HAKOTU IMPASE POLÍTIKA, DOM BASÍLIO: DIÁLOGU MAK HAMOSU SOLUSAUN

Bispu Dioseze Baucau, Dom Basílio do Nascimento, deklara, liu husi diálogu maka sei hamosu solusaun ba situasaun saida de’it maka mosu iha vida moris umanu ninian, liu-liu impase polítika ne’ebé maka oras ne’e dau-daun nasaun infrenta.

“Diálogu la’os solusaun ikus, maibé diálogu ne’e meius fundamental atu bele hetan dalan, ezemplu feen no la’en hirus malu iha uma, liu husi diálogu maka sei hetan solusaun,” Bispu Dioseze Baucau, ba jornalista sira hafoin remata kumprimenta no kongratula ba knaar ne’ebé maka Prezidente Parlamentu Nasional (PN), Arão Noe, asumi iha uma fukun PN, Díli, Tersa (24-07-2018).

Dom Basílio hateten, diskusaun nunka iha solusaun, maibé diskusaun ne’e dalan atu hetan solusaun, ne’e duni hein katak liu husi diskusaun maka sei sei hamosu dalan ba problema hotu-hotu.

 “Diskusaun ne’e dalan atu hetan solusaun, ne’e duni hein katak liu husi diskusaun, ulun tún, ain sa’e, ba kotuk, mai oin, ba sorin karuk no sorin loos, kuandu ita buka dalan to’o loron ida dalan sei mai, liafuan Portugés ida hateten da discussão nas a luz, dehan Maromak ne’e mai husi diskusaun, kuandu diskuti, tenki diskuti, ida-idak aprezenta ninia argumentu, maibé diskuti to’o mate mós la fo buat ida, maibé to’o loron ida diskusaun tenki fó solusaun,” haktuir Dom Basílio do Nascimento.

Dom Basílio relata, buat ne’ebé maka igreza bele halo maka tau buat hotu iha Maromak nia oin liu husi orasaun, atu Na’i Maromak ninia espiritu tún ba Xefi hotu-hotu liu-liu iha situasaun dífisil, hodi hein solusaun diak ne’ebé sei mosu.

“Esperansa katak, ita hein, mezmu buat ne’ebé ita haree hanesan dífisil sei hetan solusaun, sé ita boot sira hatene Biblia uitoan karik, iha São Pedro nia liafuan hateten espera contra toda esperansa, katak hein biar bainhira esperansa laiha ona mós, iha esperansa nafatin,” informa Bispu Dioseze Baucau ne’e.

Entretantu Bispu Dioseze Baucau, Dom Basílio do Nascimento, dehan, hotu-hotu hein katak, Maromak fó ulun, fó kakutak, intelijensia no kompriensaun atu responsavel hotu-hotu kompriende katak, responsavel hotu-hotu nia obrigasaun maka servisu no ukun, maibé ukun ne’e la’os atu manda, maibé atu halo servisu ba povu no nasaun nia diak.ves

 

Leave a Reply

Your email address will not be published. Required fields are marked *