Ministru Obras Publikas (MOP), Salvador Soares Pires, hateten, programa prioridade MOP nian ba tinan lima mai mak, sei kria regulamentu planu urbana iha teritóriu Timor-Leste, maibé sei fó prioridade uluk ba sidade Díli.
Tanba ne’e, Salvador Pires, dehan, nia halo hela estudu diagnóstiku ba kondisoens iha Ministériu nia laran, para halo planu ba oin atu haree sistema no mekanizmu ne’ebé apar ho programa VIII Governu nian.
“Regulamentu ida ne’ebé importante mak, regulamentu ba planu urbanu ida ne’ebé signifikativu tebes, para assegura ita-nia dezenvolvimentu urbanu, inklui edefisiu, habitasaun, infra-estruturas bazika, atu integradu no sustentabilidade duni. Ami hakarak hari’i ida ne’e hanesan meiu ka xavi ida atu organiza iha implementasaun kada komponenti infra-estrutura, ne’ebé ami hala’o katak, investimentu kapital ne’e intergadu no kordenada duni atu assegura ita nia investimnentu kualidade husi aspeitu sustentabilidade,” hateten Ministru Obras Publikas, Salvador S. Pires ba jornalista sira iha PN, kinta (27/07).
Salvador haktuir, oras ne’e dadauk MOP hala’o hela estudu diagnóstiku ba diresaun hotu iha Ministeriu Obras Publikas, hodi haree diak liu tan sistema no makenismu servisu ne’ebé iha diresaun hotu Ministériu nian.
“Ha’u nia hanoin katak, maske iha vizaun diak no programa diak, amibé la hadia mekanismu fornesementu servisu projeitu, akuntabilidade no prestasaun servisu iha orsamentu, sei hetan dezafiu barak nafatin. Objetivu husi estudu diagnostiku ne’ebé ami halo, ami identifika problema lubuk ida hanesan rekursu humanus, nomós problema iha diresaun seluk,” dehan Salvador Pires.aba
