Primeiru Ministru (PM), Taur Matan Ruak, louva sakrifísiu juventude sira iha masakre 12 de Novembro, ne’ebé hatudu espíritu no vontade hodi luta hasoru inimigu sira, atu kore povu Timor-Leste husi presaun no abuzu direitu umanu ne’ebé akontese durante okupasaun nia laran.
Ho nune’e PM husu ba joven sira atu iha tempu agora hahú hanoin ho kreativu no ho ideia inovativu atu oinsa bele solusiona problema ne’ebé povu enfrenta.
“Primeiru Ministru hakarak fó hanoin katak, iha tempu ukun-an ita nia problema sei iha. Iha tempu ukun-an ida ne’e ita-nia problema mak ne’e, sei iha nasaun ne’ebé moris kiak rabat rai, sei iha nasaun ne’ebé mai ho má nutrisaun ka inseguransa ai-han, sei iha nasaun ne’ebé sei iha problema kona-bá kualidade edukasaun, prestasaun servisu. Ho ida ne’e mak na’i PM mós hameno hela atu joven sira hahú hanoin ho kreativu, hanoin ho ideia inovativu atu oinsa ita bele solusiona problema hirak ne’e”, Koordenadór Gabinete Apoiu Sosiedade Sivíl, Gabinete PM, Filipe da Costa Filipe da Costa lee mensajen Xefe Governu nian ne’e iha abertura ba semináriu 12 de Novembro iha salaun Xanana Sport Center, Kampu Demokrásia, Díli, Tersa (10/11/2020).
Prezidente Komité 12 Novembru, Gregório Saldanha apela ba juventude sira ohin loron labele aproveita teknolójia, hodi insulta ema seluk nia dignidade iha rede sosiál, maibé aproveita vantajen husi teknolójia hodi hadi’a moris di’ak iha nasaun.
“Avansu teknolójia la hanesan, entaun lori diferensa. Tanba ne’e mak tema ne’e hateten halo transmisaun, transmite valor prinsípiu espíritu 12 de Novembro ba jerasaun foun. Tanba jerasaun agora ho influensia sira teknolójia, mudansa siénsia, ambiente diferente, buat sira ne’e hotu halo com que hanesan ami no maun sira husi veteranu ami iha obrigasaun atu ko’alia nafatin ba joven sira, atu nune’e espíritu sira ne’ebé uluk iha labele lakon. Espíritu mak saída, haree malu di’ak, unidade metin, hadomi malu, respeita malu ko’alia ho étika, buat sira ne’e hotu maka valor, iha diferensa uluk ita liberta rai ne’e, ohin atu priense fó han povu”, apela Prezidente Komité 12 Novembru ne’e.
Iha mensajen Prezidente Repúblika (PR), Francisco Guterres Lú Olo nian hateten, foinsa’e mak sei hatutan óbra ne’ebé jerasaun tuan sira husik hela.
“Juventude mak hatutan loloos espíritu funu nian no afirma perante mundu tomak ita-nia determinasaun”, sita iha mensajen PR ne’e.
Xefe Estadu mós enkoraja juventude sira atu hatutan mós espíritu 12 Novembru nian, ba sira seluk hodi sai foinsa’e ne’ebé ativu, krítiku no responsabel iha dezenvolvimentu nasionál. san
