JavaScript must be enabled in order for you to see "WP Copy Data Protect" effect. However, it seems JavaScript is either disabled or not supported by your browser. To see full result of "WP Copy Data Protector", enable JavaScript by changing your browser options, then try again.

Jorge Serrano: Emisaun GMN TV ba oras 24 la’os atu kompete

Jorge Serrano: Emisaun GMN TV ba oras 24 la’os atu kompete

Prezidenti Konsellu Administrasaun Grupo Média Nacional-GMN, Jorge Manuel de Araújo Serrano, hatete, emisaun GMN-TV ba oras 24, la’os atu kompete ho média seluk, maibé atu kompleta hodi kumpri kompromisu GMN, atu oferese buat ne’ebé di’ak ba povu, iha territóriu tomak.
“Emisaun 24 horas, la’os emisaun bo’ot ida ou la’os hanoin atu compete, konkore ho televizaun sira seluk, maibé parte kompromisu ida husi GMN nian, iha tinan ida ho balun. Ekipa tomak ne’ebé mak tu’ur iha ne’e, no balun ne’ebé halo servisu hela iha liur, hotu-hotu hanoin katak, ita labele loron-loron la’o nafatin hanesan ne’e, no la’os tamba ha’u Jorge, maibé tamba ekipa ne’e nia vontade, sira-nia kompromisu bo’ot, bainhira mai iha GMN, ho hanoin katak, GMN tenki asumi responsabilidade ida ne’e atu fó buat ne’ebé di’ak ba povu Timor-Leste, espesial ba telespetador GMN nian iha Timor laran tomak, no ba Timor-oan sira hela iha liur”,hateten Jorge Serrano iha nia intervensaun ba lansamentu emisaun GMN oras 24, iha Hotel Novo Turismo Díli, Domingo (06 / 01/2019).
Tuir Jorge Serrano, ema hotu hatene katak, dadauk ne’e problema iha rai laran mak hanesan, infra-estrutura seidauk di’ak, maibé pelumenus indikador ida ba sira, katak GMN ninia rede kobertura mais 50% iha Timor laran tomak.
“Ida ne’e ami rasik senti, tamba ami haree ba pedidu kobertura hotu husi Timor laran tomak, ha’u hanoin katak, pedidu barak tebes husi Suku, Aldeias, Postu Administrativu no Munisípiu. Sé sira hotu husu GMN, signifika katak, sira hotu akompaña GMN, ba ami ida ne’e urgullu, tamba buat ne’ebé ita halo, bele responde ba nesesidade, tamba dala barak, ita fó de’it mak programa informativu, maibé divertimentu ba povu ne’e laiha”, katak Jorge Serrano.
Prezidenti Konsellu Administrativa GMN ne’e esklarese, tanba situasaun sira ne’e hotu, GMN tenta atu produs buat hotu iha rai laran la fasil, tamba fontes limitadu.
Na’in ba GMN ne’e fó ezemplu katak, hanesan programa lala’ok desportu, kuaze desportu iha Timor laran, klubu to’o modalidade foti hotu, no agora Diretur Produsaun bilán, atu ba foti tan fontes iha ne’ebé ona, nomós programa feto iha kareira, programa kona ba feto potensial barak, ne’ebé dalabarak marka tempu atu entrevista, maibé balun seidauk abitua ho kamera.
“Ha’u hanoin katak, tinan ida ho balun, ba GMN karik ita kompara hanesan labarik ida, normalmente nia foin mak dolar, maibé GMN tinan ida ho balun hamrik la’o, ida la’os tamba GMN mak makas, maibé tamba ita bo’ot sira, ha’u hanoin hahú husi telespetadores sira, parte polítiku, akademikus, liu-liu parte komersial, empreza sira iha ne’e fó liman, mak GMN hamrik hodi la’o, se la’e GMN la la’o”, relata Prezidenti Konsellu Administrativa GMN ne’e.
Jorge Serrano esklarese, emisaun GMN ba oras 24, hanesan jestu agradesimentu ba telespetador hotu. Tanba tuir Jorge Serrano, televizaun ida la’os kaisoti de lixu, no telespetador sira la merese simu lixu ida ne’e.
Marvi apresia GMN TV
Nuneé mos, estrela The Voice Portugal, Maria Vitória ‘Marvi’, apresia tebes ho programa foun sira ne’ebé GMN produz hodi aumenta nia emisaun ba oras 24.

Lee hotu :   Seidauk hamos atributu iha estrada públiku, CNE sei aplika kustu ba parpol

Marvi, hateten, nu’udar Timor-oan apresia tebes ho GMN TV, tanba aumenta oras emisaun no mós programa foun ne’ebé di’ak, hodi fó motivasaun ba telespetador sira iha rai laran no mós rai liur.
“Nu’udar Timor-oan apresia tebes no konsidera televiuzaun privada GMN, sai inspiradór ho nia programa foun sira, hodi motiva Timor-oan sira atu labele asiste de’it mak televizaun rai liur nian, maibé nu’udar sidadun Timor, tenki akompaña notisia inklui programa sira seluk iha GMN. Hanesan televizaun privada alénde ho orientasaun publikasaun komersiál, nia (GMN) mós fahe informasaun sira iha rai laran no rai liur ba públiku, ho natureza edukativu, divertimentu no halo kontrolu sosial ho nia programa sira, hodi kontribui ba dezenvolvimentu nasional”, Marvi hato’o nia apresiasaun ne’e, hafoin priense primeira edisaun programa Dader Kmanek iha estúdiu dois GMN Bebora Díli, Segunda (07/01).

