Aeroportu Nicolau Lobato seidauk priense rekezitu aeroportu internasionál

Aeroportu Internasionál Prezidente Nicolau Lobato Comoro, Díli, seidauk priense rekezitu sira sai Aeroportu Internasionál ida, tanba sei fraku iha seguransa aviasaun nian no menus rekursu umanu.

Pilotu Timor-oan, Julito Gonzaga, hato’o lia hirak nee ba jornalista sira  hafoin partisipa Workshop kona-ba dezaminasaun normas no seguransa aviasaun sivil Timor-Leste, Kinta (11/07), iha salaun Ministériu Transporte Komunikasaun, Caicoli, Díli.

Julito Gonzaga esplika, “Ita nia situasaun Aeroportu agora dadauk ne’e ita infrenta menus Rekursus Humanus no fasilidade, ita seidauk priense rekezitus kona-ba dehan internasional Aeroportu, ne’ebé ida ne’e mak problema bo’ot ida ba ita kona-ba sekuriti pasazeirus no ba operadores Airlines sira nian”.

Pilotu timor-oan nee sujere ba governu atu tau atensaun makas nune’e ita bele atraia investor sira bele mai investe iha ita nia rai, liu husi liña aero.

“Ida ne’e hanesan ezersísiu ida ba governu tenki tau matan ba problema ida ne’e, tamba ita nia frakeza mak ne’e , maske lei hirak ne’e dezamina ona, maibe ema implementa lei ne’e mak sei menus”,dehan Julito Gonzaga.

Durante pilotu Timor oan sira nia voo Oe-Cusse – Díli , Suai – Díli no mós ba aviaun internasional hirak ne’ebé voo Díli-Bali, Díli Singapore no Díli – Austrália sira nia seguransa aviasaun sei minimu tebes, tamba pasazeirus balun kontinua lori sasan proibidu, pistola no kilat hodi ba sa’e aviaun.

Pilotu ne’e hakarak fó hanoin ba Governu Timor-Leste atu kontrola no asegura situasaun ne’e, tamba ne’e,fó ameasa  ba ema nia vida.

“Lei sivil aviasaun internasional nian bandu ema ou pasazeirus lori sasan kroat ,kilat no pistol hodi lori ba sa’e iha aviaun ,maibe wanhira ne’e akontese ita tenki deklara ba seguransa aviasaun ,wanhira ita hakarak lori sasan proibidu sira ne’e atu nune’e bele asesgura pesoal sira lori kilat no pistol ba iha aviaun laran,tamba ninia impaktu bele prejudiak durante voo iha aviaun laran.

Iha kazu barak, ema balun uza sasan kroat, kilat no pistola hodi ameasa pilotu sira semo  tuir sira nia hakarak hodi desvia sira nia distinasaun.

Prezidente Administrasaun Navegasaun Aero Timor-Leste, Romoaldo da Silva rekoñese situasaun Aeroportu Internasional Prezidente Nicolau Lobato nia seguransa aviasaun sei fraku no nia fasilidade minimu tebes, tanba obrigadu utiliza realidade ne’ebé mak iha.

“Ita hotu hatene katak,kondisaun Aeroportu Internasional Prezidente Nicolau Lobato Comoro, minimu tebes, ami rekoñese, mas ita nia situasaun mak hanesan ne’e ona, nune’e ami hala’o de’it ,tamba ita nia aeroportu ne’e ita dudu bá mai mos nune’e hela de’it ,ba sira ne’ebé uza pistola no kilat hodi sa’e aviaun ne’e PNTL ho F-FDTL dala ruma ami hetan hodi hase ba sira, dehan o konese hau ka lae? Ne’ebé dadaun ne’e mós salaun VIP iha aeroportu ne’e mos naran mak VIP ,maibe ema tama nadodon ba dala ruma to’o nakonu, ita hatene ona katak,sala VIP ne’e atu ema bo’ot mak iha laran ne’e tenki ema la bo’ok semak atu bo’ok”, dehan Romoaldo da Silva.

Prezidente Administrasaun Navegasaun Aero Timor-Leste nee pasazeirus balun ne’ebé sei lori kilat no pistola hodi sa’e aviaun iha viazen ne’e, liu-liu ba Polisia Nasional Timor-Leste-PNTL no FALINTIL Forsa Defeza Timor-Leste-F-FDTL.Tos