Organizasaun Nasaun Unidas (ONU), deklara loron 15, fulan Outubru, nu’udár loron internasionál ba feto rurál, ho objetivu atu valoriza sira-nia papél ba dezenvolvimentu rurál, hodi kontribui ba moris di’ak família nian.
Ho ida ne’e, Primeiru Ministru (PM), Taur Matan Ruak, hatete, feto nia papél importante iha prosesu dezenvolvimentu nasionál.
“Ho loron espesiál ida ne’e hodi VIII Governu Konstitusionál nia naran no ha’u nia naran rasik, kongratula inan-feton rurál sira iha Timor-Leste,” PM ne’e liu husi komunikadu imprensa ne’ebé GMN asesu husi Gabinete PM, Kinta (15/10/2020).
Líder Ezekutivu ne’e subliña, VIII Governu Konstitusionál, liu husi Sekretaria Estadu Igualdade no Inkluzaun ho apoiu husi parseiru sira no organizasaun feto promove ona polítika ida ba empoderamentu feto rurál.
Governante ne’e hatutan, liu husi polítika empoderamentu ne’e garante sira-nia edukasaun inklusiva ho kualidade, atu hasa’e sira-nia kapasidade desizaun hodi kontribui ba ekonomia rurál.
“Ikus liu, dala ida tan ha’u saúda inan-feton rurál hotu-hotu ba imi nia papel importante iha prosesu dezenvolvimentu nasionál,” tenik Xefe Governu Taur. Cin
