Bispu Dioseze Maliana, Dom Norberto do Amaral, preokupa ho situasuan polítika rai laran ne'ebé to’o agora lider sira seidauk iha konsensu hodi rezolve. Tanba ne’e, lider igreja Katólika ne’e husu ba lideransa nasionál sira atu tur hamutuk buka solusaun hodi rezolve atu nune’e labele fó impaktu ba dezenvolvimentu nasionál.
"Koalia dezenvolvimentu, dezenvolvimentu ita la'o. Maibe passu ne'ebé neneik liu hanesan buat ida karik lenuk, maske ita gasta osan barak. Ho impase polítika ida ne'ebé la'o hela, no komesa mosu ona veta ida ne'e, veta ida ne'ebá, ne'e ita susar bo'ot, e saida mak ita veta nafatin no la haree buat ninia diak. Karik la hetan solusaun entaun lider sira tenke tur hamutuk no laos idiololojia polítika mak ás liu buat hotu",deklara Bispu Dioseze Maliana, Dom Norberto do Amaral, iha nia rezidensia Maliana Vila, Munisípiu Bobonaro, Kinta semana ne’e.
Dom Norberto hateten, veta ne'ebé Prezidente Repúblika, Francisco Guterres ‘Lú Olo’, halo foin lalais kona-ba proposta alterasaun Lei Atividade Petrolíferu (LAP), ne’e direitu Prezidente Repúblika tuir konstituisaun RDTL.
Nune’e mós Bispu Dioseze Maliana ne’e konsidera diverjénsia idiolojia polítika atuál sei fó impaktu ba dezenvolvimentu la'o hakdasak. Ne’e duni lideransa sira mak tenki buka solusaun ba problema sira hotu.
Antes ne’e eis Prezidente Republika, José Manuel Ramos Horta mos la konkorda atu Timor-Leste kontinua moris ho veta, tanba povu maioria sei moris kiak.Ito
