SPN-Autoridade Suku Manleuana hala’o limpeja

Membru Silat Padjajaran Nasionál (SPN) ranting Lemocari Harimau 5  hamutuk ho autoridade lokal halo limpeza iha suku Manleuna atu garante ambiente no moris saudavel.

Iha Sábadu (09/02/19) Silat Padjajaran Nacionál, Ranting Lemocari Harimau 5 ho nia membru 100 resin hamutuk ho autoridade aldeia Lemocari ho OPS membru Suku Manleuana hodi halo aktividade limpeja jerál.

Ho nia objetivu atu garante ambiente no moris saudavel ba komunidade sira iha suku Manleuana.

Asaun social ida ne’e sai referensia ba organizasaun arte marsial hotu-hotu atu banati tuir hodi hamutuk kontribui garante ambiente no moris saudavel.

Alem de garante ambiente no moris saudavel, aktividade refere bele kria mos lasu amizade no unidade entre membru Silat Padjajaran Nacional ho komunidade no OPS iha suku Manleuana hodi kontribui ba estabilidade nacional.

“Ami tenke kontribui ba rai doben Timor-Leste ida ne’e, entaun ami koalia ho autoridade suku, Aldeia, OPS no seluk tan, oinsa mak bele halo aktividade ruma e liliu hamos lixu sira iha suku laran, tanba arte marsiais laos treinu tuku malu deit. Ami haree iha ambiente suku ne’e, dala ruma kuandu udan, bé sa’e fali ba estrada leten, entaun ami hola inisiativa hamos valeta ku’ak no estrada sira neebe mak nakonu ho foer,” hateten Ranting Lemocari Harimau 5 , Mário Amaral.

Aktividade limpeja jerál ne’e hetan kolaborasaun diak ho autoridade lokál, aldeia Lemocari ho membru OPS suku Manleuana.

Xefe aldeia Lemocari, Estaquio Tilman hateten nia louva ho inisiativa tomak husi membru silat padjajaran nacional no konsidera hanesan referensia diak tanba ne’e ba futuru sei hametin liu koperasaun.

“Núdar autoridade, hau apresia ho inisiativa arte marsiais Padjajaran nian. Ida ne’e iha nia objetivu di’ak ida atu eduka ita nia joventude sira, e liliu ba arte marsiais no rituais ne’ebé mak sai risku ba estadu Timor-Leste ida ne’e,” hateten Xefe aldeia Lemocari, Estaquio Tilman.

Atividade limpeja jerál ne’e hanesan ba dahuluk organija husi Silat Padjajaran Nacionál Ranting Lemocari Harimau 5 no tuir planu sei kontinua hala’o iha suku Manleuana nomos ba iha suku sira seluk iha kapital Díli. Ito