Diálogu ho fuan mak bele solusiona impase polítiku

Konfisoens Relijiozu sira iha Timor-Leste, ne’ebé reprezenta husi Pastor Lorenso dos Santos,  Moderador IPTL hatete,  diálogu nasionál entre líder polítiku sira tenke husi fuan ba fuan mak bele solusiona impasse polítiku ne’ebé la’o kuaze tinan rua ona iha Timor-Leste.

“Ami husi relijiaun hira ne’ebé iha Timor, sorumutu ho Prezidente Repúblika, Francisco Guterres Lú Olo, husi Musulmanu, Asemblea de Deus, IPTL, no Budha, ami hotu hala’o diálogu ho  Prezidente. Iha ami-nia sorumutu ne’e importante, ami hato’o ami nia intervensaun mak, primeiru ami hato’o katak, presiza tenke hala’o diálogu nasional husi fuan ba fuan, liu-liu ba lideransa funu nain sira hodi kria unidade nasionál”, katak Pastor Lorenso ba Jornalista sira Sesta (31/01/2020) iha Palásiu Prezidensial, Bairo Pite Díli.

Nia haktuir, lideransa sira tenke fó liman ba malu, nune’e bele hakotu situasaun polítika ne’ebé oras ne’e dadaun akontese iha VIII governu ida ne’e, opiniaun segundu  mós hato’o katak, ba sua exelensia Prezidente Repúblika, uza nia kompetensia tomak tuir konstituisaun RDTL haruka, hodi bele foti desizaun ba situasaun ne’ebé mak akontese iha Parlamentu, tanba sira fó konfiansa tomak ba Xefe Estadu hodi foti desizaun.

Alende ne’e , Pastor Francisco dos Reis hatutan, hanoin fali ba kotuk, Timor-Leste ultrapasa krize mesak bo’ot deit iha pasadu, ba krize ida akontese dadaun ne’e  ki’ik oan demais, maibéd ukun nain sira presija tu’ur hamutuk hodi halo diagnose ida profunda no suprefisila hodi halakon tiha vingansa polítika.

“Tanba kompromísu funu to’o ohin ukun aan ne’e, atu lori povu ba moris diak, ami husu ba líder sira, bele hala’o  diálogu husi fuan ba fuan para halakon tiha siklu vingansa polítika, para governu no instituisaun ne’e bele la’o diak ba oin”, tenik Francisco Reis.oly