Prezidente Konsellu Administrasaun Grupo Média Nacional (GMN) Holding, Jorge Manuel de Araújo Serrano, akompaña husi General Manager GMN, Clementino Gonçalves da Costa, no Manager Operational GMN Holding, Antonio Pereira, fahe nesesidade báziku ba komunidade Suku Marabia, Postu Administrativu Vera Cruz, Munisípiu Dili.
Manager Operational Grupo Média Nasional Holding, Antonio Pereira, hateten, objetivu husi fahe nesesiedade báziku ne’e, atu fasilita komunidade kbiit laek sira iha suku refere iha komemorasaun Natal no tinan foun.
“Asaun karidade ne’e, aktividade rutina ne’ebé Sr. Jorge Serrano hanesan Empreza, hala’o kada tinan ba komunidade ho nesesiedade báziku, hanesan fos, mina, biscuit no masin midar, ba komunidade sira ne’ebé kbiit laek, ne’ebé uluk liu halo iha Aldeia ida deit, mak Aldeia Marabia, maibe ba tinan hira tuir mai halo mos ho Aldeia sira seluk husi suku ne’e hotu tanba nia sente katak iha família kbiit laek barak mos presija entaun ita hahú mos ho Aldeia sira seluk husi suku ida ne’e mos,”hateten Manager Operational GMN Holding, Antonio Pereira, ba jornalista GMN Taibesi Sabado (23/12/2017).
Manager operational GMN Holding ne’e haktuir, aktividade karidade ba komunidade kbiit laek sira hanesan sentimentu domin husi nain ba Kompañia GMN Holding ba komunidade kbiit laek iha natal no tinan foun.
Ana Maria Soares, komunidade Aldeia Marabia , sente kontenti ho asaun karidade ne’ebé empreza GMN Holding hala’o tanba bele fasilita komunidade kbiit laek liu-liu nia ho nia familia atu kontenti hanesan mos ho família seluk.
“Ami sente kontenti no agradese ba Sr. Jorge Serrano ho família no Xefi Suku, tanba liu husi servisu hamtuk ne’ebé sira halo, ami bele hetan sasan sira ne’e hodi fasilita ami kbiit laek sira iha loron importante ida ne’e,”agradese Ana Maria.
Sentimentu kontenti hanesan mos hato’o husi José Pereira, katak, liu husi oferta ne’e bele fasilita nia ho nia familia, liu-liu nia kaben ho nia oan sira, iha loron boot natal no tinan foun.
“Ami hanesan aman, ne’ebé laiha ona kbiit, mak oan sira fo hela ami ho sasan sira hanesan ne’e ami agradese no obrigado tanba bele fasilita ona ami, hodi ami bele kontenti ho familia, agora loron boot tan,”José kontenti.
Entertantu Xefi Aldeia, Rai Mean, Alarico Sousa de Carvalho, louva nain ba kompañia GMN Holding, Jorge Serrano, tanba ho fuan boot bele ajuda Governu hodi oferese nesesiedade báziku ba komunidade kbiit laek sira.
“Ha’u lori komunidade suku Marabia, ho total 322 kk, hato’o agradesimentu wain no obrigado tanba Sr. Jorge bele iha hanoin ne’ebé diak hodi ajuda governu fasilita komunidade sira ne’ebé laiha kbiit, maske iha Timor iha ema riku barak maibe nunka hanoin povu so nia deit mak hanoin ami,”Xefi Aldeia ne’e louva.
Sasan nesesiedade báziku ne’ebé mak kompañia GMN Holding fahe ba komunidade Suku Mariabia mak hanesan, fos, mina,masin midar no biscuit.Total orsamentu ba asaun karidade ne’e hamutuk dolar Americano rihun nen atus hat resin.Ola
