Antesipa Tsunami, Governu estabelese sirene iha kapital Díli

Atu salva komunidade no ema hirak ne’ebé maka hela iha kapital Díli husi Tsunami, dau-daun ne’e Governu liu husi Sekretariadu Estadu Protesaun Sivil (SEPS) hahú monta sirene iha fatin rua (2), hanesan Largo Lecidere no Aeroportu Internasional Nicolau Lobato, Comoro, Díli.

“Estabelese sirene atu fó alarma ka lian, ne’e hanesan fó avizu ba ita nia komunidade iha situasaun tsunami atu sa’e, nune’e povu sira bele halo evakuasaun liu-liu iha Díli laran, ida ne’e maka Governu nia responsabilidade”,Sekretáriu Estadu Protesaun Sivil (SEPS), Alexandrino de Araújo ba jornalista sira iha Aeroportu Internasional Nicolao Lobato, Comoro-Díli, Sesta (22-02-2019).

Nia esplika, lansamentu ba sirene ba tsunami ne’e sei halo iha loron 28, fulan ne’e no ba oin sirene ne’e sei la lian arbiru, sé lian ne’e signifika tsunami atu sa’e, nune’e povu sira tenki halo evakuasaun.

“Agora dau-daun Governu instala ona sirene iha fatin rua (2), hanesan iha Largo Lecidere no iha Aeroportu Internasional Nicolao Lobato-Díli, maibé tuir planu ne’e, Governu atu halo instalasaun sirene hát (4),tanba kestaun orsamentu nune’e Governu instala de’it rua (2), ho nia montante orsamentu hamutuk USD milliaun 300”, relata SEPS ne’e.

Husi sorin seluk, Xefi suku Madohi, postu administrativu Dom Aleixo, munisípiu Díli, Bernardino de Cristo Pereira promete, hamutuk ho komunidade sei fó seguransa ba sirene ne’ebé estabelese husi Governu, tanba bainhira tsunami atu sa’e povu sira mós bele hatene, liu husi sirene ninia lian.

“Nune’e ami nia servisu oinsa maka servisu hamutuk ho komunidade no Governu, oinsa maka bele asegura sirene ne’ebé Governu estabelese tiha ona iha fatin ida ne’e”, haktuir Bernardino.

Entretantu planu Governu monta sirene iha fatin rua (2), hanesan iha Largo Lecidere no iha Aeroportu Internasional Nicolao Lobato-Díli ne’e ho objetivu, karik akontense tsunami iha kapital Díli sirene refere fó sinal ba komunidade no ema hotu ne’ebé maka hela iha kapital Díli, evakua ba fatin seguru. ety