HALO LEILAUN RASIK BA KARETA, PN FALTA RESPEITA BA FUNSAUN DNJPE

Diretor Diresaun Nasional Jestaun Patrimoniu Estadu (DNJPE), Martino Lopes, hatete, Parlamentu Nasional (PN) halo leilaun rasik ba kareta deputadu sira nian, hanesan falta konsiderasaun ba funsaun DNJPE nian.

Martino realsa, prosesu lelaun ne’ebé Parlamentu Nasional halo durante ne’e, sem iha koordenasaun ho parte komptente. “Ha’u la dehan prosesu lelaun ne’ebé Parlamentu Nasional halo ne’e legal ou illegal, tanba  prosesu lelaun ne’e Governu iha dekretu lei nú 32/2011, ne’ebé esplika klaru kona-ba kompetensia lelaun patrimoniu Estadu nian ne’e tutela iha Ministeriu Finansas liu husi Diresaun Nasional Jestaun Patrimoniu Estadu, iha kompetensia ne’e mós define, wainhira halo prosesu leilaun iha modalidade, ne’e ita regula fila fali ho diploma ministerial nian,”haktuir Diretor DNJPE ne’e ba GMN, iha nia knaar fatin Balide-Dili, Kinta (10/08/2017). Martino Lopes konsidera, desizaun ne’ebé Parlamentu Nasional foti ne’e, hanesan desizaun polítika,  mesmu kareta refere nu’udar patrimoniu Estadu nian.   “Ami nu’udar  téknika, la’o tuir prosesu regulamentu dalan ne’ebé iha, parlamentu la konsidera ami ne’e kompetensia sira nian, karik desizaun ne’ebé sira foti hanesan desizaun polítika, entaun ami DNJPE labele halo buat ida, mesmu kareta ne’e patrimoniu Estadu nian,  ita hatene katak ne’e Estadu nian, ita hotu tenke hakruk ba regulamentu ne’ebé Estadu iha ona,”dehan Lopes Nia informa tan, tuir kriteria atu halo leilaun ba kareta Estadu nian katak, tinan utilidade ne’e mínimu tinan 6  mak foin bele fo leilaun. Tuir dekretu lei nú 32/2011, iha diploma ministerial,  lei nú 15/2012, kapitulu 1 aliña D hatete, DNJPE mak iha kompetensia tomak atu halo  supervizaun bá prosesu implementasaun Jestaun no Alienasaun Patrimóniu Móvel Estadu nian iha Liña Ministerial no Instituisaun sira Estadu nian (LM/IE). Relasiona ho asuntu ne’e, GMN koko atu konfirma ba Sekretáriu Jeral Parlamentu Nasional Mateus Belo, maibe parte kompetente lakohi atu fo komentariu.Say