk nian ne’e, deputadu husi bankada PUDD, Antonio de Sá Benevides, mós rekomenda ba VIII Governu atu bele halo identifikasaun ba bee matan hotu iha territóriu Timor laran tomak, antes atu kanaliza ba sosiedade.

“Haree komunidade barak mak sei hasoru problema bee moos, tanba ne’e hau rekomenda, karik bele governu tau konsiderasaun ba halo identifikasaun ba ita nia bee matan sira ne’e, ita presiza hatene, bee matan iha Timor laran tomak ne’e iha ka lae? No hira?, no ita presiza halo protesaun, hafoin ita halo kanalizasaun ne’ebé ho kualidade no kontinua halo manutensaun,”dehan Antonio de Sá Benevides.

Enkuantu hatan ba rekomendasaun ne’e, eis Xefi Estadu Taur Matan Ruak, hatete, VIII Governu simu sujestaun refere, nu’udar dalan di’ak atu bele kontinua asegura bee moos ba sosiedade hotu. Lei extradisaun TL sdk iha; Dupla sidadania, kestaun interpol? Talves levanta kestaun la relevante.!!

Alende ne’e, deputadu PUDD ne’e mós sujere ba VIII Governu, atu bele halo manutensaun ba estrada ho rutina no períodika.

Tanba tuir deputadu ne’e, kualidade estrada ne’ebé durante ne’e hamosu dúvida iha públiku, tanba laiha mauntensaun.

“Dala barak ema dehan estrada sira iha tempu Indonesia nian ne’e di’ak liu fali agora, sera que iha tempu ne’eba ne’e ekipamentu limitadu hela, duke agora ne’ebé ita dehan level aas no teknolojia maka’as, maibe estrada ne’e dehan kualidade laiha fali, ha’u hanoin problema ne’e jestaun karik? manutensaun mak laiha, tanba ne’e, ha’u hanoin manutensaun iha tipu 3 ne’ebé ita presiza konsidera mak, manutensaun rutina, manutensaun períodika no halo melloramentu,  ida ne’e problema ne’ebé ita presiza konsidera duni, ”dehan deputadu PUDD Antonio de Sá Benevides.

Iha diskusaun no apresiasaun programa ba loron datoluk nian ne’e, deputadu sira husi bankada opozisaun, FRETILIN, PD no PUDD, kontinua halo diskusaun ba programa ho área importante sira, hanesan edukasaun, saúde, infra-estrutura, agrikultura, saneamentu, rodaviária no seluk tan ne’ebé nu’udar fator importante ba nesesidade povu nian no ba dezenvovlimentu nasaun nian.Say


Banner

Foto

Notisia Ikus

PR Lú Olo preokupa instabilidade kontinua mosu iha rai-laran

December 2, 2021
Xefe Estadu Maior Jenerál FALINTIL-Forsa Defeza...

PN hahú diskute proposta OJE 2022 billiaun 1.675 iha faze jeneralidade

December 2, 2021
Parlamentu Nasionál (PN) kinta lejislatura, Kua...

PM Taur: Situasaun Tolu Implika PIB TL tun ba Negativu 8

December 2, 2021
[caption id="attachment_43754" align="aligncenter"...

OJE 2022, Governu Prevé Millaun 25 ba Subsídiu FP

December 2, 2021
Parlamentu Nasionál (PN) Kinta lejislatura, Kua...

KM Aprova Projetu Deliberasaun no Ezonerasaun ba Calisto dos Santos “Coliati”

December 2, 2021
[caption id="attachment_52724" align="aligncenter"...
1 2 3 668

About

Grupo Média Nacional was founded on the 19th December, 2003 with the aim of contributing to the development of media in the newly independent Timor-Leste. In that respective year, "Jornal Nacional Semanário" weekly newspaper was launched and in 2005 the Group ... more

Phone: 3311441
Email: [email protected]
Address: Dom boaventura no 8, Bebora Dili, Timor Leste.

GMN Map

Copyright © 2021 GMN TV | All right reserved.
apartmentmap-marker