Soldadu F-FDTL ida mate, tanba soke kareta

01 April 2019
0 Comments
11.871 View.

Soldadu FALINTIL Forsa Defeza Timor-Leste naran kompletu Than Imaculado da Conceição, mate wainhira kondus motor ho sapa matrikula H 1351 TL hodi soke kareta nia kotuk, wainhira para iha hela área Kintal Kiik.

Asidente tráfegu ne’e akontese iha Kintal Kiik Díli, Postu Administrativu Nain-Feto, Munisípiu Díli Sabdu (30/03/19) mais ou menus tuku 10 kalan oras Timor-Leste.

Tuir kronolojia akontesimentu haktuir husi, Matias Magno nudar familia katak, mais ou menus tuku 10 dadersan Than Imaculado da Conceição sai husi uma Bidau Akadiruhun, kondus ninia motor, maibe Than la informa ba ninia familia uma laran katak, nia ba fatin ruma.

Iha tuku 10 kalan familia rona fali rekadu husi komunidade balun ba informa, Than ninia familia iha Bidau Akadiruhun katak, Than mate tiha ona iha Kintal Kiik. Tanba ne’e familia sira ba to’o iha fatin akontesimentu hodi haree, maibe Than mate tiha ona.

Familia evakua ba Hospital Nasionál Guido Valadres, maibe labele salva nia vida. Oras ne’e dadauk mate isin soldadu ne’e rai ona iha ninia rejidensia Bidaun Akadiruhun, tuir planu mate isin sei lori ba halot iha Jardim Herois Metinaro.

Enkuantu motivu seluk, haktuir husi komunidade balun katak, hetan asidente tráfegu tanba kauza lanu labele kontrola ninia a’an.

“Ami senti lakon ami nia oan diak ida, tanba durante nia sei moris rai hela memoria diak ba ami, maibe la to’o rohan”, esplika Matias Magno nudar familia, ba GMN Domingu (31/03/19) iha Bidau Akadiruhun Díli.

Entretantu Than Imaculado da Conceção moris iha Díli iha loron 9 fulan Dezembru tinan 1991, oan ba dala uluk husi aman Luis dos Santos Conceição no inan Martinha da Silva de Jesus Pinto.

Lee hotu : Hábitos de leitura raros em Timor-Leste

Tama forsa iha tinan 2015, destaka iha Komponente Apoiu Servisu iha kompaña Mekanik F-FDTL iha Metinaro.

Than Imaculado da Conceção mate klosan husik hela nia alin mane nain rua no feto nain hat.

Tuir familia sira katak, evidensia hanesan motor ne’ebé Than kondus oras ne’e asegura ona iha Kuartel Polísia Munisípiu Díli.avi