Líder karismátiku Kay Rala Xanana Gusmão, hatete, atu hadia rai Timor-Leste (TL) ba diak no prósperu mak soe tiha hahalok ida ne’ebé haree deit ba a’an rasik. Maibe tenke buka konsentra hodi haree ba interese povu tomak nian.
“Ne’eduni dalaruma ita-nia ego mak maka’as liu, ita haree deit ba ita-nia an rasik. Husu ba matenek sira Timor ninian hodi hanoin ba rai ida ne’e.”dehan eis Prezidente Repúblika, Kay Rala Xanana bainhira selebra Natal Hamutuk ho labarik sira iha Hera, Tersa (24/12/2019).
Xanana mos dehan ba joven sira katak, “Joven sira haree ba sor-sorin ba, lolo-liman ba ida ne’ebé sira seluk labele hamriik karik, labele la’o karik, la han karik tenke haree. Ida ne’e duni maka ita hotu buka harii rai ida ne’ebé diak, ho matenek.”
Xanana mos husu ba Timor-oan tomak, ema hotu-hotu atu servisu maka’as ho hanoin ne’ebé diak no luan hodi lori dezenvolvimentu ba povu no nasaun.
“Tanba ne’e husu ba hot-hotu atu kompleta-an katak Estadu foun ne’e presiza ita hotu-hotu nia servisu maka’as, nia hanoin ne’ebe diak, hanoin luan, hanoin naruk para ita nia rai bele la’o ba oin. Esperansa tenke iha nafatin iha ita nia fuan laran, maibe labele hein.”afirma eis Primeiru Ministru, Xanana Gusmão.
Xanana konta tuir katak, uluk nia sei iha semináriu nai-lulik sira dehan, reja maibe tenke mos estuda.
“Felis natal ba povu tomak, husu boot ba aman maromak nia domin bele naroman ba ita-nia hahalok lor-loron, no mos husu katak dame bele moris iha Timor iha ida-idak nia fuan, nasaun presiza ita hotu nia kontribuisaun atu oin nusa deit tanba ida ne’e husu ba povu tomak fiar nafatin katak ita sei lao ba dalan los. Tinan 24 iha funu laran ita la lakon esperansa, ohin loron iha demokrasia nia laran, estadu foun nia laran dala ruma ita lakon fali esperansa. Ha’u sei iha semináriu nai-lulik sira dehan nune’e ‘o bele reza dader to’o kalan, o la estuda maromak la ajuda’. Ne’e katak, ita bele husu ba maromak ajuda, ajuda, ajuda mas ita la book-an, ita la buka hanoin didiak, ita la buka konsentra, ita la buka haree iha saida deit mak ita bele halo hodi hadia rai ida ne’e, maromak sei la ajuda. Maromak ajuda kuandu ita haka’as-an, nia loke dalan. Ne’eduni hakoak bo’ot ba povu tomak liu-liu ba kiik-oan sira. Buat hot-hotu ne’ebé ita halo, halo ba sira ne’e. hanesan barak mate iha ai-laran la husu buat ida ba sira, hanoin deit katak, sira-nia família ne’ebé sira husik moris hela bele hadia rai ida ne’e bele hetan diak.”dehan pioneiru ba organizasaun g+7 Xanana Gusmão.
Iha natal hamutuk ne’e Xanana mos fó Boas Festas natal ba povu Timor toma. “Boas Festas imi hotu, tinan foun ne’ebé bele lori rahun diak mai ita.”dehan Xanana.GMN
