Família halót ona mate isin trajédia Kuluhun ■Provizóriu arguidu 4 fila ba vida sivíl

Família  vítima husi trajédia Kuluhun de Baixo, Kuarta (21/11/18), halót ona mate isin iha simitériu Becussi, Díli, ne’ebé hetan tiru husi membru Polísia Nasionál Timor-Leste (PNTL), iha dia 18, fulan Novembru, tinan ne’e.

Família vítima rihun resin iha dadersan  tuku  10 oras Timor-Leste, lori vítima  trajédia Kuluhun ba halót  iha  simitériu Becussi, ne’ebé antes ne´e família  sira lori uluk vítima ba iha Igreja Motael hodi hala´o misa agredesimentu.

Wainhira matebian nain tolu lori to´o iha Igreja Motael Polísia Batallaun Orden Públika hatún  matebian sira husi Ambulánsia  lori tama ba Igreja laran. Durante transporta mate isin vítima nain tolu ne´e hetan seguransa másimu husi Polísia Militar (PM).

Iha omília Amu Parokia Motael, Guilhermino da Silva, husu ba Timor-oan sira atu fo liman ba malu, nune’e situasaun ne´ebé mak akontese iha Kuluhun de Baixo, labele akontese tan ba povu sira seluk.

“Timor ne´e  ita-nia uma,  ita presiza hadia  ita-nia uma, la´os ema seluk. Tanba  ne´e laiha dalan seluk  iha situasaun sira ne´e hakarak fó lisaun ba  ita atu halo buat ruma. Ho akontesimentu ida ne´e ita hotu tau iha reflesaun, mai ita hotu haree ba frakeza  ne´e  buka  halibur forsa buat foun ne´ebé valor liu iha moris soseidade”,esplika Amu Parokia Motael  Guilhermino da Silva,  wainhira hala´o misa agredesimentu ba  vítima trajédia Kuluhun de Baixo.

Entretantu iha Kuarta (21/11/18), Komandante Jeral PNTL, Julio Hornay, afirma hodi fó suspensaun preventiva  ba ariguidu nain haat atu  fila ba vida sivíl provizoriamente durante fulan tolu sem uza arma hodi submete  ba prosesu  investigasaun.

“Klaru Komando jeral  mantein nafatin ninia pozisaun prosesu disiplinar, suspensaun preventiva sai tiha ona, agora sira vida sivíl  durante  fulan tolu nia laran ba prosedimentu ita hala´o ona tuir regra disiplinar  ne´ebé mak  iha”,dehan Julio Hornay

Tanba  ne´e Julio Hornay husu ba públiku atu labele preokupa ho komando ninia desizaun hasoru membru PNTL ne´ebé mak involve iha  kazu Kuluhun.

“Membru PNTL nain haat sivíl  hotu ona provizoria to’o fulan tolu  tuir lei haruka. Lei disiplinar haruka suspensaun preventiva 90 dias para submete ba  prosesu, durante 90 dias ema sivíl  nein uza armas, nein uza farda vida sivíl  total hodi submete ba prosesu investigasaun”,dehan Julio Hornay.

Julio Hornay promete, ba oin sei forma ekipa auditoria kona-ba arma ninian oinsa atu hatene regra empeñamentu  ne´ebé mak iha oinsa atu hapara ona atitude a´at tiru mate povu no joven sira.

“Ita sei forma ekipa auditoria urjenti hodi hatene regra empeñamentu ne´ebé mak iha, lei sira ne´ebé mak iha ninia implementasaun los  ka la los, para depois  ita hapara ona atitude a´at ida ne´e ba  ita nia povu no joven sira ida ne´e mak  ita ninia hanoin. To’o ona  ita nia joven labele mate bebeik ho ita nia kilat rasik, kilat ne´e povu nian  ita mai para  uza de´it atu defende povu sira remata rai iha kantor membru seluk uza  fali hodi hala’o servisu atu defende povu no rai ida ne´e la´os sei fali kilat ninia tutun ba  ita nia povu”,dehan Julio Hornay.

Entretantu vítima trajédia  Kuluhun de Baixo, hetan tiru iha Domingu (18/11/18) mak hanesan   Erick  Joni   Roberto,  Luis Quebia Saldanha Belo ho  Leonildo  Eduardo  Ximenes Sequeira.

Enkuantu vítima  nain lima mak kanek hanesan,  Terezinha Vila Nova,  Pinto Gama, Agrifino  da Costa , Paulino de Jesus,  Lúcio do Carmo.avi