Ministru Transporte no Komunikasaun (MTK), José Agostinho da Silva, rekoñese eletrisidade mate iha aeroportu Internasional Prezidenti Nicolau Lobato, Comoro ne’e, tanba falla iha jeradór.
“Ahi mate iha minitu balun ha’u fó orientasaun ba Prezidenti Air Navigation Administration of Timor-Leste (ANATL,E.P) hodi haree problema hirak ne’e, para bele tau atensaun oinsa maka bele buka solusaun ne’ebé di’ak, maski ahi mate iha minitu balun nia-laran, hafoin iha ona solusaun buat hotu la’o ho normal”, MTK ne’e ba jornalista sira iha Sentru Formasaun Tibar-Liquiça, Sábadu (16-11-2019).
Iha Sábadu, loron 16, fulan ne’e, eletrisidade iha área balun kapital Díli mate husi tuku 11to'o tuku 1, fó impaktu ba servisu funsionáriu sira ne'ebé halo check-in-check out ba pasajeiru sira.
Ho situasuan ne’e, funsionáriu sira obrigadu tenki uza lampra telemóvel hodi bele halo check-in-check out manuál, nune’e mós aviaun sira tenki semo tarde.
Ho problema hirak ne’e, VIII Governu iha vontade tomak, estabelese ona ekipa interministerial, kompostu husi ministériu 5, tékniku sira sei esforsu atu finaliza planu konstrusaun aeroportu refere.
Antes ne’e Inspetur Imigrasaun, Ernesto Maia husu ba governu atu tau jeradór ida, iha fasilidade ne'e, atu nune’e situasaun refere labele repete tan iha futuru. ety
