Kondisaun merkadu no Terminal Becora grave tebes, tanba sentina no haris fatin la funsiona ho diak.
Negosiante David de Carvalho, ne’ebé fa’an modo iha merkadu Becora hateten, haris fatin no sentina iha merkadu ne’e, aat kedas iha tinan 2006.
“Sentina no haris fatin iha merkadu Becora ne’e, aat kedas iha 2006 to’o agora. Parte Governu seidauk mai haree no parte jestaun merkadu terminal Becora nian mós seidauk mai haree,” katak David de Carvalho ba GMN iha merkadu Becora, Domingo (22/10).
David mós husu ba Governu atu monta foer fatin iha merkadu Becora ne’e, atu negosiante sira labele so’e foer arbiru.
“To’o agora ami-nia lixu fatin seidauk iha, tenki kria kondisaun diak para ami bele faan mós senti diak,” katak David de Carvalho.
Nia esklarese, problema iha merkadu Becora ne’e, la’os deit kondisaun sentina no haris fatin, maibé iha bee dalan mós laiha.
David de Carvalho esplika, bainhira udan monu rai, be’e nalihun iha merkadu laran de’it, no ema atu ba hola modo mós ladiak.
“Ami negosiante ne’ebé mak fa’an iha ne’e, ba sentina iha ami-nia uma, nune’e mós sira ne’ebé mak mai sosa sasan iha ne’e, derpenti atu sentina mós la diak tanba to’o agora parte Governu seidauk fó atensaun ba problema ne’e,”katak David.
Tanba ne’e, David de Carvalho husu ba Governu atu rezolve urjente sira nia problema ne’e, tanba povu ne’ebé fa’an sasan iha merkadu Becora ne’e hodi hadia sira ni moris, preokupadau ho situasaun ne’e.
Tuir observasaun GMN, situasaun iha merkadu terminal Becora ne’e kontroladu, tanba negosiante sira fa’an sasan hanesan bai-bain.
Kona ba samenamentu no be moos laiha ne’e, GMN seidauk halo konfirmasaun ho parte Governu.aba
