GMN TV Capital Governu sei fó apoiu emerjénsia ba vítima inséndiu iha eis merkadu Comoro

Governu sei fó apoiu emerjénsia ba vítima inséndiu iha eis merkadu Comoro

14 views

Governu liu husi Vise Ministra Solidariedade Sosiál no Inkluzaun (MSSI), Signi Chandrawati Verdial, promete  katak, sei fó apoiu  emerjénsia ba vítima inséndiu sira iha eis merkadu Comoro, maibé  sei halo uluk  identifikasaun ba uma kain hira mak afetadu ba iha akontesimentu refere.

“Husi MSSI nian  ita servisu konjuntu, hamutuk ho Protesaun  Sivíl, Cruz Vermelha de Timor-Leste, oinsa atu hatuan apoiu konjunta mai. Neste momento sira enkontru tun mai rekolla dadus, ita tenta lalais apoiu  ita-nia komunidade  presiza  lalais mai ohin loron  ida ne’e mak  ita halo”,dehan Signi Verdial iha fatin akontesimentu inséndiu eis merkadu Comoro.

Signi Verdial haktuir tan, kona-bá atu harii fali uma ba komunidade sira,  ne’e kompeténsia iha Ministériu Administrasaun Estatal, tanba sira harii ona uma ba kbi’it laek sira.

“Agora  iha 24 oras ita tenke  asegura lai ita-nia komunidade iha fatin seguru no ai-han, sira bele toba iha fatin diak, depois faze tuir mai mak  ita haree ba faze konstrusaun fízika” Signi Verdial

Ahi han  uma  kuaze 100 resin  iha eis merkadu Comoro, no komunidade nia sasán  kuaze la salva. Husi akontesimentu ne’e Polísia Nasionál Servisu Investigasaun Kriminál Nasionál  (PNSIK), detein ona suspeitu.

Inséndiu ne’e akontese Kinta (29/07/2021) mais ou menus tuku 03:00, madruugada oras Timor-Leste, iha eis merkadu Comoro,  Postu Administrativu Dom Aleixo, Munisípiu Díli.

Husi akontesimentu inséndu ne’e, parte Servisu Bombeiros to’o iha fatin hodi hamate ahi ne’ebé mak lakan, maibé komunidade  nia sasán labele salva.

“Ha’u reprezentante juventude iha  bairu ida ne’e rekomenda ba Governu no parseiru dezenvolvimentu atu apoiu ami kalen no ai ruma, hodi bele harii fali ami-nia uma hodi sai netik mahon ba ami. Ami barak hanesan ne’e atu hela ba família sira  araska, tanba iha situasaun Estadu Emerjénsia ne’ebé família hahán laiha, automatikamente araska liu”,esplika Abitante Estaque Fernandes, ba JNDiário, iha eis merkadu Comoro, Díli.

Abitante Estaque Fernandes, husu ba Governu atu fó apoiu ajudu ba sira, tanba   vítima inséndiu sira dadauk ne’e lakon sasán uma-laran no sasán ne’ebé mak sira fa’an barak  mak ahi han.

Alende sasán uma-laran, sasán kioske, animal balun no motorizada ida no kareta Taxi ida, mos ahi han hotu.

Tuir informasaun balun ne’ebé mak GMN hetan iha terrenu husi membru Polísia katak inséndu ne’e akontese tanba deskonfia ema deskoñesidu mak sunu.

To’o notísia ne’e publika, GMN seidauk hetan dadus kompletu husi autoridade lokál kona-bá númeru vítima afetadu ba inséndiu, tanba ekipa  Servisu Protesaun Sivíl sei rekolla hela dadus husi komunidade.

Iha parte seluk, Porta-Voz PNTL Superintendente Xefe Arnaldo Araújo liu husi konferénsia imprensa  hateten, PNSIK ho Polísia Eskuadra Dom Aleixo  kaptura ona suspeitu  ho inisiál F.A.A.T, tanba deskonfia sunu uma iha eis merkadu Comoro.

