MJ planeia tau plaka iha área tasi ibun

Ministériu Justisa (MJ) planeia tau plaka iha área protezidu hanesan tasi ibun, hodi fó hatene ba komunidade katak, área besik tasi ibun ka mota Governu maka tenki administra.

“Tuir lei rai númeru 13/2017, artigu 8 hateten, husi laloran nia rohan metru 50 mai rai maran ne’e área protezidu, signifika Estadu nia rai no Estadu mak administra, maibé saida maka akontese iha tasi ibun sira hanesan área Bidau, ema halo uma arbiru de’it iha tasi ibun no mota ninin, tanba ne’e iha tempu badak ami sei tau plaka iha tasi ibun no mota ninin iha kapital Díli no dau-daun ne’e komesa iha faze produz plaka ho nune’e komunidade sira bele hatene katak rai ne’e Estadu nian no wainhira Estadu presiza laiha ema ida maka ko’alia katak ne’e ninia rai”, Ministru Justisa (MJ), Manuel Cárceres liu husi konferensia imprensa ne’ebé hala’o iha ninia kna’ar fatin, Caicoli-Díli, Sesta (10-05-2019).

Nia esplika, dalabarak wainhira anin boot sobu komunidade nia uma iha tasi ibun ou mota ninin, komunidade sempre ezije fali ba Estadu atu tau matan, maibé Estadu nunka haruka ema atu ba hela iha área protezidu sira ne’e.

“Ha’u fó ona orientasaun ba Sekretáriu Estadu Terras no propriedade tuir lei rai númeru 13/2017, kona-bá fatin ne’ebé proibidu atu labele halo uma iha tasi ibun no mota ninin, kuandu kontinua halo tenki regulariza ho lei”, dehan MJ, Manuel Cárceres.

Entretantu governante ne’e espera katak, ho maneira tau plaka ne’e bele hakle’an konsiensia komunidade atu labele halo uma iha tasi ibun no mota ninin, tanba fó mós risku ba vida wainhira tempu udan no anin boot. ita