Marvi mós husu ba Timor-oan hotu atu akompaña GMN TV hodi hatene motivasaun di’ak ne’ebé mak GMN TV ofrese lor-loron.

“Labele akompaña TV rai seluk nian, ida ne’e la fó motivasaun di’ak ba ita Timor-oan, tanba filme sira ne’e eduka ita ba dalan ladi’ak. Ne’eduni di’ak liu akompañia GMN TV hanesan televizaun komersiál privada ne’ebé eziste iha tinan ida liu ba, ho moto lori Timor ba mundu”, katak Marvi.

Iha loron loron 07 fulan Jeneiru tinan ne’e, GMN hahú nia emisaun ho grella foun ba emisaun durante oras 24, ho programa sira mak hanesan, relijiozu, telenovelas, jornal nasional, nomós programa divertimentu sira seluk.

Entretantu Grupo de Média Nacional kompleta ona ninia órgaun komunikasaun hat hanesan, televizaun, rádio, jornal no multimédia hodi forñese informasaun ba públiku.

Lee hotu :   Dom Basílio husu povu hotu tenki ba vota


Governu prontu apoia GMN
Husi sorin seluk, Ministru Reforma Lejislativa Asunto Parlamentares (MRLAP), Fidelis Leite Magalhães, hatete Governu sei apoiu GMN iha futuru, no buka servisu hamutuk laos deit iha tempu badak maibe to’o fim.
“Hanesan ita hotu hatene Timor-Leste hanesan país ida foun no iha faze konstrusaun Nasaun, tamba ne’e papel Mídia importante tebes, no iha programa governu nian mos koalia konaba papel mídia nian, iha faze konsolidasaun no konstrusaun identidade Nasional no promosaun ba valores demokrátiku inklui promosaun edukasaun ba jerasaun futuru Nasaun nian”, afirma Fidelis Leite Magalhães, iha nia intervensaun lansamentu émisaun GMN-TV ba 24 oras iha Hotel Novo Turismo.
Governante ne’e haktuir, programa GMN hasae ba 24 oras ne’e ho edukativu, dívertidu, hodi eduka jerasaun foun sira inklui hametin liu tan programa modalidade sira seluk iha Nasaun no kontinua mos haksolok sidadaun Timor-oan hotu.
“Ema hotu dehan kontribuisaun iha mundu iha diskusaun barak no ita bele koalia kona-ba seguransa edukasaun no asuntu pertente saída deit, maibe iha konkluzaun ida deit katak, bainhira ita luta hasoru média ita la manan, tamba ita bele ba taka hotu informasaun iha fronteira maibe informasaun bele tama iha televizaun ne’ebé papel média importante no karik ita hakarak halo kompetisaun ho média ita la manan”, haktuir Fidelis Magalhães.
Nune’e mos, Prezidente Komisaun B Parlamentu Nasional (PN), Aderito Hugo da Costa, hatete hanesan Deputadu apresia tebes ho jestor sira iha GMN ne’ebé bele priense espasu televizaun nian ba oras 24.


“Iha hotu hatene katak, frekuensia televizaun ida ne’e públiku nian no Estadu nian no durante ne’e espasu televizaun uja husi Internasional, maibe ho avansu ne’ebé GMN halo ho kbi’it ne’ebé iha hahu husi oras 12 hasa’e ba oras 24, entaun ida ne’e furak tebes katak espasu ida ne’e bele priense ona kontiudu Nasional husi produtu ne’ebé sai husi rai laran”, Sublinha Prezidente Komisaun B.
Aderito reafirma, durante restaurasaun Independensia tinan 16 nia laran, kánal televizaun barak liu husi estranjeiru mak domina, tanba ne’e hanesan ema polítiku apresia ho vontade setór privadu GMN ne’ebé lídera husi Jorge Serrano, no ninia ekipa ne’ebé bele priense espasu televizaun ho 24 oras.
“Hanesan lijislador ami haree katak, iha progresu lubuk ida depois de lijislasaun lubuk ida ami aprova entremos de lei Komunikasaun lubuk ida ne’ebé ami aprova no hari’i mos Konselho Imprensa (KI) no iha mós traballu lubuk ida ne’ebé pendente hela no iha hela prosesu diskusaun ho Ministériu relevante no Parlamentu atu priense mos lejislasaun ba regulamentu espasu públiku nian”, afirma Aderito Hugo da Costa.
Iha fatin hanesan, representante Konselho Imprensa (KI), José Ximenes, husu ba ekipa GMN-TV atu servisu fo liman ba malu hodi hametin liu tan ekipa hanesan ona Prezidente Konsellu Administrasaun GMN, Jorge Serrano koalia katak, nia laos mesak maibe ekipa mak sai forsa hodi dezenvolve GMN.

Lee hotu :   GMN Holding hala’o atividade karidade ba komunidade Marabia


“ Ha’u hakarak fo hanoin katak, grelha ne’ebé iha kontinua tuir nafatin oras, tamba ita nia públiku sira hatene ona iha telenovela sira ne’ebé sei públika iha balun ne’ebé koalia konaba labrik no balun adultu, entaun grelha hirak ne’e tenke permanente no tuir duni oras ne’ebé iha”, Jose Ximenes enkoraja. oly/aba/Fel

Add to Comments Here!!!!

error: Content is protected.
Secured By miniOrange
You might also like:
JORNAL NACIONAL GMNTV KALAN, Loron-6 Fulan-Janeiru Tinan-2019

JORNAL NACIONAL GMNTV MEIU DIA, Loron-5 Fulan-Janeiru Tinan-2019

JORNAL NACIONAL GMNTV MEIU DIA, Loron-4 Fulan-Janeiro Tinan-2019

Close