MAE: Administradór munisípiu sira la’ós mai husi partidu

Ministru Administrasaun Estatal (MAE), Miguel Pereira de Carvalho, hateten, selesaun ba Prezidente  Autoridade Munisípiu sira iha Timor-Leste la’ós mai husi partidu, maibe selesaun ne’e husi Governu no dau-dauk ne’e seidauk konklui.

Miguel hateten, rezultadu ne’ebé oras ne’e espalla ba públiku hanesan “rezultadu pauta provizóriu husi ezame eskrita ida mak foin sai, agora juri sira sei kontinua reklamasaun no sei trata reklamasaun sira ne’e”.

Ministru ne’e esplika, ida ne’e hanesan faze primeiru, faze tuir mai sei lori ba konsulta iha Konsellu Konsultivu Munisipál no sei aprezenta mos iha Krupu Traballu Ministeriál.

“Prezidente Autoridade ou Administradór Munisípiu sira la’ós mai husi partidu, sira hanesan reprezentante Governu sentral iha nível munisípiu, wainhira Governu loke kunkursu públiku atu ema hotu konkore, tantu funsionáriu sira no mós ema husi liur atu partisipa iha prosesu ne’e. Liu husi prosesu rekrutamentu por mérito ne’e kandidatu selesionadu sira sei lori mai iha Konsellu Ministru (KM) para halo deliberasaun, depois bele halo nomeasaun, prosesu sei naruk no seidauk konkluidu. Nia konkluidu ona kuandu KM aprova ona rezolusaun Governu”, Governante ne’e hafoin reuniaun KM extraordináriu, Segunda (12-10-2020).

“Prosesu ne’e sei la’o rezultadu ida ne’ebé mak sai ne’e bolu hanesan rezultadu pauta provizóriu husi rezultadu konkursu nian no ida ne’e seidauk finál no nia prosesu sei tuir mai no depois maka juri sira relata mai MAE para halo tuir saída mak iha lei nia laran. Selesaun ne’e bazeia ba dekretu lei númeru 3/2016 juri admite kandidatu sira atu ba tuir ezame no bazeia kritériu sira ne’ebé konsta dekretu refere”.

Miguel subliña, kritéria atu sai kandidatu ba Administradór munisípiu dekretu lei hateten, bele mai husi liur ou bele mós funsionáriu públiku, sé mai husi funsionáriu públiku sira-nia grau funsionáriu públiku ne’e tenke tékniku superior se la’os ida ne’e tenke asume kargu hanesan dirijente iha administrasaun públika, seluk mak tenke iha esperiénsia profesionál iha administrasaun públika mínimu tinan lima. Sé kandidatu ne’e mai husi liur no la’ós funsionáriu públiku mínimu tenke iha tinan 45 no tenke iha esperiénsia profesionál jestaun administrativa mais ou menus tinan lima no tenke iha saúde di’ak no iha koñesimentu ba iha área informátika. Oct