Ministru Transporte no Telekomunikasaun, José Agostinho da Silva, informa, Governu planeia ona iha tempu badak sei hala’o konstrusaun ba Aeroportu Internasional Prezidenti Nicolau Lobato, Comoro, Díli.
“Ita-nia esperansa mak ne’e, karik konstrusaun ne’e hahú lais liu, entaun di’ak liu. Maibé realidade mak sei esplika lolos buat ne’e, atu hahú sedu ka tarde, komforme prosesu ne’e”,katak Agostinho ba jornalista sira iha Palásiu Governu Díli, Sesta (12-10), hafoin sorumutu ho Primeiru Ministru, Taur Matan Ruak.
Agostinho dehan, agora dadauk ne’e prosesu sei la’o hela, hodi haree kona-ba dezeñu Aeroportu Nicolau Lobato nian, no bainhira buat hotu la’o los, mak foin hahú prosesu konstrusaun.
Ministru Transporte no Telekomunikasaun ne’e afirma, kona ba Aeroportu Prezidenti Nicolau Lobato nia dezeñu ne’e, tékniku sira sei haree, tanba ema ne’ebé mak halo dezeñu ne’e, sei aprezenta mai Governu.
“Depois Governu ho tékniku sira dezeñu ne’e haree, dezeñu ne’e priense ona rekezitus tuir padraun internasional nian ka seidauk, no tuir ona ita-nia hakarak ka la’e. se seidauk priense rekezitus no padraun internasional, ita sujere para hadia”, relata Agostinho.
Konkorsu ba konstrusaun Aeroportu Internasional Prezidenti Nicolau Lobato ne’e, sei hala’o iha Japaun, no kompañia bo’ot sira iha Japaun mak sei kompete, ida ne’ebé mak manan konkursu, nia mak mai ezekuta konstrusaun Aeroportu ne’e.cos