 “Iha  insidente ida akontese iha área Aldeia 02, Suku Fatuhada,  Postu Administrativu Dom Aleixo, Munisípiu Díli, ne’ebé ahi han uma  iha área eis merkadu Comoro, hafoin insidente ne’e husi Servisu Investigasaun Kriminál  Nasionál servisu  konjuntu  ho komando PNTL Eskuadra Dom Aleixo  duni tuir kedas suspeitu no tuku lima madrugada, ekipa identifika  suspeitu komete tan aktu krime hodi harahun vidru iha corpu diplomatiku Nova Zelandia nian iha área Praia dos Coqueiros no imediata kaptura kedas  suspeitu iha fatin refere  hodi transporta mai iha edifísiu PNSIK”,dehan Arnaldo Araújo.

Arnaldo de Araújo, dehan, dentru prosesu identifikasaun  investigadór identifika suspeitu  ho inisiál F.A.A. T ba aktu krime iha konkursu kódigu penál, artigu 35, inséndiu kódigu penál artigu 263, danu agravadu kódigu penál artigu 259. Ho ida ne’e investigadór prepara ona auto notísia flagrante delitu ho númeru NUC0397/21/DICNR.

Agora dadauk suspeitu detein hela iha sentru detensaun  iha Komando PNTL Munisípiu Díli hodi aprezenta ba iha primeiru interogatóriu iha Tribunál  Distritál Díli, antes oras 72.

PM manifesta solidariedade

Primeiru Ministru (PM), Taur Matan Ruak, manifesta solidariedade ba komunidade sira ne’ebé afetadu husi inséndiu iha eis-merkadu Comoro.

“Dader ne’e ha’u rona rekadu kona-ba insénsiu iha eis merkadu Comoro ne’ebé kuaze atinji uma komunidade sira nian mak ahi han hotu, ha’u-nia laran triste no lamenta tebes rona notísia ida ne’e. Aproveita biban ne’e hodi ha’u-nia naran rasik no Governu nia naran, manifesta solidariedade ba família sira ne’ebé afetadu no husu atu korajen iha situasaun ida ne’e. Ha’u orienta ona ministériu relevante ,atu tun imediata ba terenu hodi halo identifikasaun no intervensaun apoiu emerjénsia rum aba ita nia família sira ne’ebé afetadu”,PM Taur hatete, liu husi komunikadu imprensa, Kinta (29/07/21).

Primeiru Ministru espresa nia laran triste ne’e, wanhira rona nutisia konaba akontesementu inséndiu iha Kinta madrugada, mais ou menus tuku haat oras Timor-Leste, iha eis-Merkadu Comoro, ne’ebé afeta uma komunidade besik atus 4 ahi han mutuk.

Ho situasaun ne’e, Xefe Governu manifesta nia solidaridade no fó korajen ba família afetadu sira, no orienta ona Ministériu Solidaridade Sosiál no Inkluzaun, Ministériu Administrasaun Estatál, no Sekretária Estadu Protesaun Sivíl, atu halo intervensaun imediata ba apoiu família afetadu sira. avi/tos

 


Banner

Foto

Notisia Ikus

Militante partidu haat afilia ba CNRT

September 28, 2021
Juventude no Veteranu husi partidu haat iha Suku...

Kongresu nasionál FRETILIN, adia ba 2022

September 28, 2021
Partidu Frente Revolusionáriu Timor-Leste Indep...

PR dekreta Ma’Huno halo’ot iha JHPM

September 28, 2021
Prezidente Repúblika (PR), Francisco Guterres L...

Governu adia aprovasaun ba realojamentu vítima DN

September 27, 2021
Governu liu husi reuniaun Konsellu Ministru (KM)...

PM Taur: TL lakon fundadór ida

September 27, 2021
Primeiru Ministru (PM), Taur Matan Ruak, hamutuk...
1 2 3 645

About

Grupo Média Nacional was founded on the 19th December, 2003 with the aim of contributing to the development of media in the newly independent Timor-Leste. In that respective year, "Jornal Nacional Semanário" weekly newspaper was launched and in 2005 the Group ... more

Phone: 3311441
Email: [email protected]
Address: Dom boaventura no 8, Bebora Dili, Timor Leste.

GMN Map

Copyright © 2021 GMN TV | All right reserved.
apartmentmap-marker