Dom Virgílio: Kuaresma tempu refleksaun mos ba polítiku nain sira

Foto : GMNTV

Bispo Diocese de Dili, Dom Virgílio do Carmo, hatete, loron kuaresma la’os sai deit loron ba sarani Katólika hotu atu  hala’o penitensia, maibe sai mos nu’udar tempu refleksaun ba polítiku nain sira  atu halo refeleksaun no ezame konsiensia hodi hasoru Eleisaun Antesipada (EA).

“Iha tempu Quaresma ne’e, hau  hakarak hato’o mensajen jeral ba sarani hotu, liu liu politiku nain sira, katak tempu Quaresma ne’e tempu diak ida mai ita atu halo refleksaun, nu’udar sarani no nu’udar kriatura maromak nian, hare liu liu mos relasaun husi ezame kosiensia ba sira nia a’an ho sira nia kareira politiku, hodi servi povu ho didiak” hatete Bispo Diocese Dili ne’e ba Jornalista sira Kuarta (14/ 02/2018), hafoin prezidi misa Kuarta feira Cinzas iha Igreja Paroquia Nossa Senhora Imaculada da Conceição Catedral, Dili.

Dom Virgílio akresenta, kuaresma mos atu hala’o relasaun diak ho maromak, iha jejun durante loron 40 nian laran, polítiku nain sira bele servi ba maromak, hodi tulun ema hotu, atu bele halo refleksaun diak, hodi melhora kna’ar polítiku nian.

“Tempu ne’e hanesan tempu diak ba ita  fila-fali husu ba maromak, atu tau ita iha dalan ne’ebé los, hodi buka servi povu ida ne’e ho haraik a’an no ho domin,” afirma Dom Virgílio.Oly