Fó últimu omenajen, PR Lú Olo: Samba 9 mak salva ami iha tempu difísil

Prezidenti Repúblika (PR), Francisco Guterres ‘Lú Olo’, fó últimu omenajen ba saudozu Jaime Ribeiro alias “Samba 9”, iha serimónia funebre  ba saudozu iha  Jardim dos Herois Metinaro.

Iha omenajen ikus ne’e, Xefe Estadu hateten, Komandante Samba 9, nia karakteristika fundamental no matenek hodi orienta soldadu sira ba objetivu ida de’it, atu Timor-Leste ukun rasik aan.

PR Lú-Olo haktuir, Samba 9 alende militar, maibé nia hatene  mós polítika ne’ebé orienta hodi defende no salva  kuadrus FALINTIL sira iha tempu ne’ebé difisil  tebes .

“Komandante Samba 9, nia hatene  mós polítik, tanba  nia hatene katak, polítika mak orienta liu nia kuadru sira no nai ulun sira, hahú husi Irmão Kay Rala Xanana Gusmão to’o  mai iha Taur Matan Ruak ho ami sira hotu, nia iha respeitu ho konsiderasaun ne’ebé bo’ot tebes, bainhira hamutuk ho  nia, iha  tempu difisil tebes, Samba ate fó aan ba mate, para defende ami sira ne’e”, afirma PR Lu-Olo iha nia  omenajen ikus ba saudozu Samba 9 iha  serimonia funebre  veteranu Samba 9, iha  Jardin dos Herois Metinaro, Sábadu (06/07).

Xefe Estadu ne’e haktuir, iha tempu luta libertasaun nasional, Komandante Samba fó aan ba mate hodi salva lideransa gerilia sira, ne’ebé dadaun ne’e  sei moris.

“Laiha buat di’ak ida atu selu, maibé mak ida ne’e, Samba nia valor bo’ot ida ne’e, sei la naben iha rai ida ne’e nia leten,  maibé sei kuda iha rain ne’e nia leten atu bele buras, hodi no sai  istória ida. Maluk sira hotu, kompañeirus veteranus sira hotu,  ida ne’e mak pasajen istórika komandante Samba 9 nian, ohin ho hanoin, iha tempu ida hanesan ohin, maibé sei iha ai laran lahatene kombate dala hira ona, maibé Komandante Samba, ha’u hakarak hatete tan dala ida, alende hanesan Komandante, maibé nu’udar kuadru mós, ne’ebé kompletu liu husi polítika no militar nian, no nia mós bele sai aman ba nia soldadu sira hotu, dala barak liu  nia sihak, tanba soldadu sira ne’e indisiplinadu uitoan, maibé nia nafatin mantein rigor no disiplina nafatin, husi ida ne’e hatudu nia hatene eduka nia soldadu sira”, salienta Lu-Olo .

Iha  serimonia funebre ne’e, reprezentante família Hermenegildo da Cruz, hato’o agradesimsentu ba Estadu, Governu, no ba ema hotu ne’ebé akompaña saudozu hahú jusi hakotu  iss iha Hospital Nasional Guido Valadares (HNGV).

Nia haktuir, Samba 9 ka Jaime Ribeiro ba ema hotu, tanba nia istória ba rai ida ne’e signifikadu tebes.

“Samba 9 hatete hela mai ba  nai ulun sira, labele se kotuk ba malu, tanba polítika la odiu no la vingansa, tenki hamutuk hodi rezolve  problema rasik, hamutuk defende  paz no estabilidade, defende paz ba rai ida ne’e. Maun Samba 9 ho nia simplisidade, loyalidade no espíritu pátriatismu nasionalismu  ne’ebe aas, hodi defende Estadu ne’e  hahú husi tempu libertasaun to’o mai iha restaurasaun da independensia”, afirma Hermenegildo.

Tanba ne’e, Hermegildo husu atu Estadu tau matan ba feto faluk no oan kiak sira ne’ebé saudozu Samba 9 husik hela.

“Familia  no feto faluk oan kiak sira, ba nai ulun sira atu tau matan ba sira, nia oan kiak na’in 8 ne’e to’o ba iha kosok oan ne’ebé foin halo fulan  ida, nune’e mós família tomak husu, hahú husi ohin ba oin iha loron 40, hader iha uma matebian nian iha Ulmera, husu ba ita bo’ot sira nia partisipasaun tomak iha loron 40 nia laran”, fundamenta Hermenegildo.oly