Diretor Eletrisidade de Timor Leste (EDTL), Virgilio Guterres promete elektrisidade sei la mate tan, tanba tekniku halo manutensaun.
Diretor EDTL, Virgilio Guterres hato’o promessa hirak ne’e ba JNSemanario, Sesta-feira ne’e iha nina servisu fatin Kaikoli, Dili, hodi responde preokupasaun publiku nian konaba ahi nebe mate durante horas rua iha Sesta feira nee.
“Sesta (09/11/2018), ami deside hamate ahi oras rua nia laran, hahu tuku 10 dader to’o 12 meudia hodi rezolve problema feeder ida, tan ne’e ami antisipa kedas nune’e labele fo impaktu ba loron hirak tuir mai. Ne’ebe ami hadia hotu ona, ba oin ami garante sei lamate tan, normalmente kuandu ami atu halo manutensaun ruma ne’e ami fo sai iha kanais televizaun no radio sira, maibe ida ohin nian ne’,e tanba urjensia ne’ebe lakonsege no konsidera emergensia,” hateten Diretor EDTL, Virgilio Guterres .
Responsável masimu empresa públika hatutan, relativamente ho elektrisidade ba comunidade iha capital díli nee laiha problema, tanba central elektrika funsiona diak.
“Ba ha’u haree katak ahi intermus central elektrika laiha problema, maibe iha problema maka iha liña de distribuisaun, no liña transmisaun ne’ebe transporta liña elektrisidade ba território tomak inkluzivamente Dili, maibe liña distribuisaun problema, tanba uza sistema aeria ne’ebe defisil atu identifika liña sira ne’ebe atu avaria, no atu garante wainhira uza ona sistema subterania,” dehan Virgilio Guterres.
Diretor EDTL ne’e dehan difikuldade ne’ebe maka EDTL sira hasoru maka material, taba dadaun ne’e material iha armagem laiha, hanesan konektor laiha ne’ebe EDTL haruka konsumedor sosa.
Alem de ida ne’e, tekniku EDTL mos seidauk suficiente, maibe tau ona iha planu hodi halo rekrutamentu. Difikuldade ne’ebe maka EDTL hasoru liu maka wainhira iha problema ruma iha tereno tekniku sira susar tebes atu responde ne’ebe relasaun ho ai-tohar, tanba dala barak komunidade la kopera ho tekniku sira iha tereno.
“Buat hot-hotu la’o diak ona, husu mos ba publiku, li-liu kapital Dili, no Autoridade lokal sira para kopera ho teknik EDTL wainhira iha problema ruma atu tesi ai ruma karik bele autoriza deit ba, labele difikulta, ahi maka hanesan kauza ida, dificuldade boot liu ba ami maka iha tempu udan, ne’e ai tohar. Tanba ne’e ami nafatin husu ba komunidade atu kopera ho ami nune’e bele garante ahi lakan normal,” apela Diretor EDTL. mia
