CET deklara ofisiál Santo Padre Francisco foti Dioseze Díli nu’udar Arquidiocese

Sekretariu Ezekutivu Conferensia Episcopal Timorense (CET), Pe. Leandro Maria da Silva, hatete, liu husi anunsiu ne’ebé hato’o  husi Amo Nuncio Apostoliku ba Timor-Leste Monsiñor Joseph Marino katak, Santo Padre Francisco desidi hodi foti Dioseze Díli hanesan Arquidioseze no Dom Virgílio do Carmo da Silva SDB, nu’udar ArceBispo Aquidiocese Díli.

“Liu husi komunikadu ida ne’e hakarak hato’o ba igreja Katólika Timor Leste tomak katak horiseik (horbainrua) loron 11 fulan Setembru tinan 2019 lorokraik iha misa Cathedral Dili, Amo Nuncio Apostóliku ba Timor Leste Monsiñor Joseph Marino, fo sai katak ho tulun no grasa maromak nian, amo Papa Francisco foti Dioseze Dili sai nudar Arquidioseze ka Dioseze Metropolitana”,dehan Padre Leandro ba Jornalsita sira liu husi Konferensia imprensa ne’ebé hala’o iha Eis Eskola São Jose Balide Dili Kinta (12/09/2019)

Nia akresenta, liu husi sefrageñaneo mak Dioseze Baucau no Dioseze Maliana, no Amo Bispu Dioseze Dili nian, Dom Virgilio do Carmo da Silva SDB, mak sai nudar ArceBispu ba Aquidioseze.

Sekretáriu Ezekutivu CET ne’e realsa, Igreja Timor-Leste marka tan nia historia ida, tanba ne’e husu ba Nai  lulik siram, ba sarani katolika hotu, atu fo agardese ba maromak grasa kmanek ida ne’e.

“Ne’e duni, mai ita hotu ho laran no fuan tomak husu nafatin maromak nia tulun bensaun ba ita nia Arcebispu, no Bispu sira seluk atu bele halo nafatin sira nia knaar nu’udar bibi atan diak, no komunikadu públiku ne’e fo sai hodi fo hatene  ba nai lulik sira, relijiozu, relizioza sira, no mos komunidade sarani Katólika tomak iha Timor Leste hodi hatene” fundamenta Pe. Leandro.Oly