PJR Seidauk simu informasaun kona bá kazal Timor-oan iha Indonézia

Prokurador Jeral Repúblika (PJR), José Da Costa Ximenes hateten, to’o agora PJR seidauk hetan informasaun ruma,  husi embaixador Timor-Leste (TL)  iha indonézia  kona bá, kazu kazal timor-oan  ho inisial JSP no AS ne’ebé deskonfia lori droga ho tipu ekstasi tama ba indonézia.

“Ha’u seidauk hetan informasaun formal, ministériu públiku la reprezenta Estadu iha juridisaun exterior ou pais estranjeiru, ita halo kordenasaun ho sira, mas ha’u seidauk iha informasaun, ha’u hasoru no ko’alia ona embaixador maibé to’o agora seidauk update fali mai ha’u, iha fulan ida ne’e nia promete hodi fó informasaun mai ha’u kona bá prosesu julgamentu ba”, José da Costa Ximenes hato’o lia hirak ne’e, hafoin hasoru malu  ho Prezidente Repúblika Francisco Guterres Lú Olo iha Palásiu Prezidensial Nicolau Lobato Bairo Pité Díli, Sexta (13/12/2019).

PJR konsidera, kazu ne’e hanesan responsabilidade Governu nian atu disponibiliza advogadu para defende sidadaun ne’e, tanbá PJR nia servisu atu reprezenta iha rai laran.

“Atu defende iha ne’ebá, husu ho advogadu ko’alia ho Governu para desponibiliza para defende sidadaun iha ne’ebá, entaun ita akompania deit, se ema lakohi atu entrega no hakarak julga iha ne’ebá, ita atu halo oinsa, tanbá sistema judisial ema nian iha ne’eba la’o hanesan ne’e”, katak dehan PJR ne’e.

Relasiona ho kazu ne’e  José da Costa Ximenes husu  Timor-oan sira ne’ebé hakarak atu halo viajen ba estranjeiru, tenke iha atensaun makaas  ba sasan ne’ebé sira lori, tanba wainhira komete eiru  ruma,  tenke prontu hodi responde ba  lei ne’ebé vigora iha nasaun refere.

Entertantu kazal Timor-oan ho inisial JSP no AS hetan kapturasaun husi Polísia Republika Indonézia,  hafoin Alfandega Atambua detekta droga ho tipu ekstasi iha printer ne’ebé sira lori ho kuantidade musan 4.874 (rihun hat atus ualu hitu nulu resin hat)  iha loron 29 fulan Maiu tinan ne’e.GMN